សិល្បៈជាតិ៖ ក្រោយទុកឱ្យអ្នកគាំទ្រតាមដានមួយរយៈពីទំនាក់ទំនងជាមួយនឹងបុរសសង្ហាជនជាតិបារាំង Derek Bidaut ទីបំផុតកញ្ញា ឆន ស្រីនេត ព្រមលាតត្រដាងជាសាធារណៈពីទំនាក់ទំនងរបស់ខ្លួនជាមួយនឹងអ្នកគ្រប់គ្រងក្លឹប Prodal fight & fitness studio ហើយនៅលើបណ្ដាញសង្គម។
ពាក្យចាស់ពោលថាបុរសសង្ហាគូនិងស្រីស្អាត ពាក្យនេះពិតជាមិនខុសមែន ព្រោះគូស្នេហ៍ដែលទើបតែប្រកាសពីទំនាក់ទំនងរបស់ខ្លួននៅហ្វេសប៊ុកកាលពីថ្ងៃទី៥ ខែមករា ម្សិលមិញនេះ បានធ្វើឱ្យបុរសៗខកចិត្តមិនតិចនោះទេ ដោយស្រីស្អាត ឆន ស្រីនេត បានប្រកាសជាចំហរពីទំនាក់ទំនងរវាងខ្លួននិងគូស្នេហ៍ឱ្យអ្នកគាំទ្របានដឹងនិងចូលរួមធ្វើអបអរសាទរចំពោះកញ្ញា។
កន្លងមកអ្នកគាំទ្រមួយចំនួនបានសង្កេតឃើញពីភាពស្និតស្នាលទៅណាមកណាជាមួយគ្នារវាងកញ្ញា និងបុរសអ្នកលេងគុនល្បុក្កតោរូបនេះជារឿយៗ ប៉ុន្តែការសង្ស័យត្រឹមមានក្នុងចិត្តប៉ុណ្ណោះ មិនមានអ្នកណាម្នាក់ហ៊ានសន្មត់ពីសម្ព័ន្ធភាពអ្នកទាំងពីរនោះឡើយ ព្រោះគេយល់ថាអ្នកទាំងពីរស្និតស្នាលគ្នាជារឿងធម្មតា ដោយសារស្រីនេតធ្លាប់ហ្វឹកហាត់គុនល្បុក្កតោដើម្បីត្រៀមខ្លួនប្រកួតនាពេលកន្លងមក។
បន្ទាប់ពីសាមីខ្លួនបានប្រកាសជាសាធារណៈពីទំនាក់ទំនងខ្លួនបែបនេះ មហាជនដែលធ្លាប់តែមានការសង្ស័យប្រហែលជាអស់ចម្ងល់ទៀតហើយ បើសិនគេគូស្នេហ៍មួយគូនេះបណ្ដើរគ្នាទៅចូលរួមក្នុងកម្មវិធីណាមួយទៀតនោះ។ បុរសៗមួយចំនួនបានខកចិត្ត ដោយសារតែបេះដូងរបស់កញ្ញាឯកកម្ពុជាមួយភាគធំមានម្ចាស់គ្រងបេះដូងអស់ទៅហើយ មិនថាកញ្ញា ឆន ស្រីនេត កញ្ញា រ៉េត សារីតា និងកញ្ញា ងិន ម៉ារ៉ាឌី ជាដើម៕
