នៅមុននេះបន្តិចគណនីហ្វេសប៊ុករបស់ឯកឧត្តម ខៀវ កាញារីទ្ធ បានបង្ហោះរូបភាពជាច្រើនសន្លឹកព្រមទាំងលើកឡើងថា រកឃើញតារាឯកថ្មីៗប្រចាំឆ្នាំ២០២៣ ដោយនៅក្នុងនោះគេសង្កេតឃើញថាតារាឯកថ្មីៗដែលឯកឧត្តមរដ្ឋមន្ត្រីក្រសួងព័ត៌មានសំដៅដល់នោះសុទ្ធសឹងតែជាមន្ត្រីជាន់ខ្ពស់ក្នុងជួររាជរដ្ឋាភិបាលកម្ពុជា។
នាល្ងាចថ្ងៃទី៦ ខែមករា ឆ្នាំ២០២៣ នេះ ឯកឧត្តមឧបនាយករដ្ឋមន្ត្រី ប្រាក់ សុខុន និងលោកជំទាវ ខេង សំរ៉ាដា បានអញ្ជើញរៀបចំពិធីជប់លៀងអាហារពេលល្ងាច នៅសណ្ឋាគារភ្នំពេញភូគីត្រា ជូនដល់ក្រុមការងារពាក់ព័ន្ធទាំងអស់ ដែលបម្រើការងារនៅក្នុងកិច្ចប្រជុំអាស៊ានលើកទី៤០ និងលើកទី៤១ និងកិច្ចប្រជុំកំពូលពាក់ព័ន្ធ ដែលបានបិទបញ្ចប់ប្រកបដោយជោគជ័យគួរជាទីមោទក នាពេលកន្លងទៅ ដោយក្នុងនោះឯកឧត្តមរដ្ឋមន្ត្រី ខៀវ កាញារីទ្ធ និងលោកជំទាវ ក៏បានទៅចូលរួមជាកិត្តិយសក្នុងឱកាសជួបជុំដ៏សែនរីករាយនោះផងដែរ។
ក្រៅពីមានការប្រគំតន្ត្រីដោយបងប្អូនសិល្បករដើម្បីញ៉ាំងបរិយាកាសឱ្យកាន់តែសប្បាយរីករាយ ហើយនោះ ឯកឧត្តមឧបនាយករដ្ឋមន្ត្រី ប្រាក់ សុខុន បានឡើងបកស្រាយបទចម្រៀងបណ្ដើរ ដេញហ្គីតាបណ្ដើរ ខណៈដែលឯកឧត្តមបណ្ឌិត សុក ស៊ីផាន់ណា ទីប្រឹក្សាជាន់ខ្ពស់នៃរាជរដ្ឋាភិបាលកម្ពុជា ក៏ជាតារាចម្រៀងម្នាក់នៅលើវេទិកានោះផងដែរ។
រូបភាពដ៏កម្ររបស់មន្ត្រីជាន់ខ្ពស់ឡើងលើវេទិកាច្រៀង និង ដេញហ្គីតា កំដរបរិយាកាសជប់លាងដើម្បីបង្កើនចំណងសាមគ្គីភាពនិងមិត្តភាពនេះ ត្រូវបានបងប្អូនអ្នកលេងបណ្ដាញចូលមកកោតសរសើរថាគ្រាន់តែឃើញក៏ដឹងថាសប្បាយរីករាយដែរ ខណៈដែលអ្នកខ្លះទៀតបានគាំទ្រសម្ដីឯកឧត្តមរដ្ឋមន្ត្រីថា តារាទើបរះថ្មី៕
រូបថត៖ ផែន រតនៈ និង ខឹម សុវណ្ណារ៉ា
