កិច្ចសហប្រតិបត្តិការ និងចំណងមិត្តភាពដែកថែប រវាងកម្ពុជា និងចិន បន្តស្តែងឱ្យឃើញយ៉ាងច្បាស់តាមរយៈការចូលរួមចំណែកយ៉ាងសកម្មក្នុងសកម្មភាពមនុស្សធម៌ និងការអភិវឌ្ឍនៅកម្ពុជា។
ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា បានសម្តែងនូវសេចក្តីសោមនស្សរីករាយយ៉ាងខ្លាំង ដែលបានឃើញមូលនិធិសុខុមាលភាពសាធារណៈ និងក្រុមហ៊ុនចិនពាក់ព័ន្ធ បានផ្តល់ឧបករណ៍បោសសម្អាតមីនដ៏ឆ្លាតវៃ (Smart Demining Equipment) ជាអំណោយជូនដល់មជ្ឈមណ្ឌលសកម្មភាពកំចាត់មីនកម្ពុជា (CMAC) ព្រមទាំងបានរៀបចំវគ្គបណ្តុះបណ្តាលជាក់ស្តែងផងដែរ។ ឯកឧត្តមអគ្គរដ្ឋទូតបានសម្តែងក្តីសង្ឃឹមយ៉ាងមុតមាំថា បច្ចេកវិទ្យា និងការហ្វឹកហ្វឺននេះ នឹងជួយបង្កើនប្រសិទ្ធភាពដល់ការងារដោះមីននៅកម្ពុជាឱ្យកាន់តែមានសុវត្ថិភាព និងលឿនរហ័ស។
ការលើកឡើងរបស់ឯកឧត្តមអគ្គរដ្ឋទូតចិន ធ្វើឡើងបន្ទាប់ពីទីបញ្ជាការស៊ីម៉ាក់រាជធានីភ្នំពេញ បានរៀបចំ «ពិធីផ្ទេរ-ប្រគល់ និងបើកវគ្គហ្វឹកហ្វឺនការប្រើប្រាស់យានគ្មានមនុស្សបើក (Drone)» កាលពីថ្ងៃទី២៤ ខែសីហា ឆ្នាំ២០២៦ កន្លងទៅ។ ពិធីនេះជាការប្រគល់អំណោយ និងការគាំទ្របច្ចេកទេសផ្លូវការពីក្រុមហ៊ុនចិន Hongpong ជូនដល់អង្គភាពស៊ីម៉ាក់ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយក CMAC, លោក LI Guodong លេខាទូតទី១ នៃស្ថានទូតចិនប្រចាំកម្ពុជា និងលោក XU Peng អគ្គនាយកក្រុមហ៊ុន Hongpong។ ព្រឹត្តិការណ៍នេះក៏មានការចូលរួមពី លោក Liu Wenzhi ប្រធានការិយាល័យមូលនិធិចិន Peaceland ប្រចាំកម្ពុជា ថ្នាក់ដឹកនាំ មន្ត្រីជំនាញ CMAC និងតំណាងដៃគូពាក់ព័ន្ធជាច្រើនរូបទៀត។
នៅក្នុងឱកាសនោះ ឯកឧត្តម ហេង រតនា បានថ្លែងអំណរគុណយ៉ាងជ្រាលជ្រៅបំផុតចំពោះស្ថានទូតចិនប្រចាំកម្ពុជា មូលនិធិ Peaceland និងក្រុមហ៊ុន Hongpong ព្រមទាំងប្រជាជនចិនទាំងមូល ដែលតែងតែផ្តល់ការគាំទ្រដល់ប្រជាជន និងរាជរដ្ឋាភិបាលកម្ពុជា។ ឯកឧត្តមបានសង្កត់ធ្ងន់ថា ជំនួយបច្ចេកវិទ្យាដ្រូន និងឧបករណ៍ឆ្លាតវៃទាំងនេះ មិនត្រឹមតែជួយពង្រឹងសមត្ថភាពម្ចាស់ការលើខឿនសេដ្ឋកិច្ច និងការពារជាតិប៉ុណ្ណោះទេ ប៉ុន្តែថែមទាំងជាការចូលរួមចំណែកយ៉ាងសំខាន់ដល់បេសកកម្មមនុស្សធម៌ ដើម្បីសង្គ្រោះជីវិតប្រជាពលរដ្ឋ និងរំដោះដីធ្លីសុវត្ថិភាពជូនប្រជាជនកម្ពុជាផងដែរ៕