សិល្បៈជាតិ: ករណីដ៏កក្រើកបណ្ដាញសង្គម និងមានការចូលរួមឈឺឆ្អាលស្រែករកយុត្តិធម៌ឲ្យជនរងគ្រោះ មិនត្រឹមតែបងប្អូនប្រជាជននោះឡើយ សូម្បីតារា សិល្បករដូចជាអ្នកនាង ទូច ស្រីល័ក្ខ និង កញ្ញា វ៉ាន់ នីឡា ក៏ចូលរួមទាមទារហើយសំណូមពរដល់មេធាវីសម្ដេចតេជោឲ្យជួយករណីនេះដែរ។
រឿងហេតុដែលកំពុងស្ថិតក្នុងការតាមដានដ៏យកចិត្តទុកដាក់នេះប្រហែលជាមិនអាចបញ្ចប់ត្រឹមសំណងជំងឺចិត្ត២៥០០ដុល្លារ ឬប្រមាណជាង១០លានរៀលនោះឡើយ។ គេមើលឃើញថារាល់ការផុស ដែលទាក់ទងនឹងករណីនេះត្រូវបានអ្នកប្រើប្រាស់បណ្ដាញសង្គមពួតដៃសហការគ្នា Like Share និង Comment យ៉ាងភ្លូកទឹកភ្លូកដី។
ក្នុងចំណោមនោះមហាជនសង្កេតឃើញសិល្បការិនី២រូបដែលមានការយល់ឃើញប្រហាក់ប្រហែលគ្នានោះគឺសូមឲ្យមេធាវីសម្តេចតេជោ ហ៊ុន សែន ជួយលូកដៃក្នុងរឿងនេះ ត្បិតអីជនរងគ្រោះមានជីវភាពខ្សត់ក្សោយ និង ក្រីក្រ។
អ្នកនាង ទូច ស្រីល័ក្ខបានបង្ហាញការយល់ឃើញរបស់ខ្លួននាថ្ងៃនេះថា៖ ជាការពិតដែរឬទេ? បេីកបរដេាយមានជាតិស្រវឹងជេាគជាំដេាយគ្មានភាពទទួលខុសត្រូវសំដីនិងចរិតក្អេងក្អាងមិនខ្លាច និងគេារពច្បាប់នៅក្នុងប្រទេសសូម្បីតែបន្តិច បានលឺថាបង់ជាសំណងអេាយគ្រួសារដេាយគ្មានកំហុសត្រូវបានជនបង្ករបានយកលុយបង់តែ 2500$រួចបញ្ចប់ក្តី ?
ជនរងគ្រោះមួយគ្រួសារមិនទាន់ដឹងថាទារកដ៏តូចថាគ្នារស់នៅក្នុងសភាពបែបណានោះទេ រីឯម្តាយគ្រួសារក្មេងតូចម្នាក់នេះកំពុងឋិតនៅក្នុងមន្ទីពេទ្យ(ជីវិតមនុស្សបីនាក់ )។
នាងខ្ញុំសូមអំពាវនាដល់ក្រុមមេធាវីស្ម័គ្រចិត្តសម្តេចតេជេាមេត្តាជួយរកយុត្តិធម៌ដល់គ្រួសាររបស់ទារកក្មេងដ៏កំម្សត់នេះផង។ ប្រទេសមានច្បាប់ សូមអស់លេាកមួយចំនួនតូចបេីកបរក្នុងស្ថានភាពស្រវឹងមេត្តាទទួលទានស្រាដេាយភាពទទួលខុសត្រូវផង)។
ចំណែកកញ្ញា វ៉ាន់ នីឡា វិញក៏មិនខុសពីសិល្បការិនីរៀមច្បងដែរ ដោយកញ្ញាបានបញ្ចេញមតិយោបល់ និង លើកជាសំណូមពរយ៉ាងដូច្នេះថា៖ មានមិត្តភក្តប្រាប់មិនអោយខ្ញុំរវល់ទេ ខ្លាចបាត់ប្រជាប្រិយភាព ខ្ញុំអត់ខ្វល់ទេ ខ្ញុំមិនអាចធ្មេចភ្នែកឃើញរឿងដ៏សោកសៅនិងអយុត្តិធម៌បែបនេះបាន . សូមបងប្អូនទាំងអស់គ្នាជួយ share ចំពោះករណីនេះ
-ស្រវឹងហើយបើកបរ គឺខុសច្បាប់មួយតង់ហើយ
-ទីពីរ បើកលើសល្បឿន
-ទីបីបើករត់
-ទីបួន កោងកាងដាក់អ្នកកាស្សែតចង់វៃគេ
-ទីប្រាំ សងជំងឺចិត្ត 2500$ បញ្ចប់រឿង
សួរវិញថា ចុះជីវិតក្មេង ? សូមប៉ូលីសជួយបកស្រាយ។ សូមសំណូមពរដល់ ក្រុមមេធាវីស្ម័គ្រចិត្តសម្តេចតេជោសែន ក្រសួងយុត្តិធម៌ Ministry of Justice មេត្តាជួយអន្តរាគមន៍នឹងរកយុត្តិធម៌ជូនជនរងគ្រោះ ជាពិសេសទារកដែលមិនដឹងថាអាចនឹងមានជីវិតរឺអត់។
ចំពោះមតិលើកឡើងរបស់កញ្ញាក៏ត្រូវបានរដ្ឋមន្ត្រក្រសួងព័ត៌មានចាប់អារម្មណ៍ និង ចែករំលែកបន្ត ព្រមទឆំងក្រើនរំលឹកដល់សមត្ថកិច្ចនគរបាលឲ្យមានការបកស្រាយចំពោះករណីដ៏រសើបនេះដែរ។
ករណីនេះប្រសិនបើសមត្ថកិច្ចនគរបាល ឬសមត្ថកិច្ចពាក់ព័ន្ធមិនអាចផ្ដល់នូវសេចក្ដីបំភ្លឺ មួយច្បាស់លាស់ ឬចាត់ការតាមនីតិវិធីឱ្យបានត្រឹមត្រូវទេនោះ ពិតណាស់សាធារណជន និង អស់ជំនឿលើច្បាប់ ក៏ដូចជាមន្ត្រីដែលគេចាត់ទុកថាជាអ្នកបម្រើរាស្ត្រ៕
