ភាពយន្តភាគបុរាណបែបព្រេងនិទាន «មាយាដកខ្ញី» ផលិតឡើងយ៉ាងសម្រិតសម្រាំងពីផលិតកម្ម DR Production ក្រោមស្នាដៃដឹកនាំដោយលោក Ly Chandy (លី ចាន់ឌី) គ្រប់គ្រងការផលិតដោយ Mr.Royce កំពុងតែត្រៀមខ្លួនមកបម្រើចំណីចក្ខុប្រិយមិត្តទស្សនិកជនក្នុងពេលឆាប់ៗនេះលើកញ្ចក់ទូរទស្សន៍ CTN កម្ពុជា។ យ៉ាងណាមិញ ត្រយងសួមលើកយកមកសង្ខេបដោយត្រួសៗ ចំណុចសំខាន់ៗចំនួន៣ ដែលអ្នកនិយមទស្សនារឿងភាគខ្មែរមិនគួរ មើលរំលងភាពយន្តភាគមួយនេះ។
១. រឿងនេះជារឿងព្រេងនិទានរបស់ខ្មែរពីជំនាន់ដើម ហើយត្រូវបានលើកយកមកផលិតឡើងវិញយ៉ាងសម្រិតសម្រាំង ទាំងគុណភាពរូប ការប្រើប្រាស់បច្ចេកទេសថតទំនើប ការបញ្ចូលនូវពាក្យពេចន៍ថ្មី ប្លែកអារម្មណ៍អ្នកទស្សនា ជាពិសេសការជ្រើសរើសតួអង្គសម្ដែងថ្មីៗ ស្អាតៗ និងមានទេពកោសល្យសម្ដែងខ្ពស់។
២. ការផលិតរឿងនេះឡើង គឺចូលរួមថែរក្សានិងអភិរក្សរឿងព្រេងនិទានខ្មែរ ឱ្យក្មេងៗជំនាន់ក្រោយ យុវជន យុវនារី ដែលនៅមិនទាន់បានដឹង និង ស្គាល់ពីរឿងភាគនេះបានយល់កាន់តែច្បាស់ តាមរយៈការបញ្ចូលនូវខ្លឹមសារអប់រំ បង្កប់ដោយទស្សនៈវិជ្ជា ពិសេសឆ្លុះបញ្ចាំងពីសីលធម៌ និង ការរស់នៅសង្គម បង្ហាញឱ្យមនុស្ស យល់ពីបុណ្យ ចេះខ្លាចបាប ប្រព្រឹត្តអំពើអាក្រក់ នឹងទទួលលទ្ធផលអាក្រក់ ។ ពិសេសជាងនោះទៀត ដើម្បីបញ្ជាក់ឱ្យសាធារណជន ឈប់មានការភ័ន្តច្រឡំ រវាងរឿងបុរាណនិទាន «មាយាស្ត្រី» និងរឿងនិទាន «មាយាដកខ្ញី» គឺជារឿងពីរផ្សេងគ្នា។
៣. រឿងព្រេងដែលមានចំនួនត្រឹម១០ភាគ ប៉ុន្តែចំណាយពេលថតយ៉ាងយូរ ដោយសារតែដំណើរការថតចំពេលផ្ទុះព្រឹត្តិការណ៍សហគមន៍ ២០កុម្ភៈ ធ្វើឱ្យការថតនិងផលិតរឿងនេះត្រូវផ្អាកដំណើរការរយៈពេលវែង ប៉ុន្តែនៅពេលត្រលប់មកថតវិញ ក្រុមការងារ ក៏ដូចជាតួអង្គមានការតាំងចិត្តខ្ពស់ មិនខ្លាចនឿយហត់ តាំងពីព្រលឹងម ទល់ព្រលប់ ធ្វើយ៉ាងណាបញ្ចប់ស្នាដៃរឿងនេះប្រកបដោយគុណភាពជាផ្ទាំងទស្សនីយភាពដ៏ល្អសម្រាប់អ្នកទស្សនា។
យោងតាមការបញ្ជាក់របស់ លោក ថន ណារ៉ុង ដែលជា AD រឿងភាគ «មាយាដកខ្ញី» ក៏បានបញ្ជាក់បន្ថែមទៀតដែរថា ក្រុមការងារថតជួបឧបសគ្គជាច្រើនដោយសារតែបញ្ហាជំងឺកូវីដ-១៩ ការងារថតតម្រូវឱ្យមានការរឹតបន្តឹងនិងផ្ដោតការរក្សាអនាម័យនិងគំលាតតាមការណែនាំរបស់រដ្ឋាភិបាល។
ក្នុងនាមជាតំណាងឱ្យក្រុមការងារថតរៀង «មាយាដកខ្ញី» លោក ថន ណារ៉ុង បានមានជាមតិស្នើសុំទៅកាន់មជ្ឈដ្ឋានមហាជនឱ្យចូលរួមជួយគាំទ្រស្នាដៃរឿងភាគបុរាណបែបព្រេងនិទានខ្មែរ ដែលផលិតដឹកនាំដោយកូនខ្មែរ សម្ដែងដោយកូនខ្មែរ ដើម្បីលើកស្ទួយសិល្បៈវប្បធម៌ជាតិខ្មែរ ព្រោះរឿងនេះផលិតករ អ្នកដឹកនាំ ក្រុមការងារ និង តួសម្ដែងបានរួមគ្នាជាធ្លុងមួយ ទោះជាត្រូវជួបឧបសគ្គនៃ ជំងឺកូវីដ-១៩ ក៏នៅតែព្យាយាមបញ្ចប់រឿងនេះ ដើម្បីបំរើអារម្មណ៍អ្នកនិយមទស្សនារឿងព្រេងបុរាណ៕
