លោកស្រី Nualphan Lamsam ឈ្មោះក្រៅថា «Madam Pang» អ្នកចាត់ការទូទៅរបស់ក្រុមជម្រើសជាតិថៃ សន្យាផ្តល់ប្រាក់ ៥លានបាត (ស្មើនឹង១៤ម៉ឺនដុល្លារ) បើសិនអាចឈ្នះពានរង្វាន់ AFF Mitsubishi Electric Cup 2022។
គួរបញ្ជាក់លោកស្រី Nualphan Lamsam ដែលជាអ្នកជំនួញជោគជ័យ ត្រូវបានសហព័ន្ធបាល់ទាត់ថៃ (FAT) បានសម្រេចតែងតាំងជាអ្នកចាត់ការទូទៅក្រុមបាល់ទាត់ជម្រើសជាតិថៃផ្នែកបុរស កាលពីថ្ងៃទី២៣ ខែសីហា ឆ្នាំ២០២១កន្លងទៅ ដើម្បីជំនួសតំណែងលោក Akira Nishino គ្រូបង្វឹកជនជាតិជប៉ុន ដែលបានចាកចេញ បន្ទាប់ពីដឹកនាំថៃធ្លាក់ចេញពីការប្រកួតវគ្គជម្រុះ World Cup 2022 តំបន់អាស៊ី។
ពានរង្វាន់ជើងឯកបាល់ទាត់បុរសប្រចាំតំបន់អាស៊ាន បង្កើតឡើងដំបូងតាំងពីឆ្នាំ ១៩៩៦ មកម៉្លេះ ដោយប្រកួតរាល់២ឆ្នាំម្តង ស្របពេលដំបូងឡើយប្រើឈ្មោះជា AFF Tiger Cup រហូតដល់ឆ្នាំ២០០៤ ក៏ប្តួរឈ្មោះទៅជា AFF Suzuki Cup វិញម្តង និងចុងក្រោយចាប់ពីឆ្នាំ២០២២ តទៅប្រើឈ្មោះជាAFF Mitsubishi Electric Cup វិញម្តង។
គួរបញ្ជាក់ផងដែរថាក្រុមជម្រើសជាតិថៃ ជាក្រុមឈ្នះជើងឯកពានរង្វាន់បុរសប្រចាំតំបន់អាស៊ាន នេះបានច្រើនជាងគេ រហូតដល់ទៅ៦លើក ហើយសិង្ហបុរី ឈ្នះបាន៤លើក វៀតណាម ឈ្នះ២លើក និងម៉ាឡេស៊ី ឈ្នះបាន១លើក។ សម្រាប់ក្រុមឥណ្ឌូណេស៊ី ជាក្រុមឡើងវគ្គផ្ដាច់ព្រ័ត្របានច្រើនជាងគេរហូតដល់៦លើក តែបរាជ័យរហូត៕
