លោក Oleg Starynskyi គ្រូបង្វឹកភ្នំពេញក្រោន បាននិយាយអំពីការប្រកួតជាមួយ Kitchee នៅទឹកដីហុងកុង ថា៖ «យើងរំពឹងថាវាគឺជាការប្រកួតប្រជែងខ្លាំងមួយ ព្រោះ Kitchee ក៏ចង់ឈ្នះនៅទីលានគេដែរ។ យើងក៏ចង់មកទីនេះដើម្បីយកពិន្ទុបី នឹងជម្រុញក្រុមឲ្យឡើងទៅវគ្គបន្ទាប់ ដូច្នេះយើងចង់ផ្តោតលើការប្រកួត និងធ្វើឱ្យបានល្អ ក៏ដូចជាទទួលបានជ័យជម្នះ។»
លោក Oleg បញ្ជាក់ថា នៅពេលអ្នកយកព័ត៌មានសួរថាតើមានកីឡាករ Kitchee ណាម្នាក់ជាគ្រោះថ្នាក់ធំបំផុត ឬក្លិបនឹងលេងការពារកាន់តែខ្លាំងឬទេ គ្រូបង្គោលមិនបានចង្អុលឈ្មោះណាមួយឡើយ។ ផ្ទុយទៅវិញ គាត់បានសង្កត់ធ្ងន់លើភាពរឹងមាំនៃខ្សែប្រយុទ្ធ និងខ្សែកណ្តាលរបស់ Kitchee ទាំងមូល។
គ្រូបង្វឹកសញ្ជាតិអ៊ុយក្រែនរូបនេះបានបន្ថែមថា «សូម្បីតែមុនប្រកួត យើងក៏បានវិភាគរួចហើយ យើងដឹងថាខ្សែប្រយុទ្ធ និងខ្សែកណ្តាលរបស់ពួកគេរឹងមាំណាស់។ គេមានកីឡាករដែលមានបទពិសោធន៍ច្រើន ដែលដឹងពីរបៀបដឹកនាំការប្រកួត ដឹងពីរបៀបគ្រប់គ្រង និងអ្នកដឹកនាំលើទីលាន។ ដូច្នេះសម្រាប់យើង គំនិតនៃការរៀបចំនៅតែដដែល ព្រោះការលេងជាមួយក្រុមបែបនេះ អ្នកមិនអាចបន្ធូរបន្ថយសូម្បីតែពីរបីវិនាទីទេ ពួកគេនឹងដាក់ទោសអ្នក ហើយយើងក៏ដឹងរឿងនេះដែរ។»
សន្និសីទនេះក៏បានលើកដល់អវត្តមានរបស់ Moses ដោយលោក Oleg បានបញ្ជាក់ថា Moses អវត្តមានដោយមូលហេតុពិសេស ភរិយារបស់គាត់កំពុងសម្រាលកូន ហើយគ្រូកាយសម្បទាយើងម្នាក់ក៏អវត្តមានដោយមូលហេតុដូចគ្នានេះដែរ ដូច្នេះយើងចង់រៀបចំអំណោយពិសេសពីក្រុម ហើយអបអរពួកគេជាមួយជ័យជម្នះរបស់យើង។»
លោក Mathew McConkey គ្រូបង្វឹករបស់ក្រុមបាល់ទាត់ព្រះខ័នរាជស្វាយរៀង បានលើកឡើងថា ការប្រកួតនៅយប់នេះគឺកូនក្រុមត្រូវតែផ្កោតយកចិត្តទុកដាក់ក្នុងការលេងឲ្យល្អ លេងទៅតាមផែនការដែលបានរៀបចំទុក និងមិនអាចមើលស្រាលចំពោះក្រុមភ្ញៀវ Tampines Rovers FC មួយនេះបានឡើយ។
