សមាជិករបស់ក្រុម Real Madrid ខ្សែប្រយុទ្ធ Eden Hazard បានប្រកាសចូលនិវត្តន៍ពីក្រុមជម្រើសជាតិបែលហ្ស៊ិក ក្នុងវ័យ៣១ឆ្នាំ បន្ទាប់ពីធ្លាក់ចេញត្រឹមវគ្គចែកពូល នៃព្រឹត្តិការណ៍បាល់ទាត់ពិភពលោក FIFA World Cup 2022 នៅប្រទេសកាតា។
Eden Hazard បានថ្លែងដូច្នេះថា៖«សូមអរគុណ ចំពោះការគាំទ្រ សម្រាប់សេចក្ដីរីករាយទាំងអស់ ដែលបានចែករំលែកជាមួយគ្នា តាំងពីឆ្នាំ២០០៨ មក។ ខ្ញុំបានសម្រេចចិត្តបញ្ចប់អាជីពអន្តរជាតិរបស់ខ្ញុំហើយ។ កិច្ចការបន្ទាប់ គឺត្រៀមរួចរាល់ហើយ។ ខ្ញុំនឹងនឹកអ្នកទាំងអស់គ្នាជាមិនខាន»។
ក្រុមជម្រើសជាតិបែលហ្ស៊ិកបានបង្ហោះសារថា៖«សូមសំណាងល្អ! ប្រធានក្រុម»។
កីឡាករ Hazard ដែលលេងជាខ្សែបម្រើប្រយុទ្ធ ដោយបង្ហាញខ្លួនលើកដំបូងឱ្យក្រុមបែលហ្ស៊ិក ក្នុងឆ្នាំ២០០៨ ក្នុងនាមជាកីឡាករវ័យក្មេងម្នាក់ ហើយរូបគេបង្ហាញខ្លួននៅជម្រើសជាតិ ចំនួន១២៦ដង ដោយស៊ុតបញ្ចូលទីបាន ៣៣គ្រាប់ និងបញ្ជូនបាល់មិត្តរួមក្រុមស៊ុតបញ្ចូលទី ៣៦ដង។
រឿងរ៉ាវគ្រប់យ៉ាងកើតឡើងបន្ទាប់ពីក្រុមជម្រើសជាតិបែលហ្ស៊ិក ធ្លាក់ចេញត្រឹមវគ្គជម្រុះក្នុងពូល World Cup 2022 ជាលើកដំបូងក្នុងរយ:ពេល១៤ឆ្នាំ ពោលគឺចាប់តាំងពីឆ្នាំ១៩៩៨។
ភ្លាមៗក្រោយការប្រកួតលោក Roberto Martinez គ្រូបង្វឹក បែលហ្ស៊ិក បានលាឈប់ពីតួនាទីជាគ្រូបង្គោលជម្រើសជាតិបែលហ្ស៊ិក ក្រោយក្រុមនេះធ្លាក់ត្រឹមវគ្គចែកពូល FIFA World Cup 2022៕