ការត្រលប់មកវិញក្នុងវគ្គទី២របស់ភាពយន្តភាគបែបវេជ្ជសាស្ត្រពេទ្យ «Hospital Playlist2» ដែលត្រលប់មកបរិយាយពីជីវិតរបស់ក្រុមគ្រូពេទ្យមិត្តសម្លាញ់នៅក្នុងមន្ទីរពេទ្យ Yol Jae ដែលគ្រាន់តែបញ្ចាំងភាគដំបូងសោះ បានបំបែកកំណត់ត្រា ក្លាយជារឿងភាគប្រចាំប្រវត្តិសាស្ត្រ TVN ដែលទទួលបានអត្រាទស្សនាខ្ពស់បំផុតសម្រាប់ការបញ្ចាំងភាគទីមួយ។
យោងតាម Nielsen Korea រឿង «Hospital Playlist2» បញ្ចាំងភាគដំបូងមានអត្រាទស្សនាគិតជាភាគរយ១០.០០៧% ដែលចាត់ទុកជាតួលេខមួយខ្ពស់ជាងវគ្គទីមួយដែលបញ្ចាំងថ្ងៃដំបូងទទួលបានអត្រាទស្សនា ៦.៣២៥% ខណៈវគ្គទីមួយភាគបញ្ចប់រកបានអត្រាទស្សនាចំនួន១៤.១៤២%។ មិនត្រឹមតែបង្កើតបានកំណត់ត្រាថ្មីបញ្ចាំងវគ្គមួយមានអត្រាទស្សនាខ្ពស់ប៉ុណ្ណោះទេ ថែមទាំងបង្កើតបានកំណត់ត្រាប្រចាំស្ថានីយទូរទស្សន៍ TVN ក្នុងចំណោមភាពយន្តភាគទាំង១០រឿងដែលបញ្ចាំងវគ្គទីមួយមានអត្រាទស្សនាច្រើនបំផុតថែមទៀតផង។
ខាងក្រោមនេះជាលេខរៀងភាពយន្តភាគដែលបញ្ចាំងភាគដំបូងមានអត្រាទស្សនាខ្ពស់បំផុតរបស់ TVN៖
១.Hospital Playlist 2 (2021) – 10.0%
២.Mr. Sunshine (2018) – 8.9%
៣.Encounter (2018) – 8.7%
៤.Mr. Queen (2020) – 8.0%
៥.Vincenzo (2021) – 7.7%
៦.Stranger 2 (2020) – 7.6%
៧.Memories of the Alhambra (2018) – 7.55
៨.Hotel Del Luna (2019) – 7.3%
៩.Goblin (2016) – 6.9%
១០.Arthdal Chronicles (2019) – 6.7%
Hospital Playlist 2 គឺជារឿងរ៉ាវដែលបរិយាយពីក្រុមគ្រូពេទ្យចំនួន៥នាក់ដែលជាមិត្តភក្ដិជិតស្និតនឹងគ្នា ហើយក្រោយពេលរៀនចប់បានមកធ្វើការងារនៅក្នុងមន្ទីរពេទ្យតែមួយជាមួយគ្នាទៀត។ សម្រាប់វគ្គទី២នេះ នឹងមកបង្ហាញបន្តពីខ្សែជីវិត សម្ព័ន្ធភាព ស្នេហា និងការងាររបស់តួអង្គសំខាន់ៗទាំង៥រូបនេះជាបន្តទៀត៕