ព្រះករុណាជាអម្ចាស់ជីវិតលើលើត្បូង ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានចេញព្រះរាជក្រឹត្យ ត្រាស់បង្គាប់តែងតាំង សម្ដេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី ជា សម្ដេចព្រះរាជគ្រូព្រះប្រធាន មណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី។ នេះបើតាមព្រះរាជក្រឹត្យដែលត្រូវបានផ្ញើជូនមកសារព័ត៌មានត្រយងដោយឯកឧត្តម ងួន ស្ដេចភក្ដី អនុរដ្ឋលេខាធិការក្រសួងធម្មការ និងសាសនា និងជាសាកលវិទ្យាធិការរងពុទ្ធិកសាកលវិទ្យាល័យព្រះសីហមុនីរាជា។
មណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី ផ្តួចផ្តើមកសាងដោយសម្តេចព្រះអភិសេរីសុគន្ធា មហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជនៃគណៈធម្មយុត្តិកនិកាយ នៃព្រះរាជាណាចក្រកម្ពុជា ដែលបានចាប់ផ្តើមកសាងដំបូងនៅថ្ងៃទី១០ ខែមីនា ឆ្នាំ២០២២ លើផ្ទៃដីជាង៤ ០០០ម៉ែត្រការ៉េ។ ទីតាំងមណ្ឌល មានចម្ងាយប្រហែល៥គីឡូម៉ែត្រពីប្រាសាទអង្គរតូច ឬប្រហែល៣គីឡូម៉ែត្រពីប្រាសាទអង្គរធំ ស្ថិតនៅភូមិគោកបេង សង្កាត់គោកចក ក្រុងសៀមរាប។
ព្រះករុណាជាអម្ចាស់ជីវិតលើត្បូង បានសព្វព្រះរាជហឬទ័យ សម្ដេចយាងប្រារព្ធព្រះរាជពិធីសម្ពោធ មណ្ឌលព្រះកម្មដ្ឋាន ព្រះករុណាព្រះមហាក្សត្រ សីហមុនី កាលព្រឹកថ្ងៃទី១៨ខែធ្នូ ឆ្នាំ២០២២ និងបានមានព្រះរាជបន្ទូលថាមណ្ឌលព្រះកម្មដ្ឋាន ស័ក្តិសមប្រពៃណាស់ ដែលត្រូវបានសាងសង់នៅទីនេះ ព្រោះជាភូមិឋានត្រជាក់ត្រជំក្នុងរមណីយដ្ឋានអង្គរដែលគ្រប់គ្រងដោយអាជ្ញាធរជាតិអប្សរា និងអាជ្ញាធរខេត្តសៀមរាប និងបានប្រទានពរមណ្ឌលព្រះកម្មដ្ឋាននេះមានដំណើរការប្រកបដោយជោគជ័យ និងទទួលបានការឧបត្ថម្ភគាំទ្របន្ថែមទៀតពីគ្រប់ជ្ឈដ្ឋានជាតិ និងអន្តរជាតិ និងសប្បុរសជននានា ដើម្បីរួមចំណែកថែរក្សាការពារ និងអភិវឌ្ឍន៍វិស័យព្រះពុទ្ធសាសនា៕