សិល្បៈជាតិ៖ សារព័ត៌មានត្រយងបានទទួលដំណឹងមកនាពេលថ្មីៗនេះថា ម្ចាស់បទ ចម្ប៉ាប៉ោយប៉ែត បានទទួលមរណភាព ដោយសារគាំងបេះដូង កាលពីថ្ងៃសៅរ៍ទី១៧ ខែធ្នូ ឆ្នាំ២០២២។
តាមការបញ្ជាក់ពីក្រុមព្រះសូរិយា បានលម្អិតថា លោកស្រី ផ្លុង រិទ្ធី បានផ្ដល់ដំណឹងពីសហរដ្ឋអាមេរិកមកថា លោក រ៉ម រ៉ឺន អតីតតារាចម្រៀងទសវត្ស៨០ និងជាម្ចាស់បទ ចម្ប៉ាប៉ោយប៉ែត បានទទួលមរណភាពកាលពីថ្ងៃសៅរ៍ ទី១៧ ខែធ្នូ ឆ្នាំ២០២២ សហរដ្ឋអាមេរិច ត្រូវនិងថ្ងៃអាទិត្យ ទី១៨ ខែធ្នូ ឆ្នាំ២០២២ វេលាម៉ោង ៤រសៀលម៉ោងនៅប្រទេសកម្ពុជា ក្នុងជន្មាយុ៦៧ឆ្នាំ ដោយសារជំងឺគាំងបេះដូង។
លោក រ៉ម រ៉ឺន ជាអតីតតារាចម្រៀងដ៏ល្បីល្បាញ ក្នុងទសវត្ស៨០ និង៩០។ លោកមានស្រុកកំណេីតនាទឹកដីខេត្តបាត់ដំបងធ្លាប់ជាដៃគូចម្រៀងដ៏ជិតស្និទ្ធជាមួយលោកស្រី ឡឹម វណ្ណារី , លោកស្រី ឆោម ឆវិន , លោកស្រី សុខ សុខុមជាដេីម។ លោកជាអ្នកសិល្បៈដ៏ឆ្នើមមួយរូប ពហុជំនាញ ច្រៀងសម័យ ច្រៀងបុរាណ ច្រៀងប្រពៃណី ច្រៀងចាប៉ី អាយ៉ៃ ចេះលេងឧបករណ៍ភ្លេងជាច្រើនទៀត។
យើងសូមឧទ្ទិសដល់ដួងវិញ្ញាណក្ខន្ធរបស់លោក រ៉ម រ៉ឺន អញ្ជេីញទៅកាន់សុគតិភពកុំបីឃ្លៀងឃ្លាតឡើយ។
