ប្រធានក្លិបបាល់ទាត់វិសាខា លោកជំទាវ កែ សួនសុភី នៅថ្ងៃទី១០ វិច្ឆិកានេះ បានបង្ហាញភាពមិនពេញចិត្តលើការកាត់សេចក្ដីរបស់អាជ្ញាកណ្តាលក្នុងការប្រកួតរវាង Angkor Tiger និង វិសាខា ដោយបានលើកឡើងថា ៖«ការចាញ់ដោយសមត្ថភាព យើង ទទួលយកបានដោយស្មារតីកីឡា ប៉ុន្តែការចាញ់ដោយសារភាពមិនប្រក្រតីនៃការកាត់សេចក្តី គឺពិត ជាពិបាកទទួលយកណាស់! ការសម្រេចចិត្តខ្វះភាពច្បាស់លាស់របស់ អាជ្ញាកណ្តាលក្នុង ការប្រកួត រវាង អង្គរថៃហ្គ័រ និង វិសាខា (3-1) បានជះឥទ្ធិពលយ៉ាងខ្លាំងដល់លទ្ធផលការប្រកួត»។
លោកជំទាវ កែ សួនសុភី បន្តថា៖ «បើស្ថានភាពបែបនេះនៅតែបន្ត កម្រិតបាល់ទាត់ជាតិ មិនត្រឹមតែមិនរីកចម្រើននោះទេ ថែមទាំងធ្វើឱ្យបាត់បង់ទំនុកចិត្តពីអ្នកគាំទ្រ និងធ្វើឱ្យអ្នកវិនិយោគ លែង មានទឹកចិត្តបន្តការបោះទុនគាំទ្រវិស័យនេះទៀតផង។ សូមមេត្តាពិនិត្យ និងកែលម្អគុណភាព អាជ្ញា កណ្តាលដើម្បីភាពយុត្តិធម៌ និងការអភិវឌ្ឍពិតប្រាកដនៃបាល់ទាត់ជាតិ!»។
លោកជំទាវប្រធានក្លិបបាល់ទាត់វិសាខា បានបន្ថែមថា៖ «ការលះបង់អស់រយៈពេលជាង១០ឆ្នាំមកនេះ គឺមិនដែលទទួលបានប្រាក់ចំណេញ សូម្បីតែមួយ ដុល្លារឡើយ ហើយស្ថានភាពនៃក្លឹបបាល់ទាត់ដទៃទៀតក៏មិនខុសគ្នាដែរ។»
គួរបញ្ជាក់ថា ការលើកឡើងរបស់ប្រធានក្លិបបាល់ទាត់វិសាខា លោកជំទាវ កែ សួនសុភី បន្ទាប់ពីមានមតិរិះគនជាច្រើនជុំការដឹកនាំរបស់លោកអាជ្ញាកណ្ដាល ក្នុងការប្រកួតប្រកួតរវាងក្លិបបាល់ទាត់អង្គរថាយហ្គឺរ ជាមួយវិសាខា ដោយបញ្ចប់ទៅក្នុងលទ្ធផល ៣-១ កាលពីថ្ងៃទី៨ ខែវិច្ឆិកា ឆ្នាំ២០២៦ សម្រាប់សប្ដាហ៍ទី៧ នៃពានរង្វាន់លីគកំពូលកម្ពុជា រដូវកាលឆ្នាំ២០២៦/២៧៕
