ថ្មីៗ មានការចាប់អារម្មណ៍ និងវែកញែកលើបណ្ដាញសង្គមជុំវិញការតែងតាំងលោកអនុសេនីយ៍ត្រី លី ឈុនហៀង ជានាយប៉ុស្តិ៍នគរបាល និងកញ្ញាព្រិន្ទបាលទោ ដួង សៀម៉ី ជារងប៉ុស្តិ៍នគរបាល ក្នុងទឹកដីខណ្ឌកំបូល រាជធានីភ្នំពេញ។
ជុំវិញបញ្ហានេះលោក ទូច សុខៈ (សុឃៈ) អ្នកនាំពាក្យរងក្រសួងមហាផ្ទៃ បានផ្តល់កិច្ចសម្ភាសន៍មកសារព័ត៌មានត្រយង ថា៖«ការតែងតាំងមុខតំណែងនាយ-រងផ្នែក នាយ-រងប៉ុស្តិ៍នគរបាលរដ្ឋបាល ជាសិទ្ធិសម្រេចប្រកបដោយសុភវិនិច្ឆ័យរបស់អគ្គស្នងការដ្ឋាននគរបាលជាតិ តាមរយៈការស្នើឡើងពីអង្គភាពនគរបាលថ្នាក់ក្រោមជាតិតាមឋានានុក្រម គឺ តាំងពីប៉ុស្ដិ៍នគរបាលរដ្ឋបាលសាមី រហូតមកដល់ស្នងការដ្ឋានរាជធានី-ខេត្ត និងចុងក្រោយគឺអគ្គស្នងការដ្ឋាន»។
លោកថាការតែងតាំងនេះគឺ៖«ទាមទារការបំពេញបាននូវលក្ខណសម្បត្តិផ្អែកលើគុណាធិបតេយ្យ តម្រូវការចំាបាច់ចំពោះមុខទាំងកម្លាំង និងជំនាញ ក៏ដូចជាស្ថានភាពជាក់ស្ដែងនៃអង្គភាពសាមី គឺប៉ុស្ដិ៍នគរបាលរដ្ឋបាលនោះ ពិសេសការវិវឌ្ឍនៃបច្ចេកវិទ្យាឌីជីថល និងបទល្មើសតាមបច្ចេកវិទ្យានេះ»។
ជាមួយគ្នានេះដែរលោក ទូច សុខៈ បានថ្លែងអំណរគុណចំពោះការចាប់អារម្មណ៍និងគាំទ្រចំពោះការផ្ដល់ឱកាសដល់យុវជនបន្តវេន កាន់មុខតំណែងជានាយប៉ុស្ដិ៍និងនាយរងប៉ុស្ដិ៍ ក៏ដូចជាមុខតំណែងផ្សេងៗ។
អ្នកនាំពាក្យរងក្រសួងមហាផ្ទៃ បានបន្ថែមថា៖«តែទោះយ៉ាងណា យើងក៏នឹងតាមដាន ពិនិត្យ រាល់ព័ត៌មាន មតិមហាជន ស្របនឹងការសង្ឃឹមថា សាធារណជននឹងគាំទ្រ លើកទឹកចិត្ត ដល់អ្នកបន្តវេន ក្នុងលក្ខខណ្ឌ ដូចដែលខ្ញុំបានលើកខាងលើ,កុំឱ្យផ្ទុយពីនេះ»។
លោក ទូច សុខៈ យល់ថា៖«ទន្ទឹមនឹងនេះដែរ ក៏ត្រូវមានប្រព័ន្ធវាយតម្លៃលើការកាន់មុខតំណែងទាំងនេះ ក្នុងរយៈពេលកំណត់ជាក់លាក់មួយដែរ ដើម្បីប្រាកដថា ពួកគេបំពេញតួនាទីភារកិច្ចប្រកបដោយប្រសិទ្ធភាព ស័ក្តិសិទ្ធភាព ប្រសិទ្ធផល គុណផល ប្រកបដោយគណនេយ្យភាពចំពោះប្រជាពលរដ្ឋ និងអង្គភាពអាណាព្យាបាល»៕