នៅយប់ថ្ងៃអាទិត្យ ទី២២ ខែមករា ឆ្នាំ២០២៣ ខ្សែប្រយុទ្ធ Nick Taylor កូនកាត់ខ្មែរ-អាមេរិក បានបង្ហោះសារលាក្រុម Orlando City SC «B» ដូច្នេះថា៖«Gracias por todo Orlando មានន័យថា អរគុណសម្រាប់អ្វីគ្រប់យ៉ាង Orlando ទីក្រុងដែលផ្លាស់ប្តូរជីវិតខ្ញុំ អរគុណសម្រាប់អ្វីៗគ្រប់យ៉ាង, រីករាយសម្រាប់ជំហានបន្ទាប់»។
ខណ:សមាជិកនៅលីគកំពូលកម្ពុជា ជាច្រើនដូចជា បឹងកេត, វិសាខា, ភ្នំពេញក្រោន ព្រះខ័នរាជស្វាយរៀង ឬ ណាហ្គាវើល ត្រៀមស្វាគមន៍ និងកំពុងតែចង់ចរចាឃាត់ទុកកីឡាកររូបនេះឱ្យប្រកបអាជីពនៅស្រុកកំណើតខាងម្តាយ ខ្លួនម្តង។
ក្នុងវ័យ២៤ឆ្នាំ Nick Taylor មានកម្ពស់១.៧៨ម៉ែត្រ ធ្លាប់ជាសមាជិកថ្នាលយុវជនរបស់ក្រុម Dallas Texans, New Mexico Lobos, SMU Mustangs និង UCF Knights មុនផ្លាស់ទៅប្រកបអាជីពជាមួយក្រុម Orlando City B នៅដើមឆ្នាំ ២០២២ ព្រមទាំងបង្ហាញខ្លួនបាន១៣១៤នាទី ពោលគឺ២២ប្រកួតពេញក្នុងពានរង្វាន់ MLS NEXT PRO ពានរង្វាន់លីគទី៣ នៅសហរដ្ឋអាមេរិក។
គួរដឹងថាក្រោយចប់បេសកកម្មក្នុងក្រុមជម្រើសជាតិកម្ពុជា កាលពីពេលថ្មីៗ ខ្សែប្រយុទ្ធ Nick Taylor កូនកាត់ខ្មែរ-អាមេរិក មិនទាន់ត្រឡប់ទៅកាន់ទឹកដីសហរដ្ឋអាមេរិកវិញនៅឡើយ ស្របពេលដែលគេឃើញវត្តមានរបស់របស់គេជាមួយតារាចម្រៀង រ៉ាប៊ី កាលពីពេលថ្មីៗ។
កញ្ញារ៉ាប៊ី ដែលមហាជនស្គាល់នាងតាមរយៈបទចម្រៀងចង្វាក់ញាក់មួយចំនួនដូចជា បទមាន់ស្រែ, រហែកតែខោ ជាដើមនោះ បានបង្ហោះរូបភាពនិងខ្លឹមសារមួយចំនួននៅលើទំព័រហ្វេសប៊ុករបស់នាង ដែលភ្ជាប់ជាមួយរូបថតរបស់កីឡាករ Nick Taylor អមដោយពាក្យ៖«ប្រជុំដោយកំពូលមនុស្ស ! មាននៅក្នុងMV បទថ្មីរបស់នាងខ្ញុំ! Coming soon !»
ចំណែកខ្សែប្រយុទ្ធ Nick Taylor កូនកាត់ខ្មែរ-អាមេរិក ដែលមានម្តាយជាជនជាតិខ្មែរ និងឪពុកជនជាតិអាមេរិក បានធ្វើដំណើរមកកាន់ប្រទេសកម្ពុជា ២លើកហើយក្រោយមានការកោះហៅពីសហព័ន្ធកីឡាបាល់ទាត់កម្ពុជា ដោយក្នុងនោះបង្ហាញខ្លួនបាន៣ប្រកួត រកគ្រាប់បាល់បាន១គ្រាប់ និងត្រូវពិន័យកាតលឿង១សន្លឹកផងដែរ៕
