សហព័ន្ធកីឡាហែលទឹកម៉ាឡេស៊ី នឹងបញ្ចូនតែអត្តពលិកកីឡាលោតទឹកវ័យក្មេងប៉ុណ្ណោះ ដើម្បីចូលរួមប្រកួតក្នុងព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ នៅប្រទេសកម្ពុជា នាខែឧសភាខាងមុខនេះ។
កីឡាលោតទឹក (Diving) គឺជាប្រភេទកីឡាដែល ម៉ាឡេស៊ី ខ្លាំងជាងគេក្នុងចំណោមប្រទេសទាំង ១១ ប្រចាំតំបន់ ដ្បិតបានដណ្ដើមចំណាត់ថ្នាក់កំពូលតារាងនាមជាប្រទេសដែលឈ្នះមេដាយមាសច្រើនជាងគេ ៩សម័យកាលជាប់ៗគ្នា គិតចាប់តាំងពីឆ្នាំ២០០៥។
ជំនួយការគ្រូបង្វឹកជម្រើសជាតិ លោកស្រី Leong Mun Yee បាននិយាយថា ក្រុមអត្តពលិកលោតទឹកជម្រើសជាតិម៉ាឡេស៊ីទើបតែចាប់ផ្តើមហ្វឹកហាត់កាលថ្ងៃពីម្សិលមិញ នៅមជ្ឈមណ្ឌលជាតិ Aquatic Centre Bukit Jalil បន្ទាប់ពីបញ្ចប់ការប្រកួតកីឡាលោតទឹក FINA Malaysia Grand Prix (GP) កាលពីខែវិច្ឆិកាឆ្នាំមុន។
លោកស្រីបានមានប្រសាសន៍ថា៖ «ការប្រកួតកីឡាស៊ីហ្គេម លើកទី៣២ នៅកម្ពុជា ដែលនឹងប្រព្រឹត្តទៅចាប់ពីថ្ងៃទី០៥ ដល់ថ្ងៃទី១៧ ខែឧសភា គឺជាការប្រកួតដែលកៀកបំផុតក្នុងប្រតិទិនប្រកួតរបស់សហព័ន្ធកីឡាហែលទឹកម៉ាឡេស៊ី បន្ទាប់មកគឺការប្រកួតជើងឯកពិភពលោកឆ្នាំ២០២៣ នាទីក្រុង Fukuoka ប្រទេសជប៉ុន នៅខែកក្កដានេះ និងកីឡាអាស៊ី (Asian Games) លើកទី១៩ នៅទីក្រុង Hangzhou ប្រទេសចិន ក្នុងខែកញ្ញា»។
ម្ចាស់មេដាយមាស ១៧គ្រឿង លើកីឡាលោតទឹក នៃស៊ីហ្គេមរូបនេះបានបញ្ជាក់ថា៖ «អ្នកលោតទឹកដែលមានមានបទពិសោធនឹងមិនទៅស៊ីហ្គេមកម្ពុជាទេ មានតែអ្នកលោតទឹកបម្រុង និងអ្នកលោតទឹកវ័យក្មេងប៉ុណ្ណោះដែលនឹងត្រូវបញ្ជូនទៅទីនោះ។ ដូច្នេះ សូម បញ្ជាក់ ថា អ្នកលោតទឹក ដូចជា Pandelela Rinong, Nur Dhabitah Sabri និង Ooi Tze Liang នឹង មិនត្រូវបញ្ជូនមកកម្ពុជាទេ»។
លោកស្រីបាននិយាយនៅពេលទាក់ទងដោយសារព័ត៌មាន Bernama ថា ៖«យើងពិតជាចង់បង្ហាញអ្នកលោតទឹកវ័យក្មេង (ទៅកាន់ការប្រកួតធំៗ) ពីព្រោះប្រសិនបើមានតែមនុស្សចាស់ទៅ នោះពួកគេនឹងមិនមានឱកាស (ដើម្បីបង្ហាញពីទេពកោសល្យរបស់ពួកគេ)»។
លោកស្រី Mun Yee បានបន្ថែមថា ក្នុងចំណោមឈ្មោះអត្តពលិកលោតទឹកវ័យក្មេងដែលមានទេពកោសល្យ និងត្រូវបានដាក់បញ្ចូលគឺ កីឡាករ Enrique Maccartney Harold និងកីឡាករ Bertrand Rhodict ដែលអ្នកទាំងពីរមានវ័យ ១៨ឆ្នាំដូចគ្នា ដើម្បីតំណាងឱ្យប្រទេស។
នៅក្នុងការប្រកួតកីឡាស៊ីហ្គេម លើកទី៣១ នៅកីឡដ្ឋាន My Dinh Water Sports ទីក្រុងហាណូយ កាលពីខែឧសភា ឆ្នាំ២០២២ កន្លងទៅ អត្តពលិកកីឡាលោតទឹកម៉ាឡេស៊ី បានបន្តក្លាយជាប្រទេសដែលខ្លាំងនៅស៊ីហ្គេម ដោយបានក្លាយជាក្រុមជើងឯក រួមជាមួយនឹងមេដាយមាស ចំនួន ៨គ្រឿង ប្រាក់ ៣គ្រឿង និងសំរឹទ្ធ ១គ្រឿង។
យោងតាមការសម្រេចជាផ្លូវការ កាលបរិច្ឆេទនៃការប្រកួតព្រឹត្តិការណ៍កីឡាទាំង២នេះ គឺគ្រោងនឹងធ្វើនៅពាក់កណ្ដាល ឆ្នាំ២០២៣ ពោលគឺការប្រកួតស៊ីហ្គេម ចាប់ផ្ដើមមុន រួចទើបការប្រកួតអាស៊ានប៉ារ៉ាហ្គេម ចាប់ផ្ដើមជាក្រោយ បានសេចក្ដីថា រំលងពីគ្នារយៈពេល ១៧ថ្ងៃ។
ព្រឹត្តិការណ៍កីឡាអាស៊ីអាគ្នេយ៍ លើកទី៣២ (32nd SEA Games) នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ (12th ASEAN Para Games) នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕
ប្រភព៖ cambodia 2023