ពានរង្វាន់ហ្វូតសាលជើងឯកទ្វីបអាស៊ី AFC Futsal Asian Cup ឆ្នាំ២០២៤ ដែលប្រទេសថៃ ទទួលរៀបចំធ្វើជាម្ចាស់ផ្ទះ មាន១៦ប្រទេសចូលរួម ចាប់ពីថ្ងៃទី១៧ ដល់ថ្ងៃទី២៨ ខែមេសា ពេលនេះរកឃើញម្ចាស់ជើងឯកហើយ គឺក្រុមជម្រើសជាតិអ៊ីរ៉ង់ ក្រោយយកឈ្នះថៃ ក្នុងលទ្ធផល ៤-១ កាលពីយប់ថ្ងៃទី២៨ ខែមេសា ឆ្នាំ២០២៤ នៅទីលាន Bangkok Arena។
លទ្ធផលវគ្គផ្តាច់ព្រ័ត្រ AFC Futsal Asian Cup ឆ្នាំ២០២៤៖
- ថ្ងៃទី២៨ ខែមេសា ថៃ ១-៤ អ៊ីរ៉ង់ នៅទីលាន Bangkok Arena។
ក្រុមដណ្តើមចំណាត់ថ្នាក់លេខ៣៖
- តាជីគីស្ថាន ៥-៥ អ៊ូសបេគីស្ថាន (អ៊ូសបេគីស្ថាន ឈ្នះបាល់កាត់សេចក្តី១១ម៉ែត្រ ៣-១)។
គួរដឹងថាក្រុមទាំង១៦ ដែលចូលរួមមានដូចជា៖ ថៃ (ម្ចាស់ផ្ទះ), ចិន, អាហ្វហ្គានីស្ថាន, អារ៉ាប៊ីសាអ៊ូឌីត, អ៊ីរ៉ង់, គីហ្ស៊ីស្ថាន, វៀតណាម, កូរ៉េខាងត្បូង, តាហ្ស៊ីគីស្ថាន, មីយ៉ាន់ម៉ា, គុយវ៉ែត, បារ៉ែន, អ៊ូបេគីស្ថាន, អ៊ីរ៉ាក់, ជប៉ុន, អូស្ត្រាលី។
រំលឹកថា ពានរង្វាន់ហ្វូតសាលជើងឯកទ្វីបអាស៊ី AFC Futsal Asian Cup រៀបចំឡើងដំបូងពីឆ្នាំ១៩៩៩ បើគិតត្រឹមពេលនេះអ៊ីរ៉ង់ ឈ្នះជើងឯករហូតដល់ទៅ១២ដងច្រើនជាងគេ ខណៈជប៉ុន ធ្លាប់ឈ្នះបាន៤ដង ក្រៅពីនោះគ្មានប្រទេសណាធ្លាប់ឈ្នះជើងឯកម្តងណាឡើយ។
ចំពោះពានរង្វាន់ 2024 FIFA Futsal World Cup ដែលអ៊ូបេគីស្ថាន ទទួលរៀបចំធ្វើជាម្ចាស់ផ្ទះ គ្រោងនឹងចាប់ផ្តើមពីថ្ងៃទី១៤ ខែកញ្ញា ដល់ថ្ងៃទី៦ ខែតុលា ឆ្នាំ២០២៤ ដោយមាន ២៤ក្រុមចូលរួម ខណ:អ៊ីរ៉ង់, ថៃ, អាហ្វហ្គានីស្ថាន និង តាជីគីស្ថាន ដឹកដៃគ្នាទៅចូលរួម៕