សិល្បៈជាតិ៖ សំឡេងងឺតងតៗជាសូរសម្រឹបជើងអ្នកធាក់ស៊ីក្លូកាលពី២០ឆ្នាំមុន បានជំរុញឱ្យមានកម្មវិធីបេសកកម្ម «ដើម្បីអ្នក» នេះធ្វើឡើង ដើម្បីចូលរួមបំផុតគំនិតអភិរក្ស និងគាំពារសេវាដឹកជញ្ជូន និងជាមធ្យោបាយធ្វើដំណើរដ៏មានវ័យចំណាស់មួយនៅកម្ពុជា។
នៅថ្ងៃទី ៧ ខែធ្នូ ឆ្នាំ ២០២២នេះ ផ្សារទំនើបសូរិយាបានរៀបចំកម្មវិធីបេសកកម្ម «ដើម្បីអ្នក» ជាការចូលរួមចែកអំណោយជូនដល់លោកតាស៊ីក្លូចាស់ជរាប្រមាណាជាង ១៥០ នាក់នៅប្រទេសកម្ពុជាក្នុងគោលបំណងអភិរក្ស និងគាំពារស៊ីក្លូជាអត្តសញ្ញាណជាតិខ្មែរ។
យើងដឹងហើយថា ស៊ីក្លូធ្លាប់ជាសេវាដឹកជញ្ជូនដ៏ពេញនិយមមួយនៅទីក្រុងភ្នំពេញកាលពីសម័យដើម។ សព្វថ្ងៃនេះ មុខរបរធ្លាក់ស៊ីក្លូដែលមិនប៉ះពាល់ដល់បរិស្ថាននេះស្ទើរតែបាត់បង់ម្ដងៗទៅហើយ ដោយមានគូប្រជែងដូចជា ម៉ូតូឌុបនិងម៉ូតូកង់បី និងវិបត្តនៃជំងឺកូវីដ១៩ ដែលបាត់បង់ចំនួនភ្ញៀវទេសចរណ៍ជាច្រើនមកកម្សាន្តនៅទីក្រុងភ្នំពេញ។
ជាការពិតណាស់ស៊ីក្លូត្រូវបានប្រើប្រាស់ជាមធ្យោបាយដឹកជញ្ជូននិងធ្វើដំណើរនៅក្នុងប្រទេសកម្ពុជាយើងលើកដំបូងក្នុងឆ្នាំ១៩៣៦ សម័យអាណានិគមបារាំងស្រករគ្នានឹងរ៉ឺម៉កប្រើកម្លាំងជើងដែរ។ ដោយសារប្រទេសយើងកាន់តែទំនើប គ្រប់គ្នាមានឡាន ម៉ូតូ កង់ ជាយាន្តជំនិះ ជំនួសការជិះស៊ីក្លូ រហូតដល់សព្វថ្ងៃនេះមិនសូវមានអ្នកហៅស៊ីក្លូវជិះប៉ុន្មានទេ។ ទើបសមាគមអភិរក្សស៊ីក្លូ និងមុខរបរក្រៅប្រព័ន្ធ បានធ្វើការងារគាំពារស៊ីក្លូខ្មែរតាមរយៈ សេវាទេសចរណ៍ ស៊ីក្លូទេសចរណ៍ ដើម្បីឱ្យអ្នកធាក់ស៊ីក្លូមានចំណូលឡើងវិញ។
លោកស្រី លោកស្រី ជា សុខហៀក បច្ចុប្បន្នជាអគ្គនាយិកាផ្សារទំនើបសូរិយា Center Point ផ្សារទំនើបរតនាផ្លាហ្សា និងជាអគ្គនាយកនៃផ្សារទំនើបអូឡាំព្យា បានលើកឡើងថា ការធ្វើកម្មវិធីបេសកកម្ម «ដើម្បីអ្នក» ជាកម្មវិធីសប្បុរសធម៌មួយ ដែលប្រមូលនូវរបស់របរចាស់ៗមនុស្សឈប់ប្រើប្រាស់ មកច្នៃប្រឌិត និងបរិច្ចាគជូន អ៊ំៗពូៗធ្លាក់ស៊ីក្លូ។ កម្មវិធីនេះជាផ្នែកមួយនៃការរួមចំណែកថែរក្សាបរិស្ថាន និងជាសកម្មភាពផ្សាភ្ជាប់ជាមួយការផ្សព្វផ្សាយវប្បធម៌។
លោកស្រីបន្តថា កាលពី ២០ឆ្នាំមុន លោកស្រីធ្លាប់អាស្រ័យមធ្យោបាយស៊ីក្លូធ្វើដំណើរទៅសាលា និងផ្សារជាដើម។ លោកស្រីមិនចង់ឃើញស៊ីក្លូខ្មែរយើងបាត់បង់អ្នកគាំទ្រពីមួយថ្ងៃទៅមួយថ្ងៃនោះទេ។ បេសកកម្ម «ដើម្បីអ្នក» គឺជាផ្នែកចូលរួមចំណែកបំផុសគំនិតអភិរក្ស និងគាំពារស៊ីក្លូខ្មែរ ដែលអ្នកប្រកបអាជីពនេះកំពុងតែរស់នៅមានជីវភាពត្រដាបត្រដួស។ លោកស្រីអំពាវនាវឱ្យក្រុមហ៊ុន App ទូរស័ព្ទដៃប្រើប្រាស់ការហៅមធ្យោបាយធ្វើដំណើរ ជួយសម្លឹងឃើញពីស៊ីក្លូរបស់ខ្មែរយើង ព្រោះបើគ្មានអ្នកហៅជិះទេ ស៊ីក្លូខ្មែរយើងនឹងបាត់បង់នៅថ្ងៃណាមួយជាក់ជាមិនខាន។
លោកស្រីអរគុណដល់អ្នកសប្បុរសធម៌ និងអ្នកឧបត្ថម្ភទាំងអស់ដែលបានរួមចំណែកក្នុងកម្មវិធី បេសកកម្ម «ដើម្បីអ្នក» ហើយកម្មវិធីនេះមិនបិទបញ្ចប់ត្រឹមនេះទេ យើងនឹងបន្តធ្វើនៅឆ្នាំក្រោយៗថែមទៀត ដើម្បីបំពេញតម្រូវការអ្នកដែលកំពុងខ្វះខាតពិតៗឱ្យទទួលបានអំណោយសប្បុរសធម៌នេះ។
