វគ្គជម្រុះបាល់បោះជើងឯកប្រចាំទ្វីបអាស៊ី 2021 FIBA Asia Cup ពូល A និង B កំពុងតែធ្វើនៅ AUF Sports and Cultural Center ក្នុងទីក្រុង Angeles នៃខេត្តPampanga ប្រទេសហ្វីលីពីន ខណៈក្រុមម្ចាស់ផ្ទះហ្វីលីពីន បានប្រកួតឈ្នះក្រុមកូរ៉េខាងត្បូង ទាំងប្រផុតប្រផើយនៅចុងម៉ោង ដោយលទ្ធផល ៨១ទល់៧៨។
10.5 CRAZY seconds! #FIBAAsiaCup 2021 Qualifiers pic.twitter.com/CYaL1WUA7H
— 🏀FIBA Asia Cup (@FIBAAsiaCup) June 16, 2021
ចំពោះចំណាត់ថ្នាក់បណ្ដោះអាសន្នក្នុងពូល A នេះមានហ្វីលីពីន ឈរលេខ១កាន់៨ពិន្ទុ ក្រុមកូរ៉េខាងត្បូង លេខ២កាន់៥ពិន្ទុ ឥណ្ឌូណេស៊ី លេខ៣កាន់៤ពិន្ទុ ស្មើគ្នានឹងក្រុមបាតតារាងថៃ។
ចំណែកកម្មវិធីប្រកួតនៅថ្ងៃព្រហស្បត្តិ៍ ទី១៧ ខែមិថុនា ឆ្នាំ២០២១ នេះវិញ៖
ពូល A៖កូរ៉េខាងត្បូង ប៉ះ ឥណ្ឌូណេស៊ី ម៉ោង១:៣០នាទីរសៀល
ពូល B៖តៃវ៉ាន់ ប៉ះចិន ម៉ោង៥ល្ងាច
ហ្វីលីពីន ទទួលធ្វើជាម្ចាស់ផ្ទះក្នុងវគ្គជម្រុះពូល A និង B ដែលនៅសេសសល់ ក្នុងពាន 2021 FIBA Asia Cup ស្របពេលដែលក្រុមលេខ១ និងលេខ២ មានឈ្មោះទៅប្រកួតជុំចុងក្រោយវគ្គ១៦ក្រុម នៅទីក្រុងហ្សាកាតា ប្រទេសឥណ្ឌូណេស៊ី ចន្លោះថ្ងៃទី១៦ ដល់២៨ខែសីហា ឆ្នាំ២០២១ខាងមុខ។ ចំណែកក្រុមលេខ៣តាមពូលនីមួយៗមានឈ្មោះឡើងទៅជម្រុះជុំបន្តមួយទៀតដើម្បីស្វែងរកកៅអីទៅបង្គ្រប់។
ជាមួយគ្នានេះដែរក៏រកឃើញក្រុមកក់កៅអីឡើងទៅ 2021 FIBA Asia Cup មុនគេបណ្តើរៗហើយក្នុងនោះមានក្រុមលីបង់ និងបារ៉ែន ជាជើងខ្លាំងមកពីពូល D អ៊ីរ៉ង់ និងស៊ីរី មកពីពូល E កាហ្សាស្ថាន និងស៊ីរី មកពូល F។
ពានរង្វាន់បាល់បោះជើងឯកប្រចាំទ្វីបធ្វើឡើងនៅរាល់២ឆ្នាំម្តង គិតចាប់តាំងពីឆ្នាំ១៩៦០ មកម៉្លេះ ស្របពេលក្រុមចិន ឈ្នះជើងឯកបាន១៦លើក ច្រើនជាងគេ ហើយហ្វីលីពីន ឈ្នះ៥លើក អ៊ីរ៉ង់ ឈ្នះ៣លើក កូរ៉េខាងត្បូងនិងជប៉ុន ឈ្នះម្នាក់២លើក និងអូស្រ្ដាលី ឈ្នះ១លើក ផងដែរ៕