អ្នកស្រីអាជ្ញាកណ្តាល Stéphanie Frappart សញ្ជាតិបារាំង បានកែប្រែប្រវត្តិសាស្រ្តរយ:ពេល ៩២ ឆ្នាំចុងក្រោយ ក្នុងពានរង្វាន់ FIFA World Cup 2022 នៅកាតា ដោយបានបង្ហាញខ្លួនជាអាជ្ញាកណ្តាលកាន់កញ្ចែលើទីលានក្នុងជំនួបចុងក្រោយនៃជម្រុះពូល E រវាងក្រុមជម្រើសជាតិអាល្លឺម៉ង់ ទល់នឹង កូស្តារីកា នាពេលថ្មីៗនេះ។
សម្រាប់លោកស្រី Stephanie Frappart បានក្លាយជាស្ត្រីដំបូងគេដែលជាអាជ្ញាកណ្តាលការប្រកួតលីគបារាំង Ligue 1 ក្នុងឆ្នាំ២០១៩ និងជាស្ត្រីដំបូងគេដែលដឹកនាំការប្រកួតក្នុងក្របខ័ណ្ឌពានរង្វាន់ទ្វីបអឺរ៉ុប Champions League ផ្នែកបុរសក្នុងឆ្នាំ២០២០ ហើយកាលពីឆ្នាំមុន នាងបានក្លាយជាស្ត្រីដំបូងគេដែលទទួលបន្ទុកការប្រកួតជម្រុះ World Cup ផ្នែកបុរសទៀតផង។
គួរបញ្ជាក់ដែលថា សម្រាប់អាជ្ញាកណ្តាលដែលធ្វើដំណើរទៅចូលរួមក្នុងព្រឹត្តិការណ៏ FIFA World Cup ឆ្នាំ២០២២ នៅប្រទេស មកពីជុំវិញពិភពលោកមានចំនួន១២៩ នាក់ ក្នុងនោះមាន ៣៦នាក់ ជាអាជ្ញាកណ្តាលលើទីលាន ៦៩នាក់ ជាអាជ្ញាកណ្តាលខ្សែបន្ទាត់ និង ២៤នាក់ជាជំនួយការអាជ្ញាកណ្តាលផ្នែកវីដេអូ ខណៈក្នុងចំណោមនោះមានតែ ៣នាក់តែប៉ុណ្ណោះជាអាជ្ញាកណ្តាលស្រ្តី៕