ក្លិបបាល់ទាត់ព្រះខ័នរាជស្វាយរៀង បានចារឈ្មោះជាម្ចាស់ពានរង្វាន់ Cambodian Super Cup ចំនួន៣ឆ្នាំជាប់គ្នា បន្ទាប់ពីយកឈ្នះវិសាខា ក្នុងលទ្ធផល ២ទល់និង១ នាថ្ងៃទី៣០ ខែសីហា ក្នុងពហុកីឡដ្ឋានជាតិមរតកតេជោ។
សម្រាប់ជ័យជម្នះរបស់ព្រះខ័នរាជស្វាយរៀង ក្នុងពានរង្វាន់បើករដូវកាលថ្មីលើកនេះ គឺជាការគ្រងជើងឯក៣ឆ្នាំជាប់គ្នា ចាប់ពីឆ្នាំ២០២៤មក។
ប្រវត្តិពានរង្វាន់មុនបើករដូវកាលនេះ រៀបចំចំនួន៥លើករួចមកហើយ ដោយលើកដំបូងបំផុតគឺនៅឆ្នាំ២០១៧ ប្រើឈ្មោះថា CNCC Charity Cup 2017 ហើយ រហូតដល់ឆ្នាំ២០២៣ ទើបរៀបចំឡើងវិញ ដោយប្រើឈ្មោះថា Cambodian Super Cup រហូតដល់បច្ចុប្បន្ន។
សម្រាប់លទ្ធផល៥លើកមកនេះឃើញថា៖
- ឆ្នាំ២០១៧៖ បឹងកេត ៣-០ ក្រសួងការពារជាតិ (សមាគមក្លិបបាល់ទាត់កងយោធពលខេមរភូមិន្ទ)
- ឆ្នាំ២០២២៖ ភ្នំពេញក្រោន ២-១ វិសាខា
- ឆ្នាំ២០២៣៖ ភ្នំពេញក្រោន ២-១ វិសាខា
- ឆ្នាំ២០២៤៖ ព្រះខ័នរាជស្វាយរៀង ២-១ ភ្នំពេញក្រោន
- ឆ្នាំ២០២៥៖ ព្រះខ័នរាជស្វាយរៀង ២-២ ភ្នំពេញក្រោន (ព្រះខ័នរាជស្វាយរៀង ឈ្នះបាល់កាត់សេចក្តី១១ម៉ែត្រ ៥-៣)។
គួរបញ្ជាក់ថា ក្រោយចប់ពានរង្វាន់បើករដូវកាលមួយនេះ ការប្រកួតលីគកំពូលកម្ពុជា Cambodian Premier League រដូវកាលឆ្នាំ ២០២៦-២៧ នឹងចាប់ផ្តើមជាផ្លូវការនៅថ្ងៃទី៥ ខែកញ្ញា ខាងមុខ ខណៈសមាជិកចូលរួមគឺមានចំនួន១១ក្រុម៕
