សិល្បៈជាតិ៖ តារាសម្ដែង ប៉ាន់ខែម ម៉ានូ កំពុងតែត្រូវបានក្រសែភ្នែកមហាជនផ្ដោតការចាប់អារម្មណ៍ជាពិសេសព្រោះតែតារារូបនេះត្រូវបានជ្រើសរើសឱ្យសម្ដែងជាតួអង្គសម្ដេចតេជោនាយករដ្ឋមន្ត្រីទាំងនៅក្នុងភាពយន្តចម្រៀង«ទុក្ខស្រីប្ដីព្រាត់» និងខ្សែភាពយន្តភាគ «កូនប្រុសក្រោមពន្លឺព្រះច័ន្ធពេញបូណ៌មី»។ នៅក្នុងសាច់រឿង ម៉ានូ បានសម្ដែងជាតួឯកវ៉ាដាច់តារាសម្ដែងរៀមច្បងដែលធ្លាប់សម្ដែងជាតួអង្គឯកកន្លងមកទាំងអស់។
បើពិនិត្យឱ្យស៊ីជម្រៅនៅក្នុងភាពយន្តចម្រៀង «ទុក្ខស្រីប្ដីព្រាត់» ក្រៅពី ម៉ានូ ដែលជាតារាសម្ដែងឯកដើរតួអង្គជាសម្ដេចតេជោ ហ៊ុន សែន ហើយនោះ គេឃើញមានតារាសម្ដែងផ្នែកបុរសឈានមុខជាច្រើនដួងទៀតប្រចាំព្រះរាជាណាចក្រកម្ពុជាដូចជា «អ៊ុន សិទ្ធា, ប៉ែន ចំរ៉ុង, ជា សុវណ្ណនរាណ៍ ជា លាងឆែ និងលោក ណា ខុន» ដោយគ្រាន់តែឃើញឈ្មោះភ្លាម អ្នកគាំទ្រទទួលស្គាល់ជាស្រេចហើយថាតារាទាំង ៤ដួងនេះ សម្ដែងតែតួឯកប៉ុណ្ណោះ កម្រណាស់នឹងសម្ដែងជាតួរង។
ប៉ាន់ខែម ម៉ានូ ថ្វីត្បិតតែជាតារាថ្មីប៉ុន្តែដោយមានបុគ្គលិកលក្ខណៈសម្បត្តិជាពិសេសរូបរាងស្រដៀងទៅនឹងសម្ដេចអគ្គមហាសេនាបតីតេជោ ហ៊ុន សែន ទើបធ្វើឱ្យលោកទទួលបានឱកាសបានសម្ដែងជាតួអង្គឯកឬតួអង្គមេបញ្ជការ សំរេច នៅក្នុងភាពយន្តចម្រៀង និងខ្សែភាពយន្តភាគស្ដីពីប្រវត្តិសាច់រឿងរបស់ថ្នាក់ដឹកនាំកំពូល។
ប៉ាន់ ខែមម៉ានូ គឺជាអ្នកសិល្បករបុរាណមួយរូបមានកំណើតនៅខេត្តតាកែវ ហើយលោកគឺជាប្អូនបង្កើតរបស់លោកប៉ាន់ ខែមប៊ុនថន ដែលជានាយករងខុទ្ទកាល័យសម្ដេចតេជោហ៊ុន សែន។ កន្លងមកលោកធ្លាប់បានសម្ដែងក្នុងបទចម្រៀងប្រវត្តិសម្ដេចតេជោហ៊ុនសែនម្ដងរួចហើយកាលពីឆ្នាំ២០១៧ គឺរឿងកំសត់កូនពុក ដែលនិពន្ធដោយបងប្រុសរបស់លោកផ្ទាល់គឺលោកប៉ាន់ ខែមប៊ុនថន និងថតហើយនិងកាត់តដោយបងប្រុសម្នាក់ទៀតឈ្មោះ ប៉ាន់ ខែមវឌ្ឍនា។ តាមរយៈការសម្ដែងនេះហើយ បានធ្វើឱ្យសម្ដេចតេជោហ៊ុនចាប់អារម្មណ៍និងផ្ដល់ឱកាសឱ្យលោកបានថតរឿងកូនប្រុសក្រោមពន្លឺព្រះច័ន្ទពេញបូណ៌មីបន្តទៀត។
មុនក្លាយជាតួអង្គសម្ដេចតេជោ ប៉ាន់ខែម ម៉ានូ ធ្លាប់សម្ដែងល្ខោនយីកេ ល្ខោនបាសាក់ ប៉ុន្តែនៅពេលងាកមកសម្ដែងក្នុងខ្សែភាពយន្តវិញគឺលោកទទួលស្គាល់ថាខុសគ្នាស្រឡះ ពោលគឺមានភាពពិបាកនិងត្រូវការមានការ
បណ្ដុះបណ្ដាលបន្ថែមពីអ្នកដឹកនាំរឿងនិងរៀមច្បងៗ ដើម្បីឱ្យរឿងនេះទទួលបានជោគជ័យ ៕
ទស្សនាព័ត៌មានជាវីដេអូខាងក្រោម៖
