ក្លិបបាល់ទាត់ព្រះខ័នរាជស្វាយរៀង ក្រោមការដឹកនាំរបស់លោក Conor Nestor បានប្រកាសនាំចូលខ្សែប្រយុទ្ធប្រេស៊ីល Iago Bento Fernandes អតីតសមាជិករបស់អង្គរថាយហ្គឺរ ត្រៀមសម្រាប់លីគកំពូលកម្ពុជារដូវកាល ២០២៣-២៤។
កីឡាករ Iago Bento មានវ័យ ២៣ឆ្នាំ កម្ពស់ ១.៧ម៉ែត្រ សញ្ជាតិប្រេសុីល ធ្លាប់ជាយុវជនរបស់ក្លិប Atletico MG និង Coritiba FC នៃប្រទេសប្រេសុីល មុនមកកាន់ប្រទេសកម្ពុជាដោយចូលរួមជាមួយអង្គរថៃហ្គឺរ នៅឆ្នាំ ២០២១។
ក្រៅពីនេះព្រះខ័នរាជស្វាយរៀង ក៏បានប្រកាសនាំចូលខ្សែការពារកណ្តាល ធារី ចន្ថាប៊ីន ដែលទើបចែកផ្លូវជាមួយវិសាខា ក្រោយរួមរស់នៅកីឡដ្ឋានព្រីនស៍ អស់រយ:ពេល២រដូវកាលមកនេះ។
កីឡាករកូនខ្មែរ-បារាំង បានចូលរួមជាមួយវិសាខា នៅដើមរដូវកាល២០២១ បន្ទាប់ពីលេងនៅលីគកំពូលម៉ាឡេស៊ី អស់រយ:ពេល៣ឆ្នាំ ពោលនៅ Terrenganu FA ២ឆ្នាំ និង Perak FA ១ឆ្នាំ។ រួមចំណែកជួយវិសាខា ឈ្នះជើងឯកសម្ដេចតេជោ ហ៊ុន សែន រដូវកាល ២០២១ និង២០២២។
ក្លិបបាល់ទាត់ព្រះខ័នរាជស្វាយរៀង ក៏បានប្រកាសអំពីការបន្តកិច្ចសន្យាថ្មីជូនខ្សែប្រយុទ្ធ Marcus Haber និង ខ្សែការពារកណ្តាល Takashi Odawara ចំនួន១ឆ្នាំបន្ថែមទៀត គឺសម្រាប់រដូវកាល ២០២៣-២០២៤ នេះ។
Marcus Haber ខ្សែប្រយុទ្ធជនជាតិកាណាដា គឺជាកីឡាករសំខាន់របស់លោក Conor Nestor នៅលីគកំពូលកម្ពុជា កាលពីរដូវកាល ២០២២ បន្ទាប់ពីស៊ុតបញ្ចូលទីសរុបចំនួន២៥គ្រាប់ ក្នុងចំណោមការបង្ហាញខ្លួន២៧ប្រកួត ព្រមទាំងក្រសោបបានពានរង្វាន់ធំៗចំនួន៣ម្នាក់ឯង ក្នុងកម្មវិធី CPL FOOTBALL AWARD 2022។
ដោយឡែកខ្សែការពារ Takashi Odawara ខ្សែការពារជនជាតិជប៉ុន ធ្លាប់ប្រកបអាជីពទាំងនៅលីគកំពូលប្រទេសហ្វីលីពីន និងម៉ាល់ឌីវ ចូលរួមជាមួយព្រះខ័នរាជស្វាយរៀង កាលពីរដូវកាលមុន ដោយបង្ហាញខ្លួន ២៣លើក និងស៊ុតទាត់បញ្ចូលទីបាន ១គ្រាប់។ខណ:រូបគេក៏រួមចំណែកការពារសំណាញ់ទីមិនឲ្យរបូតច្រើនប្រកួតដូចគ្នាផងដែរ ក្នុងនាមជាខ្សែការពារកណ្តាល។
ជាពិសេសកីឡាករចំណូលថ្មីចំនួន៤រូបបន្ថែមទៀត គឺអ្នកចាំទី វីរៈ ដារ៉ា ពីវិសាខា, ខ្សែប្រយុទ្ធ ណារ៉ុង កក្កដា ពី Tiffy Army, ខ្សែបម្រើ គួច ដានី ផ្លាស់ពីណាហ្គាវើលដ៍ និង ខ្សែការពារស្លាប សេត រ៉ស៊ីប ពីបឹងកេត ដើម្បីត្រៀមប្រកួតប្រជែងពានរង្វាន់នានានៅឆ្នាំ ២០២៣ នេះ៕
