ភ្នំពេញ៖ សិល្បៈតន្ត្រីត្រូវបាននាំយកទៅបង្កើតបរិយាកាសរីករាយ និងផ្ដល់កម្លាំងចិត្តដល់ទណ្ឌិតដែលកំពុងអនុវត្តទោស នៅមណ្ឌលអប់រំកែប្រែទី១ តាមរយៈកម្មវិធីប្រគំតន្ត្រីក្រោមប្រធានបទ «ផ្ដល់កម្លាំងចិត្ត និងក្តីសង្ឃឹម ផ្សារភ្ជាប់សហគមន៍ និងពន្ធនាគារ» ក្នុងគោលបំណងជំរុញការកែប្រែខ្លួន លុបបំបាត់ការរើសអើង និងបង្កើនឱកាសសម្រាប់ការវិលត្រឡប់ទៅរស់នៅក្នុងសង្គមវិញ។
កម្មវិធីនេះបានធ្វើឡើងនៅរសៀលថ្ងៃសៅរ៍ ទី២៤ ខែតុលា ឆ្នាំ២០២៦ នៅសាលសិល្បៈនៃមណ្ឌលអប់រំកែប្រែទី១ ក្រោមអធិបតីភាពឯកឧត្តម ឧត្តមអគ្គានុរក្សថ្នាក់លេខ១ នុត សវនា អគ្គនាយករង និងជាប្រធានមណ្ឌលអប់រំកែប្រែទី១ ដោយមានការចូលរួមសម្ដែងពីសិល្បករជាច្រើនរូប រួមមាន លោក ENO, Djkdeb, ពូឃ្លាំង, VJ Anbe Ken និងលោក Rit Omega ព្រមទាំងសិល្បករផ្សេងទៀត។
តាមរយៈសំឡេងតន្ត្រី និងការសម្ដែងរបស់សិល្បករ កម្មវិធីនេះបានបង្កើតបរិយាកាសសប្បាយរីករាយ និងជាឱកាសមួយក្នុងការផ្ដល់ការលើកទឹកចិត្តដល់ទណ្ឌិតដែលកំពុងអនុវត្តទោស ដោយបង្ហាញថា ពួកគេនៅតែមានតម្លៃជាមនុស្ស និងអាចកែប្រែខ្លួន ដើម្បីកសាងអនាគតថ្មីបាន ប្រសិនបើទទួលបានការអប់រំ ការគាំទ្រ និងឱកាសសមស្រប។
ក្នុងឱកាសនោះ ឯកឧត្តម នុត សវនា បានកោតសរសើរ និងថ្លែងអំណរគុណដល់ក្រុមសិល្បករដែលបានចំណាយពេលវេលាចូលរួមសម្ដែងជូនទណ្ឌិត ដោយចាត់ទុកសកម្មភាពនេះថា ជាកាយវិការប្រកបដោយមនុស្សធម៌ និងជាការចូលរួមចំណែកដ៏មានអត្ថន័យក្នុងការគាំទ្រដល់ការអប់រំ ការកែប្រែឥរិយាបថ ការស្ដារនីតិសម្បទា និងការត្រៀមខ្លួនរបស់ទណ្ឌិតសម្រាប់ការធ្វើសមាហរណកម្មចូលក្នុងសង្គមវិញ។
ការផ្សារភ្ជាប់រវាងសហគមន៍ និងពន្ធនាគារ តាមរយៈសកម្មភាពសិល្បៈបែបនេះ ក៏ជាសារមួយបង្ហាញពីសារៈសំខាន់នៃការផ្ដល់ឱកាសឱ្យអ្នកដែលកំពុងអនុវត្តទោស អាចរៀនសូត្រពីកំហុស កែប្រែខ្លួន និងត្រៀមលក្ខណៈវិលត្រឡប់ទៅរស់នៅក្នុងសង្គមដោយមានការទទួលខុសត្រូវ។ ទន្ទឹមនឹងនេះ ការកាត់បន្ថយការរើសអើង និងការផ្ដល់ការគាំទ្រពីសហគមន៍ ក៏អាចជួយឱ្យពួកគេមានទំនុកចិត្តក្នុងការចាប់ផ្ដើមជីវិតថ្មីផងដែរ។
កម្មវិធីនេះមិនត្រឹមតែជាការកម្សាន្តប៉ុណ្ណោះទេ ប៉ុន្តែថែមទាំងជាសកម្មភាពមនុស្សធម៌ដែលរួមចំណែកលើកកម្ពស់ការអប់រំកែប្រែ និងការស្ដារនីតិសម្បទាទណ្ឌិត ដោយផ្ដោតលើការផ្ដល់កម្លាំងចិត្ត ក្តីសង្ឃឹម និងការត្រៀមខ្លួនសម្រាប់ការវិលត្រឡប់ទៅជាសមាជិកដែលមានប្រយោជន៍ក្នុងសង្គមវិញ។
អត្ថបទ៖ ចតុម្មុខ
