កម្ពុជា ទទួលស្វាគមន៍នាវាកងទ័ពជើងទឹកកាណាដា HMCS Regina នៅកំពង់ផែស្វយ័តក្រុងព្រះសីហនុ ក្នុងដំណើរទស្សនកិច្ចរយៈពេល ៣ថ្ងៃ

នៅថ្ងៃទី២២ ខែកញ្ញា ឆ្នាំ២០២៦ នេះ កងទ័ពជើងទឹកកម្ពុជា បានរៀបចំទទួលស្វាគមន៍យ៉ាងកក់ក្តៅចំពោះការចូលសំចតនៃ «នាវាកងទ័ពជើងទឹកកាណាដា HMCS Regina (FFH334)» នៅកំពង់ផែស្វយ័តក្រុងព្រះសីហនុ ក្នុងក្របខ័ណ្ឌនៃដំណើរទស្សនកិច្ចផ្លូវការ និងកិច្ចសហប្រតិបត្តិការរយៈពេល ៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែកញ្ញា ឆ្នាំ២០២៦។

ក្នុងពិធីទទួលស្វាគមន៍ផ្លូវការនេះ ភាគីកម្ពុជាត្រូវបានដឹកនាំដោយ លោកឧត្តមនាវីត្រី អ៊ិន សុខេមរា មេបញ្ជាការរងមូលដ្ឋានសមុទ្ររាម ដោយបានធ្វើការស្វាគមន៍យ៉ាងស្និទ្ធស្នាលចំពោះប្រតិភូនាវាកាណាដា ដែលដឹកនាំដោយ លោកវរនាវីទោ Darren Sleen មេបញ្ជាការនាវា HMCS Regina។ តាមការបញ្ជាក់លើលក្ខណៈបច្ចេកទេស នាវាចម្បាំង HMCS Regina (FFH334) មានទម្ងន់ផ្ទុកសរុប ៥,១០០តោន ប្រវែងបណ្តោយ ១៣៤,៧ម៉ែត្រ ទទឹង ១៦,៥ម៉ែត្រ និងមានជម្រៅទឹក ៧,៥ម៉ែត្រ។

សូមជម្រាបថា ដំណើរទស្សនកិច្ចរបស់នាវាកងទ័ពជើងទឹកកាណាដានាពេលនេះ ធ្វើឡើងក្នុងគោលបំណងពង្រឹង និងពង្រីកទំនាក់ទំនង មិត្តភាព ព្រមទាំងកិច្ចសហប្រតិបត្តិការរវាងកងទ័ពជើងទឹកនៃប្រទេសទាំងពីរ (កម្ពុជា-កាណាដា) ឱ្យកាន់តែជិតស្និទ្ធ និងមានភាពរីកចម្រើនបន្ថែមទៀត៕