សិល្បៈជាតិ៖ អ្នកគាំទ្រវិស័យប្រកួតសម្រស់នៅកម្ពុជាកំពុងតែមានមោទកភាពខ្លាំង ព្រោះមួយរយៈចុងក្រោយនេះបវរកញ្ញាឬកញ្ញាឯកកម្ពុជាដែលចេញទៅប្រកួតតំណាងជាតិរមែងមានការចាប់អារម្មណ៍ ទទួលបានប្រជាប្រិយភាពនិងពេញនិយមច្រើនពីអ្នកគាំទ្របរទេស តួយ៉ាងដូចជា Miss Grand Cambodia ពេជ្រ វត្តីសារ៉ាវឌ្ឍី ដែលទទួលតំណែង 5th Runner Up និង Mis Universe Cambodia ហង្ស ម៉ានីតា ដែលកំពុងតែមានភារកិច្ចប្រកួតប្រជែងដណ្ដើមមកុដនៅសហរដ្ឋអាមេរិក។
ទោះបីជាការប្រកួតបានបញ្ចប់ប៉ុន្តែឥទ្ធិពលនិងប្រជាប្រិយរបស់ ពេជ្រ វត្តីសារ៉ាវឌ្ឍី នៅតែខ្លាំង ព្រោះក្រៅពីនៅសម្ងំកើបលុយនៅប្រទេសថៃមួយរយៈ ដោយសារតែមានអ្នកគាំទ្រជនជាតិថៃស្រលាញ់ចូលចិត្តច្រើនហើយនោះ ពេលដែលកញ្ញា មានឱកាសត្រលប់មកប្រទេសកំណើតវិញកាលពីថ្ងៃទី២កន្លងទៅ មានអ្នកគាំទ្រកញ្ញាណែនណាន់បានទៅប្រមូលផ្ដុំគ្នារងចាំទទួលស្វាគមន៍កញ្ញារហូតបណ្ដាលឱ្យព្រលានយន្តហោះអន្តរជាតិពោចិនតុងកកស្ទះជាច្រើនម៉ោង ក្នុងនោះមិនត្រឹមតែអ្នកគាំទ្រខ្មែរនោះឡើយដែលមកចាំស្វាគមន៍ តែឮថាមានអ្នកគាំទ្រពីថៃបានតាមមកជូនដំណើរវត្តីដល់ប្រទេសកម្ពុជាថែមទៀតផង។
ងាកមកស្រីស្រស់សម្រស់កូនកាត់ កញ្ញា ហង្ស ម៉ានីតា ឯណោះវិញក៏មិនធម្មតាដែរ ព្រោះយុវតីខ្មែរមួយដួងនេះក៏ទទួលមានការស្រលាញ់ចូលចិត្តច្រើនពីអ្នកគាំទ្របរទេសផងដែរ។ កញ្ញាទទួលបានការស្រលាញ់ចូលចិត្តនិងសរសើរច្រើនពីអ្នកគាំទ្រហ្វីលីពីន ជាពិសេសនៅពេលដែលកញ្ញាទៅសម្ងំហ្វឹកហាត់ដើម្បីពង្រឹងសមត្ថភាពនៅប្រទេសនោះគឺឃើញមានអ្នកគាំទ្រហ្វីលីពីនតាមហែរហមគ្រប់ទីតាំងដែលកញ្ញាបានទៅ ព្រមទាំងមានការទទួលស្វាគមន៍យ៉ាងកក់ក្ដៅថែមទៀតផង។
អ្វីដែលគួរឱ្យចាប់អារម្មណ៍លើសពីនោះទៀត កញ្ញាតែងតែត្រូវបានម្ចាស់ថ្មីកម្មវិធី Miss Universe ថ្មីជាជនជាតិថៃ Ann Jakrapong យករូបភាពកញ្ញាមកចែករំលែកបន្តនៅលើគណនីរបស់ខ្លួនជានិច្ច។ ថ្មីៗនេះខណៈដែលបវរកញ្ញារូបនេះទៅដល់សហរដ្ឋអាមេរិកដើម្បីត្រៀមខ្លួនប្រកួតប្រជែងនោះ កញ្ញា ត្រូវបានផេក Miss Universe Predictions ផុសផ្សព្វផ្សាយថាកញ្ញាស្ថិតក្នុងចំណោមបវរកញ្ញាប្រកួតលេចធ្លោរទាំង១០រូបដែលចាត់ចំណាត់ថ្នាក់ដោយ Pageanthology។
បរវកញ្ញាដែលត្រូវបានចាត់ទុកថាលេចធ្លោទាំង១០រូបរួមមានៈ
១.ឥណ្ឌា
២.ថៃ
៣.វៀតណាម
៤.អាហ្វ្រិកខាងត្បូង
៥.កម្ពុជា
៦.វេណេហ្សុយអេឡា
៧.ការ៉ាហ្គួរ
៨.ដូមីនិច
៩.កូឡុំបៀរ
១០.ព័រតូរីកូ
ប៉ុន្មានឆ្នាំចុងក្រោយនេះដោយមានការខិតខំប្រឹងប្រែងយ៉ាងសស្រាក់សស្រាំពីសំណាក់អ្នករៀបចំការផលិតនិងបវរកញ្ញាខ្លួនឯងបានធ្វើឱ្យឥទ្ធិពល និង កិត្តិនាមរបស់បវរកញ្ញាកម្ពុជានៅលើឆាកអន្តរជាតិកាន់តែមានការទទួលស្គាល់ច្រើន ហើយបវរកញ្ញាកម្ពុជាក៏កាន់តែត្រូវបានគេផ្ដោតការចាប់អារម្មណ៍មិនចាញ់បវរកញ្ញាមកពីប្រទេសនានានោះឡើយ។ សង្ឃឹមថាសន្ទុះគាំទ្របវរកញ្ញាកម្ពុជានឹងបន្តកើនឡើងជាលំដាប់ ដើម្បីជាកម្លាំងចិត្តដ៏សំខាន់មួយជួយរុញច្រានវិស័យមួយនេះមានការអភិវឌ្ឍជឿនលឿន មិនចាញ់ប្រទេសជិតខាង។ ឆ្នាំមុនបវរកញ្ញាកម្ពុជាមួយរូបបានដណ្ដើមកុដបានសម្រេចពីប្រទេសម៉ាឡេស៊ី សង្ឃឹមថាថ្ងៃណាមួយបវរកញ្ញាកម្ពុជានឹងអាចដណ្ដើមកមុដពីវេទិកាប្រកួតធំៗបាន៕