នៅព្រឹកថ្ងៃអាទិត្យ ទី១៥ ខែមករា ឆ្នាំ២០២៣ ក្លិបបាល់ទាត់វិសាខា ក្រោមការដឹកនាំរបស់លោក Simon McMenemy បានប្រកាសចែកផ្លូវជាមួយខ្សែការពារ ធារី ចន្ថាប៊ីន ក្រោយរួមរស់អស់រយ:ពេល២រដូវកាលមកនេះ។
កីឡាករកូនខ្មែរ-បារាំង បានចូលរួមជាមួយវិសាខា នៅដើមរដូវកាល២០២១ បន្ទាប់ពីលេងនៅលីគកំពូលម៉ាឡេស៊ី អស់រយ:ពេល៣ឆ្នាំ ពោលនៅ Terrenganu FA ២ឆ្នាំ និង Perak FA ១ឆ្នាំ។ រួមចំណែកជួយវិសាខា ឈ្នះជើងឯកសម្ដេចតេជោ ហ៊ុន សែន រដូវកាល ២០២១ និង២០២២។
ក្រៅពីនេះក្លិបបាល់ទាត់វិសាខា ក៏បានប្រកាសតែងតាំងលោក មាស ចាន់ណា ជានាយកបច្ចេកទេស, លោក Sarunas Biciusas ជាគ្រូបង្វឹកកាយសម្បទា, លោក Daryl Martin Willard ជាគ្រូជំនួយរបស់ក្រុមធំ និងជាអ្នកគ្រប់គ្រងក្រុមយុវជនថ្នាល និងបន្ដកិច្ចសន្យាថ្មីជាមួយលោក Tunji Ayoyinka Akeeb ក្នុងតួនាទីជាគ្រូជំនួយ។
ចំពោះការចាកចេញរបស់កីឡាករ ធារី ចន្ថាប៊ីន ក្លិបបាល់ទាត់វិសាខា ក៏បានប្រកាសអំពីការវិលត្រលប់របស់ខ្សែការពារអាហ្វ្រិកខាងត្បូង Khan Mohammed Faeez ជាមួយកិច្ចសន្យារហូតដល់ឆ្នាំ២០២៤ បន្ទាប់ពីខ្សែការពាររូបនេះ បានព្យាបាលរបួសជាសះស្បើយ ១០០% ដើម្បីត្រៀមប្រយុទ្ធលើសមរភូមិវាលស្មៅ នារដូវកាលថ្មី ឆ្នាំ២០២៣ ខាងមុខ៕
