តាមរយៈកិច្ចសហប្រតិបត្តិការរវាងក្លិបបាល់ទាត់បឹងកេត និងក្លិបបាល់ទាត់ SHONAN BELLMARE ដែលជាសមាជិកនៃក្របខ័ណ្ឌលីគកំពូលជប៉ុន ( J-LEAGUE ) កីឡាករមានសក្តានុពលពីររូប ពីក្រុមយុវជនថ្នាលរបស់បឹងកេត គឺអ្នកចាំទី IMMANOEL OSAMOJE និង ខ្សែប្រយុទ្ធ ស្រ៊េន មិនា ត្រូវបានអញ្ជើញទៅកាន់ប្រទេសជប៉ុន ដែលនឹងដឹកនាំដោយលោក សាប៊ូន វិនតា តួនាទីជានាយកអភិវឌ្ឍយុវជន។
គោលបំណងនៃការអញ្ជើញកីឡាករយុវជនទាំងពីររូប ធ្វើដំណើរទៅកាន់ប្រទេសជប៉ុន គឺដើម្បីផ្លាស់ប្តូរនូវបទពិសោធន៍អំពីការហ្វឹកហាត់ ក៏ដូចជាផ្តល់ឱកាសឱ្យពួកគេ ហ្វឹកហាត់ជាមួយក្រុមយុវជនរបស់ក្លិប SHONAN BELLARE អាយុក្រោម ១៨ឆ្នាំ ថែមទៀតផង។
តាមកាលវិភាគអ្នកទាំងបី បានធ្វើដំណើរចាកចេញពីកម្ពុជា កាលពីយប់ថ្ងៃទី១២ ខែធ្នូ ឆ្នាំ២០២២ រហូតដល់ថ្ងៃទី២០ ខែធ្នូ ឆ្នាំ២០២២។
លោក សាប៊ូន វិនតា នាយកអភិវឌ្ឍយុវជនក្លិបបឹងកេត បានបង្ហាញអំពីទស្សនៈចំពោះការនាំយុវជន ទៅហ្វឹកហាត់នៅប្រទេសជប៉ុន៖
«ខ្ញុំមានអារម្មណ៏សប្បាយចិត្តរីករាយនិងសូមអគុណដល់ថ្នាក់ដឹកនាំ ក្លឹបបឹងកេតដែលបានផ្ដល់ឱកាសអោយរូបខ្ញុំ និងកីឡាករយុវជន បឹងកេតពីរនាក់ទៀត ចូលរួមកម្មវិធីហ្វឹកហាត់របស់ក្រុមយុវជន អាយុក្រោម១៨ឆ្នាំក្លិបបាល់ទាត់ Shonan Bellmare នៃលីគកំពូល របស់ប្រទេសជប៉ុន J-League ដែលជាដៃគូរសហការរបស់ក្លិប បឹងកេត»។
«កម្មវិធីហ្វឹកហាត់នេះនឹងផ្តល់នូវបទពិសោធន៏ថ្មីមួយទៀត សម្រាប់ខ្ញុំរៀនសូត្រពីការហ្វឹកហាត់ និងអភិវឌ្ឍន៏បាល់ទាត់យុវជន នៅក្លិបជប៉ុនមួយនេះ។ ខ្ញុំសង្ឃឹមថាបទពិសោធន៍នេះនឹងក្លាយ ជាផ្នែកមួយក្នុងការអភិវឌ្ឍន៏យុវជនរបស់ក្លិបបឹងកេតផងដែរនៅថ្ងៃ អនាគត»៕