ក្រុមបាល់ទាត់ជម្រើសជាតិកម្ពុជា អាយុក្រោម២០ឆ្នាំ បានយកឈ្នះជើងខ្លាំងយេមែន ក្នុងលទ្ធផល ២-១ នៅកីឡដ្ឋានជាតិ (ស្តាតអូឡាំពិក) កាលពីយប់ថ្ងៃទី៣១ ខែសីហា ឆ្នាំ២០២៦ សម្រាប់ការប្រកួតទី១ ក្នុងពូល G នៃវគ្គជម្រុះពានរង្វាន់ AFC U20 Asian Cup China 2027 Qualifiers។
ស្របពេលក្រុមរួមពូល G គឺជើងខ្លាំងជប៉ុន បានយកឈ្នះគុយវ៉ែត លទ្ធផល ៤-០ ឈរកំពូលតារាងបណ្តោះអាសន្ន ខណ:ក្រុមជម្រើសជាតិកម្ពុជា ឈរលេខ២ មាន៣ពិន្ទុស្មើគ្នា គ្រាន់តែខុសផងសងគ្រាប់បាល់។
គួរដឹងថាការប្រកួត AFC U20 Asian Cup China 2027 Qualifiers ចាប់ផ្ដើមប្រកួតជម្រុះពីថ្ងៃទី៣១ ខែសីហា ដល់ថ្ងៃទី០៦ ខែកញ្ញា ឆ្នាំ២០២៦ នៅពហុកីឡដ្ឋានជាតិអូឡាំពិក ដែលកម្ពុជាយើងធ្វើជាម្ចាស់ផ្ទះពូល G។
សម្រាប់ក្រុមលេខ១ ក្នុងពូលទាំង ៨ និងក្រុមលេខ២ ល្អ ៧ក្រុមរួមជាមួយម្ចាស់ផ្ទះចិន នឹងកក់កៅអីឡើងទៅកាន់ជុំផ្ដាច់ព្រ័ត្រ 2027 AFC U-20 Asian Cup ដែលធ្វើឡើងនៅប្រទេសចិន ចាប់ពីថ្ងៃទី២៤ ខែមីនា ដល់ថ្ងៃទី១០ ខែមេសា ឆ្នាំ២០២៧។
ក្រុម U20 កូរ៉េខាងត្បូង ជាអ្នកឈ្នះជើងឯកច្រើនជាងគេរហូតដល់១២លើក គិតចាប់តាំងពីពានរង្វាន់នេះបង្កើតឡើងដំបូងពីឆ្នាំ១៩៥៩មក ខណ:មីយ៉ាន់ម៉ា ៧លើក អ៊ីស្រាអែល ៦លើក អ៊ីរ៉ាក់ ៥លើក អ៊ីរ៉ង់ ៤លើក អារ៉ាប៊ីសាអូឌីត និងកូរ៉េខាងជើង ៣លើក ថៃ ២លើក។ ដំបូងឡើយពានរង្វាន់នេះរៀបចំឡើងរាល់១ឆ្នាំម្តង តែចាប់ពីឆ្នាំ១៩៧៨ មកពានរង្វាន់នេះប្តូរមករៀបចំរាល់២ឆ្នាំម្តងវិញ៕
លទ្ធផល និងកម្មវិធីប្រកួតបន្ទាប់៖
