សិល្បៈជាតិ៖ កាលពីថ្ងៃទី២ ខែមករា ឆ្នាំ២០២៣ តារាចម្រៀងយុវវ័យដ៏សោភា រ៉េត ស៊ូហ្សាណា បានបង្ហោះរូបភាពប៉ុន្មានសន្លឹកជាមួយនឹងកូនប្រុសទីពីរឧកញ៉ា ព្រាប សុវត្ថិ ដែលធ្វើឱ្យអ្នកគាំទ្របែកចេញជា២សំឡេងគឺមានទាំងអ្នកសប្បាយ និងអ្នកកើតទុក្ខ។
រូបភាពពីរសន្លឹកដើមឆ្នាំ២០២៣ ដែលធ្វើឱ្យមហាជនមានការចាប់អារម្មណ៍ខ្លាំងនេះ ក៏មានការចាប់អារម្មណ៍ពីប៉ាប៉ាកូនពីរ ពិធីករល្បីឈ្មោះ ជា វណ្ណារិទ្ធផងដែរ ដោយលោកបានចូលមកសួរក្រោមរូបភាពនោះថា៖ «Private ដល់អង្កាល់២នាក់ហ្នឹង»។ ឆ្លើយតបចំពោះការលើកឡើងនេះសាមីខ្លួនបានសរសេរថា៖ «អត់ដឹងផងបង» ខណៈពិធីករប្រចាំទូរទស្សន៍ហង្សមាសអ្នកនាង ចាន់ កែវនិមល បានចូលមកជួយ រ៉េត ស៊ូហ្សាណាដែរថា៖ «មនុស្សចាស់រករឿងកូនក្មេងចឹង?»
ក្រៅពីមានការចូលមកបញ្ចេញចំណាប់អារម្មណ៍របស់ពិធីករខាងលើអ្នកគាំទ្រភាគច្រើនបានចូលមកបង្ហាញការយល់ឃើញថា «ដូចការសង្ស័យមែន» ខណៈដែលអ្នកដែលលួចបេតីតារាទាំងពីរដួងនេះបានបង្ហាញអារម្មណ៍ឈឺចាប់និងខូចចិត្ត។
ថ្វីត្បិតតែឧស្សាហ៍មានរូបគូឱ្យអ្នកគាំទ្រកើតចិត្តសង្ស័យថាតារាចម្រៀងយុវវ័យមួយគូនេះមានទំនាក់ទំនងជាមួយគ្នាលើសពីមិត្តរួមការងារ ប៉ុន្តែសាមីខ្លួនទាំងពីរនេះមិនបានបញ្ជាក់ឬបកស្រាយឱ្យអ្នកគាំទ្របានដឹងនោះឡើយ ដូច្នេះអ្នកគាំទ្រមានតែរងចាំតាមដានជាបន្តទៀត នៅពេលណាទើប ហ្សាណា និង មុនីនាគ ឈប់ Private ទៀត៕
