សិល្បៈជាតិ៖ កម្មវិធីប្រកួតសម្រស់លំដាប់អន្តរជាតិ Miss Planet International នឹងប្រកួតផ្ដាច់ព្រ័ត្រនៅថ្ងៃទី២៩ ខែមករា ឆ្នាំ២០២៣ ខាងមុខនេះ ប៉ុន្តែសន្ទុះគាំទ្រនិងការផ្សព្វផ្សាយហាក់ដូចជាមិនទាន់ផុសផុលដូចវេទិកាប្រកួតសម្រស់ផ្សេងៗនោះទេ។
ជាថ្មីម្ដងទៀតដែលអ្នកគាំទ្រកម្មវិធី Miss Planet International បង្ហាញអារម្មណ៍ព្រួយបារម្ភចំពោះជោគវាសនារបស់កម្មវិធីដែលបង្កើតឡើងដោយកូនខ្មែរមួយនេះ ព្រោះនៅសល់ត្រឹមតែ១ខែ២ថ្ងៃទៀតប៉ុណ្ណោះកម្មវិធីដ៏ធំអស្ចារ្យមួយនេះប្រារព្ធឡើងហើយ។
ប៉ុន្តែបើសង្កេតឱ្យស៊ីជម្រៅនៃសន្ទុះគាំទ្រពីសាធារណជនហាក់ដូចជានៅមានកម្រិត ចំណែកឯការផ្សព្វផ្សាយក៏មិនទាន់បានទូលំទូលាយ ដែលធ្វើឱ្យកម្មវិធីមួយនេះហាក់ដូចជាត្រូវបានប្រជាជនកម្ពុជាមើលរំលង ឬនៅមិនបានដឹងព័ត៌មានលម្អិតពីកម្មវិធីនៅឡើយ។
ខណៈដែលបវរកញ្ញាកម្ពុជាជាច្រើនដួងកំពុងតែមមាញឹកក្នុងនាមជាបេក្ខនារីតំណាងជាតិនៅលើវេទិការអន្តរជាតិធំៗ ដូចជា Miss Grand , Miss World , Miss Universe នោះ បវរកញ្ញាកម្ពុជាដែលតំណាងឱ្យកម្ពុជាដូចគ្នាហើយប្រកួតនៅលើទឹកដីកំណើតទៀត ហាក់ដូចជាមិនត្រូវបានអ្នកគាំទ្រលើកទឹកចិត្តនិងផ្ដល់កម្លាំងចិត្តដល់កញ្ញា និងក្រុមការងារពាក់ព័ន្ធនោះឡើយ។
ជារឿយដែលកម្មវិធីប្រកួតមួយនេះបានបង្ហោះផ្សព្វផ្សាយនៅលើផេកផ្លូវការរបស់ខ្លួនដែលមានឈ្មោះថា Miss Planet International និងផេកគាំទ្រកម្មវិធីដូចជា MPI-Planet Update ប៉ុន្តែសន្ទុះគាំទ្រនៅតែស្ងាត់និងមិនផុសផុល មានចំនួន Like, Share និង Comment ច្រើនឱ្យសមនឹងកម្មវិធីធំលំដាប់អន្តរជាតិសោះ។
ម្សិលមិញនេះ (២៦ ធ្នូ) ផេក Miss Planet International បង្ហោះចែករំលែកពីកាលបរិច្ឆេទប្រកួតនៅលើបណ្ដាញសង្គមមានគណនីត្រឹមតែ 1K ប៉ុណ្ណោះ Like ខណៈដែល Comment មានជាង៦០ រីឯការចែករំលែកព័ត៌មានបន្តមានត្រឹមតែ២៣តែប៉ុណ្ណោះ។
ត្រយងសង្ឃឹមថាពុកម៉ែបងប្អូន ដែលជាអ្នកមានស្មារតីជាតិនិយម និងងាកមកចាប់អារម្មណ៍ ហើយគាំទ្រកម្មវិធី Miss Planet International ហើយបានច្រើន ជាពិសេសគឺការចូលរួម Like, Comment និង Share ដើម្បីជាចំណែកមួយជួយផ្សព្វផ្សាយដល់កម្មវិធីផង និងជួយជំរុញឱ្យវិស័យមួយនេះកាន់តែមានការរីកចំរើន និងអភិវឌ្ឍកាន់តែខ្លាំងទៀតនៅក្នុងសង្គមជាតិយើង។
សូមបញ្ជាក់ឡើងវិញថា Miss Planet International នឹងរៀបចំការប្រកួតនៅថ្ងៃទី២៩ ខែមករា ឆ្នាំ២០២២៣ នៅសាលមហោស្រពកោះពេជ្រ ចាប់ពីវេលាម៉ោង៦ល្ងាចតទៅ៕