ក្រោយការប្រកួតលីគកំពូលកម្ពុជា Cambodian Premier League និងពានរង្វាន់លីគទី២ Cambodian League 2 រដូវកាលឆ្នាំ២០២២ នេះមានការប្រកួតប្រជែងដូចគ្នារហូតដល់សប្ដាហ៍ចុងក្រោយ លោក ទុំ សារ៉ាយ គ្រូបង្វឹកក្រុមអគ្គីសនីកម្ពុជា ម្ចាស់ជើងឯកពានរង្វាន់លីគទី២ បានបង្ហាញទស្សនៈរបស់ខ្លួនមួយចំនួនពីវិស័យបាល់ទាត់បច្ចុប្បន្ន។
អតីតសមាជិកក្រុមជម្រើសជាតិកម្ពុជា បច្ចុប្បន្នជាគ្រូធំនៅក្រុមអគ្គសនីកម្ពុជា បានសរសេរខ្លឹមសារលើហ្វេសប៊ុករបស់ខ្លួនក្រោយសប្ដាហ៍រន្ធត់នៃពានរង្វាន់ CPL 2022 បញ្ចប់ចុងសប្ដាហ៍ថ្មីៗថា៖«ពិតជាមិននឹកស្មាន ទាំងលីគកំពូលនិងលីគទី2 ធ្វើអោយអ្នកតាមដាននិងទស្សនាបុកពោះមែនទែន មិនមែនជាការរៀបចំទេតែជាការខំប្រឹងប្រែងពីថ្នាក់ដឹកនាំ ក្រុមការងារគ្រូៗ ឆន្ទៈរបស់កីឡាករទាំងអស់ និងការចូលរួមលើកទឹកចិត្តពីអ្នកគាំទ្រក្រុមនីមួយៗយ៉ាងច្រើនកុះករ»។
អត្ថបទពាក់ព័ន្ធ៖ហេតុអ្វីបានជាអគ្គីសនីកម្ពុជា លើកពានរង្វាន់លីគទី២?
សូមបញ្ជាក់ថាមុនការបញ្ចប់រដូវកាលរបស់ខ្លួនកាលពីពេលថ្មីៗ ក្នុងពានរង្វាន់លីគទី២ ឆ្នាំ២០២២ មានក្រុមចំនួន៣បានប្រកួតប្រជែងគ្នារហូតដល់សប្ដាហ៍ចុងក្រោយគឺក្រុមជើងឯកអគ្គីសនីកម្ពុជា ក្រុម អាយ.អេស.អាយ ដង្កោសែនជ័យ និងក្រុមអគ្គស្នងការដ្ឋាននគរបាលជាតិ។
ចំណែកពេលនេះនៅក្នុងពានរង្វាន់លីគកំពូលកម្ពុជា វិញមានក្រុមចំនួន៣ដែលត្រូវប្រកួតប្រែងគ្នាធ្វើជាម្ចាស់ជើងឯកប្រចាំរដូវកាលឆ្នាំ២០២២ នេះផងដែរ ក្រោយមានពិន្ទុចំនួន៤៩ស្មើគ្នា ក្នុងនោះមានក្រុមភ្នំពេញក្រោន, វិសាខា និងព្រះខ័នរាជស្វាយរៀង។
អត្ថបទពាក់ព័ន្ធ៖ក្រុមអគ្គីសនីកម្ពុជា ដែលប្រើប្រាស់កីឡាករខ្មែរសុទ្ធជាក្រុមទី៥ ឈ្នះជើងឯកលីគទី២កម្ពុជា
ដូច្នេះលទ្ធផលត្រូវរង់ចាំអ៊ុតក្នុងប្រកួតសប្ដាហ៍ទី២៧ ចុងក្រោយនៅថ្ងៃទី៣ ខែធ្នូ ឆ្នាំ២០២២ ដោយក្រុមភ្នំពេញក្រោន ប៉ះ បឹងកេត លើទីលានកីឡដ្ឋាន Smart RSN និងក្រុមព្រះខ័នរាជស្វាយរៀង ប៉ះវិសាខា នៅកីឡដ្ឋានខេត្តស្វាយរៀង។
បន្ថែមពីលើនេះ បុរសដែលធ្លាប់ប្រកបអាជីពនៅក្លិបព្រះខ័នរាជស្វាយរៀង និងណាហ្គាវើល កាលនៅជាកីឡាករ ខាងលើបានបន្ថែមថា៖«បាល់ទាត់ប្រទេសយើងចាប់ផ្តើមមានការប្រកួតប្រជែងខ្លាំងហើយសូមកីឡាករទាំងអស់ខំប្រឹងប្រែងឡើងដើម្បីអនាគតខ្លួនឯងហើយត្រូវរៀបចំខ្លួនឯងអោយដូចជាកីឡាករអាជីពបណ្តើរៗទៅ។ សូមអរគុណ ហើយសូមទោសបើមាននិយាយខុស»៕
អត្ថបទពាក់ព័ន្ធ៖Fan និយាយពីក្រុមនៅលីគទី២ អាចឡើងទៅលីគកំពូលរដូវកាលក្រោយ
