សិល្បៈជាតិ ៖ ទើបតែចូលឆ្នាំ ២០២៣ បាន៩ថ្ងៃទេ បវរកញ្ញាកម្ពុជា ២ រូបបានបើកមុខនាំភាពជោគជ័យមកជូនប្រទេសជាតិតាមរយៈការដណ្ដើមមកុដពីការប្រកួតនៅលើវេទិការអន្តរជាតិដែលរៀបចំធ្វើឡើងនៅប្រទេសថៃ។
នៅក្នុងនោះរួមមាន កញ្ញា ឃឿន ប៉ូលីកា ដណ្ដើមបានមកុដពីកម្មវិធី Miss Pre Teen International 2023 និងកញ្ញា ឌៀប សូហ្វៀរ៉ា ដែលអាចដណ្ដើមបានមកុដលំដាប់រងទី២ Little Miss Idol Junior World 2023។ បវរកញ្ញាទាំងពីររូបនេះ បានធ្វើឱ្យមជ្ឍដ្ឋានមហាជន និងអ្នកស្នេហាវិស័យកញ្ញាឯកកម្ពុជាមានសេចក្ដីរំភើបចិត្ត និងមោទកភាពជាខ្លាំង។
សម្រាប់ប្អូនស្រី ឃឿន ប៉ូលីកា ទើបតែមានវ័យ ១៤ ឆ្នាំ បានខិតខំប្រឹងប្រែងយ៉ាងស្វិតស្វាញ ក្នុងការដណ្ដើមយកជ័យជម្នះពីកម្មវិធី Miss Pre Teen International 2023 ទាំងការដើរបង្ហាញម៉ូដ និងការឆ្លើយសំណួរពីគណៈកម្មការ។ ប្អូនស្រីគឺជាបវរកញ្ញាកម្ពុជាដំបូងគេបង្អស់ដែលអាចបំបែកប្រវត្តិសាស្ត្រថ្មីនេះមកជូនមាតុភូមិប្រទេសយ៉ាងមានមោទនភាព។ ម្ចាស់មកុដរូបនេះបានបង្ហាញអារម្មណ៍ប្រាប់អ្នកគាំទ្រថា៖ «អរគុណអ្នកទាំងអស់គ្នាបានគាំទ្រខ្ញុំ ហើយជំរុញទឹកចិត្តខ្ញុំ។ នាងខ្ញុំត្រៀមខ្លួនធ្វើជា international queen ដែលល្អ ដែលជម្រុញទឹកចិត្តទាំងអស់គ្នាឲ្យមានភាពជឿជាក់ និងជឿជាក់លើខ្លួនឯង»។
ងាកមកកុមារី ឌៀប សូហ្វៀរ៉ា មានវ័យ ១២ឆ្នាំបានទទួលតំណែងលំដាប់រងទី១ ពីកម្មវិធី Miss Pre Teen Cambodia 2022 និងបានចូលរួមដណ្ដើមមកុដពីកម្មវិធី Little Miss Idol Junior World 2023 នឹងបានតំណែងរងលំដាប់ទី២។ មិនខុសពី ប៉ូលីកា បវរកញ្ញាតូចតន់មួយរូបនេះ ក៏ធ្វើបានយ៉ាងល្អចំពោះគ្រប់វិញ្ញាសារដែលកម្មវិធីបានតម្រូវផងដែរ។
សូមជម្រាបថា បវរកញ្ញាយុវតី ឌៀប សូហ្វៀរ៉ា បានត្រឡប់មកដល់ប្រទេសកម្ពុជាព្រឹកមិញនេះហើយ ដោយឡែកសម្រាប់ប្អូនស្រី ឃឿន ប៉ូលីកា ត្រៀមនឹងត្រឡប់មកកាន់ទឹកដីកំណើតវិញនាថ្ងៃទី ១០ ខែ មករា ឆ្នាំ ២០២៣នេះ ដែលនឹងមកដល់ព្រលានយន្តអន្តរជាតិភ្នំពេញនាវេលាម៉ោង ១១ និង ៣០ នាទីព្រឹក។ ដូច្នោះហើយ សូមអ្នកគាំទ្រទាំងអស់កុំភ្លេចរង់ចាំទទួលស្វាគមន៍បវរកញ្ញាយើងឱ្យបានច្រើនកុះករនាថ្ងៃវិសេសនេះ និងបញ្ជាក់ឱ្យឃើញថា បវរកញ្ញាកម្ពុជាគឺមានឥទ្ធិពលខ្លាំងក្នុងវិស័យប្រកួតប្រជែងសម្រស់គ្រប់កម្មវិធីតែម្ដង។