នៅព្រឹកថ្ងៃទី១០ ខែមករា ឆ្នាំ២០២៣ អ្នកចាំទីដៃទី១ Hugo Lloris បានប្រកាសចូលនិវត្តន៍ពីក្រុមជម្រើសជាតិបារាំង ក្នុងវ័យ៣៦ឆ្នាំ ក្រោយចប់ព្រឹត្តិការណ៍ World Cup ២០២២ នៅប្រទេសកាតា ដោយចាញ់អាហ្សង់ទីន នៅវគ្គផ្តាច់ព្រ័ត្រ បាល់កាត់សេចក្តី១១ម៉ែត្រ ៤-២ បន្ទាប់ពីស្មើគ្នា ៣-៣ ទាំងម៉ោងធម្មតា ៩០នាទី និងម៉ោងបន្ថែម ១៥នាទី២ដង។
ក្រោយប្រកាសចូលនិវត្តន៍ Hugo Lloris បានថ្លែងដូច្នេះថា៖«ពេលនេះខ្ញុំបានសម្រេចឈប់ពីជម្រើសជាតិហើយ ជាមួយអារម្មណ៍ដែលខ្ញុំបានផ្ដល់គ្រប់យ៉ាងរួចរាល់។ ខ្ញុំគិតថាវាគឺជាការសម្រេចចិត្តដ៏សំខាន់នៅពេលនេះ ២ខែកន្លះមុនពេលការជម្រុះ Euro ឈានមកដល់»។
នៅក្នុងក្រុមជម្រើសជាតិបារាំង អ្នកចាំទី Hugo Lloris បង្ហាញខ្លួនបាន ១៤៥ប្រកួត ធ្វើឲ្យគេក្លាយជាកីឡាករបង្ហាញខ្លួនប្រកួតបានច្រើនជាងគេ និងពាក់ស្លាកដៃប្រធានក្រុមច្រើនជាងគេសរុប ១៤៥ដង ចាប់ពីឆ្នាំ ២០០៨ រហូតដល់ឆ្នាំ ២០២២។
ស្នាដៃសំខាន់របស់អ្នកចាំទី Hugo Lloris៖
-ជួយឲ្យបារាំង ឈ្នះពាន UEFA European Under-19 Championship នៅឆ្នាំ ២០០៥
-ជួយឲ្យបារាំង ឈ្នះពាន World Cup ឆ្នាំ ២០១៨ និងជើងឯករង ឆ្នាំ ២០២២
-ជួយឲ្យបារាំង ឈ្នះពាន UEFA Nations League ឆ្នាំ ២០២០
-ជួយឲ្យបារាំង ទទួលជើងឯករង Euro ឆ្នាំ ២០១៦។
ប៉ុន្តែយ៉ាងណាមិញ Hugo Lloris នៅបន្តលេងឲ្យក្លិបបាល់ទាត់ Tottenham Hotspur FC ដដែលក្រោមការដឹកនាំរបស់លោក Antonio Conte នៅក្នុងពានរង្វាន់ Premier League, FA Cup និង UEFA Champion League រដូវកាល ២០២២-២៣៕