សិល្បៈអន្តរជាតិ៖ ជាថ្មីម្ដងទៀត ប្រធានបទដែលមហាជនលើកយកមករិះគន់ចំពោះ Taylor Swift ចាប់ផ្ដើមមានការចាប់អារម្មណ៍ជាថ្មី ជាពិសេសការបង្កើត CO2 (កាបោនឌីអុកស៊ីត) ដែលបង្កឡើងដោយយន្តហោះផ្ទាល់ខ្លួនរបស់នាង។
មែនទែនទៅរហស្សនាមឧក្រិដ្ឋជនបំផ្លាញបរិស្ថានដែលត្រូវបានគេយកមកដាក់ឱ្យ Taylor នេះ ពីដំបូងគឺជារបស់តារាសម្ដែង Kylie Jenner ដែលចូលចិត្តធ្វើដំណើរទៅណាមកណាដោយប្រើយន្តហោះផ្ទាល់ខ្លួន ព្រោះមានអ្នកចេញមកទម្លាយនៅលើបណ្ដាញ Twitter ថា Kylie ចូលចិត្តជិះយន្តហោះដោយមានការហោះហើរខ្លះប្រើពេលត្រឹម៣នាទីក្ដី។
យ៉ាងណាមិញនៅពេលដែលមានការចេញមកទម្លាយបន្ថែមឱ្យដឹងថាចំនួន CO2 ដែលបង្កឡើងដោយយន្តហោះផ្ទាល់ខ្លួនរបស់ Kylier មិនច្រើនដល់បរិមាណដែលបង្កើតឡើងដោយការធ្វើដំណើរតាមយន្តហោះរបស់ Taylor នោះឡើយ។
កន្លងមកគេតែងតែចាត់ទុក Kylier Jenner គឺជាតារាដែលបំពុលបរិស្ថានដោយសារប្រើប្រាស់មធ្យោបាយធ្វើដំណើរដោយយន្តហោះផ្ទាល់ខ្លួន ប៉ុន្តែនៅពេលដែលគេធ្វើការស្រាវជ្រាវទៅឃើញថាតារារូបនេះស្ថិតក្នុងបញ្ជីតារាដែលហោះហើរដោយយន្តហោះផ្ទាល់ខ្លួនត្រឹមលេខរៀងទី១៩ ខណៈដែល Taylor Swift ស្ថិតនៅលំដាប់កំពូល។ ឆ្នាំនេះ Taylor Swift បានហោះហើរដោយយន្តហោះផ្ទាល់ខ្លួនចំនួន ១៧០ដង គិតត្រឹមរយៈពេល២០០ថ្ងៃដំបូងដើមឆ្នាំ២០២២។
ឆ្លើយតបចំពោះការចោទប្រកាន់នេះតំណាងរបស់ Taylor Swift បានចេញមកបកស្រាយថា យន្តហោះរបស់នាងតែងតែដាក់ឱ្យខ្ចីជាប្រចាំមិនថាខ្ចីឯកជន ឬជាក្រុមនោះឡើយ ដូច្នេះហើយការធ្វើដំណើរទាំងអស់នោះមិនមែនសុទ្ធតែជារបស់ Taylor ទាំងស្រុងទេ។
បើទោះជាមានការចេញមកស្រាយបំភ្លឺយ៉ាងដូច្នេះក្ដីប៉ុន្តែអ្នកលេងបណ្ដាញសង្គម Twitter នៅតែចេញមករិះគន់ ក៏ដូចជាធ្វើរូបគំនូរចំអកដល់នាង ហើយចោទនាងថាជាឧក្រិដ្ឋជនបង្កផលប៉ះពាល់ដល់អាកាសធាតុ៕
ប្រភព៖ msn
