នៅ យប់ថ្ងៃទី ១០ ខែធ្នូ យប់មិញនេះ វេទិកាប្រកួត Miss Universe Cambodia បានឈានដល់វគ្គប្រកួតបឋមឬវគ្គណែនាំខ្លួន និង បង្ហាញប្រកួតឈុតតំណាងជាតិ។ នៅ លើវេទិកានោះ បវរកញ្ញា ងិន ម៉ារ៉ាឌី បានគ្រងឈុត «វប្បការិកា ចត្វានិមិត្ត» យ៉ាងស្រស់សោភា បង្អូតសម្រស់ឱ្យមហាជនជាអ្នកគាំទ្របានទស្សនា។ នៅ ក្នុងការបង្ហាញលើវេទិកាលំដាប់ពិភពលោកនេះ សម្រាប់ ម៉ារ៉ាឌី ពិតជាគួរឱ្យសរសើរខ្លាំងណាស់ ទាំងការតុបតែងខ្លួន ទាំងដំណើរ ទាំងកាយវិការនៅ លើឆាក គឺល្អស្រស់ទាំងព្រម ធ្វើឱ្យអ្នកគាំទ្ររបស់បវរកញ្ញារូបនេះ កោតស្ញប់ស្ញែងខ្លាំងមែនទែន។
យប់មិញអ្នកគាំទ្របានឃើញហើយថាកញ្ញា ងិន ម៉ារ៉ាឌី បានព្យាយាមក្រសោបឈុតដោយដៃទាំងសងខាង នៅ ពេលមានបញ្ហាបន្តិចបន្តួចបានកើតឡើងនៅលើឆាកប្រកួត ដោយមិនបង្ហាញនូវភាពតក់ស្លុត និងបាត់បង់ម្ចាស់ការចំពោះខ្លួនឯងឡើយ ដែលធ្វើឱ្យអ្នកគាំទ្រមានក្ដីរំភើបយ៉ាងខ្លាំងចំពោះបេក្ខនារីតំណាងប្រទេសកម្ពុជារូបនេះ។
ក្រៅពីកោតសរសើរចំពោះបវរកញ្ញារបស់ខ្លួនហើយនោះ អ្នកគាំទ្រក៏មិនភ្លេចថ្លែងអំណរគុណ និងអរគុណទឹកចិត្តរបស់ក្រុមការងាររៀបចំកម្មវិធីប្រកួតនៅប្រទេសអ៊ីស្រាអែលឡើយ ព្រោះអ្នកទាំងនោះបានព្យាយាមជួយសម្រួលដល់បវរកញ្ញាកម្ពុជាឱ្យបញ្ចប់នូវការដើរបង្ហាញឈុតតំណាងជាតិរបស់ខ្លួនដោយជោគជ័យ។
ទង្វើដ៏ល្អរបស់ក្រុមការងារនេះ ឆក់បានបេះដូងមហាជនកម្ពុជាឱ្យរំភើបនិងរីករាយជាពន់ពេកដែលបវរកញ្ញាកម្ពុជាត្រូវបានក្រុមការងារផ្ដល់នូវសារសំខាន់និងយកចិត្តទុកដាក់ ជាងនោះទៀតអ្នកគាំទ្រក៏មិនភ្លចអរគុណចំពោះទង្វើដ៏ល្អមកលើបវរកញ្ញាកម្ពុជា ងិន ម៉ារ៉ាឌី នោះឡើយ។
ក្រោយហេតុការណ៍ភ្លាត់ស្នៀតដោយសារបញ្ហាបច្ចេកទេសនេះ មហាជននៅ តែបន្តជជែកវែកញែកគ្នាជាបន្តទៀតនៅលើបណ្ដាញសង្គម ដោយភាគច្រើនបានបន្តចូលមកសរសើរចំពោះស្រីតូចច្រឡឹងរូបនេះថា ពិតជាស័ក្ដិសមជាបេក្ខនារីតំណាងជាតិព្រោះកញ្ញាមានជំហររឹងមាំល្អ មិនភ័យតក់ស្លុត ឆោឡោ ហើយថែមទាំងនៅ តែរក្សាបាននូវស្នាមញញឹម ដែលជាអត្តសញ្ញាណមួយនៃជនជាតិខ្មែរ ដែលមានស្នាមញញឹមប្រកបដោយមេត្រីភាពចំពោះមនុស្សនៅ ជុំវិញខ្លួនជានិច្ច មិនថានៅ ក្នុងកាលៈទេសៈណាមួយឡើយ។
បញ្ហាដែលកើតឡើងខាងលើនេះគឺជាគំរូ និងជាបទពិសោធន៍ល្អមួយដែលបវរកញ្ញាគ្រប់រូបគួរតែកុំមើលរំលឹង ព្រោះហេតុការណ៍នឹកស្មានមិនដល់អាចកើតឡើងជានិច្ច ដូច្នេះបើទោះជាស្ថិតនៅក្នុងស្ថានការណ៍បែបណាក៏ដោយ បវរកញ្ញាទាំងអស់ត្រូវតែចេះដោះស្រាយឱ្យបានគ្រប់ស្ថានការណ៍ និងចេះគ្រប់គ្រងអារម្មណ៍ កែខៃស្ថានការណ៍ឱ្យបានប្រសើរឡើងវិញភ្លាម។ សម្រាប់ហេតុការណ៍យប់មិញនេះ បវរកញ្ញាចក្រវាឡកម្ពុជាគឺតែត្រូវបានសរសើរនិងទទួកបានពិន្ទុពេញ ព្រោះក្នុងឋានៈជាបវរកញ្ញាមួយរូប កញ្ញាចេះបត់បែនបានគ្រប់ស្ថានភាព។
ជាចុងក្រោយ ពីក្រុមសារព័ត៌មានត្រយងផ្នែកសិល្បៈកម្សាន្ដ យើងនៅតែបន្ដលើកទឹកចិត្ត និងជាកម្លាំងចិត្តដល់បវរកញ្ញា ងិន ម៉ារ៉ាឌី និងបវរកញ្ញាកម្ពុជាគ្រប់រូប ក្នុងការលើកស្ទួយមុខមាត់ជាតិ សិល្បៈជាតិ តាមរយៈវេទិកាប្រកួតសម្រស់លំដាប់អន្តរជាតិជាច្រើនទៀត៕