សមាគមវៀតណាមនៅកម្ពុជា បានចេញសេចក្ដីជូនដំណឹងដល់ប្រជាពលរដ្ឋរបស់ខ្លួនដែលរស់នៅតាមដងទន្លៃ ឲ្យគោរពតាមការណែនាំរបស់សាលារាជធានីភ្នំពេញ ក្នុងការរុះរើដោយស្ម័គ្រចិត្ត និងកុំផ្លាស់ទីទៅប្រទេសវៀតណាម ព្រោះតែស្ថានភាពកូវីដ១៩។
ការជូនដំណឹងខាងលើនេះ ធ្វើឡើងស្របពេលម្ចាស់បែចិញ្ចឹមត្រី ផ្ទះបណ្តែតទឹក និងសំណង់គ្មានសណ្តាប់ធ្នាប់នៅក្នុងតំបន់មិនរៀបរយជាច្រើន លើផ្ទៃទឹកក្នុងមូលដ្ឋានខណ្ឌជាប់ព្រំប្រទល់ទន្លេទាំង៧ រួមមាន ខណ្ឌព្រែកព្នៅ ជ្រោយចង្វារ ឫស្សីកែវ ដូនពេញ ចំការមន ច្បារអំពៅ និងខណ្ឌមានជ័យ ត្រូវបានម្ចាស់រុះរើ និងខ្លះទៀតបានចល័តចេញដោយស្ម័គ្រចិត្ត គិតចាប់ពីថ្ងៃដែលរដ្ឋបាលរាជធានីភ្នំពេញ ចេញសេចក្តីជូនដំណឹងកាលពីថ្ងៃទី០២ ខែមិថុនា ឆ្នាំ២០២១ និងកំពុងរើចេញជាបន្តបន្ទាប់។
សមាគមវៀតណាម នៅកម្ពុជា ចេញសេចក្តីប្រកាសមិនឲ្យជនជាតិវៀតណាម វិលត្រឡប់ទៅប្រទេសវៀតណាម និងពលរដ្ឋវៀតណាម ដែលកំពុងត្រូវបានផ្លាស់ទីលំនៅ ចំនួន៦ខណ្ឌ ក្នុងរាជធានីភ្នំពេញ ឲ្យស្នាក់នៅនឹងកន្លែង និងមិនត្រូវផ្លាស់ទីផ្ទះបណ្ដែតទឹក ផ្ទះទូក និងក្បូន ទៅប្រទេសវៀតណាម នៅពេលនេះ ពីព្រោះច្រកទ្វារព្រំដែនវៀតណាម ត្រូវបានបិទ និងមិនអនុញ្ញាតឲ្យមនុស្សចេញចូលប្រទេសវៀតណាម ឡើយ ដោយសារតែស្ថានភាពនៃការរីករាលដាលជំងឺ Covid-19 នៅក្នុងប្រទេសរបស់ខ្លួន ។
សេចក្តីប្រកាសដដែល បានបញ្ជាក់ថា សមាគមបានធ្វើការជាមួយអាជ្ញាធរ ហើយអាជ្ញាធរក៏បានសម្រួលដល់ប្រជាពលរដ្ឋវៀតណាម ដែលត្រូវបានផ្លាស់ប្តូរលំនៅដា្ឋន នៅតាមដងទន្លេក្នុងភូមិសាស្ត្ររាជធានីភ្នំពេញ នោះ។ ដូច្នេះ សមាគម ស្នើដល់ពួកគេ ត្រូវគោរពទៅតាមគោលការណ៍របស់អាជ្ញាធររាជធានីភ្នំពេញ ដោយស្ម័គ្រចិត្ត និងរើទៅចតនៅទីតាំងថ្មី ដែលកំណត់ដោយអាជ្ញា នៅក្នុងភូមិក្រួស សង្កាត់សំរោង ខណ្ឌព្រែកព្នៅ ៕
