សិល្បៈជាតិ៖ ម្សិលមិញ (២៣ ធ្នូ) ប្អូនៗប្រឡងបាក់ឌុបនៅមណ្ឌលរាជធានីបានដឹងលទ្ធផលជាប់ឬធ្លាក់រួចរាល់ហើយ។ ក្នុងចំណោមបេក្ខជនដែលបានចុះឈ្មោះប្រឡង ១២៨.១៣៤ នាក់ មានបេក្ខជនប្រឡងជាប់ចំនួនសរុប ៩០៩៥០ នាក់ ដោយក្នុងនោះមានប្អូនប្រុសរបស់តារាចម្រៀង សុវត្ថិឌី ធារីកា ម្នាក់ផងដែរ។ ជាមួយនឹងក្ដីអំណរដែលប្អូនប្រុសខ្លួននាងបានប្រឡងជាប់ ក៏មានអ្នកគាំទ្រខ្លះបានសម្ដែងអារម្មណ៍អាណិតស្រណោះចំពោះតារាវ័យក្មងរូបនេះ។
ជាការពិតណាស់ការប្រឡងបាក់ឌុប ឬការប្រឡងសញ្ញាបត្រមធ្យមសិក្សាទុតិយភូមិ ប្រៀបដូចជាការកំណត់វាសនានិងអនាគតរបស់យុវជនផងដែរ ព្រោះអ្នកដែលមានសមត្ថភាពអាចឆ្លងផុត (ជាប់) មានឱកាសសិក្សាជំនាញវិជ្ជាជីវៈដើម្បីជាដើមទុនជីវិត។ ដូច្នេះហើយការប្រឡងពិតជាសំខាន់ណាស់សម្រាប់យុវជនថ្នាក់ទី១២ ពួកគេអាចចាប់ក្ដីស្រមៃឬសម្រេចក្ដីស្រមៃបានគឺអាស្រ័យលើការប្រឡងនេះ។
ក្នុងនាមជាបងស្រីផង ជាឪពុកម្ដាយផង កញ្ញា សុវត្ថិឌី ធារិកា បានចេញមកបង្ហោះចែករំលែកដំណឹងល្អជាមួយនឹងបងប្អូនអ្នកគាំទ្រខ្លួននៅលើបណ្ដាញសង្គម ខណៈដែលប្អូនប្រុសត្រួយបណ្ដូលចិត្តតែម្នាក់បានប្រឡងជាប់បាក់ឌុប ត្រៀមឈានជើងចូលមហាវិទ្យាល័យដើម្បីចាប់ជំនាញណាមួយដើម្បីយកជាទុនជីវិតសម្រាប់ថ្ងៃអនាគត។
ក្រៅពីចូលរួមអបអរសាទរហើយនោះ បងប្អូនអ្នកលេងបណ្ដាញសង្គម ហាក់ដូចជានឹកស្រណោះដល់បងប្អូនកម្សត់ទាំងពីរដែលត្រូវព្រាត់ពីអ្នកមានគុណយ៉ាងឆាប់រហ័ស ហើយអ្នកមានគុណមិនបានឃើញជោគជ័យរបស់កូនប្រុសពៅដែលសម្រេចបានលទ្ធផលយ៉ាងល្អ។
សារព័ត៌មានត្រយងសូមជូនពរប្អូនប្រុសរបស់ប្អូនស្រី សុវត្ថិឌី ធារិកា ឱ្យបន្តទទួលបានជោគជ័យជាបន្តទៀត ជាពិសេសនៅក្នុងជីវិតជានិស្សិតក្នុងរបងមហាវិទ្យាល័យនឹងឈានចូលមកដល់ក្នុងរយៈពេលដ៏ខ្លីខាងមុខនេះ៕