លោក Mathew បានឲ្យដឹងទៀតថា ការប្រកួតជាមួយក្រុមភ្ញៀវយប់នេះអាចជាការលំបាកមួយសម្រាប់ព្រះខ័នរាជស្វាយរៀង ព្រោះក្រុម Tampines Rovers FC មិនមែនជាក្រុមអន់នោះទេ និងពិបាកវាយតម្លៃទុកមុនចំពោះការលេងរបស់ពួកគេ។
គ្រូបង្វឹករូបនេះបន្ថែមថា បើនិយាយពីលទ្ធផលនៅជើងទី១ ក្រុមព្រះខ័នរាជស្វាយរៀង បានយកឈ្នះ និងរកបានគ្រាប់បាល់ជាច្រើនគ្រាប់ ប៉ុន្តែបើវិភាគចំពោះការលេងវិញ ឬមើលតាមទិន្ន័យជាក់ស្ដែងលើទីលានគឺមិនខុសគ្នាប៉ុន្មានឡើយ។ ដូច្នេះការប្រកួតយប់នេះកូនក្រុមរបស់លោកត្រូវយកចិត្តទុកដាក់ និងដោយការប្រុងប្រយ័ត្ន លេងឲ្យខ្លាំងអស់ពីសមត្ថភាពមិនថាការការពារ ការប្រជែងយកបាល់ នោះទេ។ ក្រុមត្រូវតែលេងតាមផែនការដែលបានរៀបចំទុករួចហើយដើម្បីឈានទៅដណ្ដើមជ័យជម្នះក្នុងការប្រកួតមួយនេះ។
រំលេកថា ការប្រកួតនៅជើងទី១ ភ្នំពេញក្រោន បានយកឈ្នះ Kichee SC ក្នុងលទ្ធផល ២-០ កាលពីថ្ងៃទី២៩ តុលា នៅពហុកីឡដ្ឋានមរតកតេជោ ខណ:ដែលព្រះខ័នរាជស្វាយរៀង បានយកឈ្នះ Tampines Rovers FC នៅទឹកដីសិង្ហបុរី ក្នុងលទ្ធផល ៥-១ កាលពីថ្ងៃទីទី២៩ តុលា នៅកីឡដ្ឋាន Jalan Besar។
សូមបញ្ជាក់ថា ភ្នំពេញក្រោន និងត្រូវជួបក្រុមម្ចាស់ផ្ទះហុងកុង Kichee SC ក្នុងការប្រកួតលើកទី៤ វគ្គសន្សំពិន្ទុពូល H នៃក្នុងការប្រកួតពានរង្វាន់លំដាប់ទី២នៅទ្វីបអាស៊ី គឺ AFC Champions League Two រដូវកាល ២០២៦-២៧ នៅកីឡដ្ឋាន Mong Kok Stadium ម៉ោង ៥:០០នាទីល្ងាច។ បច្ចុប្បន្ន ភ្នំពេញក្រោន កំពុងឈរលេខ១ មាន ៩ពិន្ទុ ក្រោយឈ្នះ ៣ប្រកួតជាប់គ្នា។
ក្រុមម្ចាស់ផ្ទះព្រះខ័នរាជស្វាយរៀង នឹងទទួលស្វាគមនក្រុមរបស់ម៉ាឡេស៊ី Tampines Rovers FC ក្នុងការប្រកួតលើកទី៤ វគ្គសន្សំពិន្ទុពូល G នៃក្នុងការប្រកួតពានរង្វាន់លំដាប់ទី២នៅទ្វីបអាស៊ី គឺ AFC Champions League Two រដូវកាល ២០២៦-២៧ នៅពហុកីឡដ្ឋានមរតកតេជោ ម៉ោង ៧:១៥នាទីយប់នេះ។ បច្ចុប្បន្ន ព្រះខ័នរាជស្វាយរៀង កំពុងឈរលេខ២ មាន ៤ពិន្ទុ ក្រោយឈ្នះ១ ស្មើ១ និងចាញ់ ១៕
