Andy Lau ឬ លីវ តឺហួរ គឺជាតារាចម្រៀង និង តារាសម្ដែងហុងកុងដ៏ល្បីល្បាញបំផុតមួយរូប បើយោងតាមគេហទំព័រ imdb ដែលជាវែបសាយផ្ដោតលើភាពយន្តដ៏ធំមួយនោះ តារារូបនេះមានសមិទ្ធិផលរឿងជិត១៧០រឿង។ ក្នុងចំណោមរឿងដែលតារានេះសម្ដែង ប្រិយមិត្តអ្នកគាំទ្រមួយចំនួនប្រហែលជាមិនបានដឹងទេថា មានភាពយន្តចំនួន ៥រឿង ដែលតារារូបនេះសម្ដែងហើយត្រូវបានចាត់ចូលថាជាភាពយន្តដែលអន់បំផុត។ ខាងក្រោមនេះគឺជាភាពយន្តអន់បំផុតចំនួន៥ នៅក្នុងជីវិតរបស់ លីវ តឺហួរ ៖
១. Switch
ភាពយន្តវាយប្រហារបែបទាត់ធាក់ ដែលអ្នកផលិតចង់ធ្វើឱ្យធំដុំនិងលេចធ្លោរដូចជាភាពយន្ត James Bond តែជាលទ្ធផលចេញមក ខុសពីការរំពឹងយ៉ាងខ្លាំង ព្រោះបានទទួលពិន្ទុត្រឹម ៣ ក្នុងចំណោមពិន្ទុពេញ ១០។ ទោះជារឿងនេះត្រូវបានអ្នកវិភាគនិងហ្វេនរិះគន់ខ្លាំង ហើយចាត់ចូលជាភាពយន្តដែលអន់បំផុតក្នុងជីវិតតារារូបនេះ តែសមីខ្លួនមិនបានខូចចិត្តនោះទេ ព្រោះយ៉ាងហោចណាស់រឿងនេះអាចរកប្រាក់កម្រៃបាន មិនខាតដើមទុន។
២. Mission Milano
ភាពយន្តកំប្លែងលាយផ្សងគ្រោះថ្នាក់ ដែលប្រើដើមទុនច្រើនទៅថតដល់ក្រៅប្រទេស ទេសភាពស្អាតៗ តុបតែងខ្លួនដោយសំលៀកបំពាក់ឡូយឆាយ តែចុងក្រោយសាច់រឿងខ្សោយ គ្មានចំណុចទាក់ចិត្តអ្នកទស្សនា ទីបំផុតរឿងនេះទទួលបានពិន្ទុត្រឹម ៣.៣ ក្នុងចំណោមពិន្ទុពេញ១០។
៣. Future X Cops
ភាពយន្តនេះពេលចេញឃោសនាដំបូងមើលទៅគួរឱ្យចាប់អារម្មណ៍ណាស់ មើលទៅប្រៀបដូចជា Iron Man របស់ប្រទេសចិនដីគោក តែពេលបញ្ចេញវីដេអូខ្លីរឿងនេះ អ្នកទស្សនាចាប់ផ្ដើមមានជាមតិរិះគន់ថារឿងនេះ មើលទៅដូចសម្លចាប់ឆាយ គ្មានអ្វីជាសាច់រឿងរួមមួយ ប្រៀបដូចជាយករឿងច្រើនមកផ្សំបញ្ចូលគ្នា។
៤. From Vegas To Macau3
ភាពយន្តនេះគ្រាន់តែឃើញឈ្មោះតួសម្ដែងអ្នកគាំទ្របានដាក់ក្ដីរំពឹងខ្ពស់ព្រោះមានទាំង លីវ តឺហួរ មានទាំង ចូវ យ៉ុនហ្វា ដែលជាតួសម្ដែងល្បីពីររូបរបស់ហុងកុងមកជួបសម្ដែងជាមួយគ្នាម្ដងទៀត ប៉ុន្តែពេលទស្សនាអ្នកគាំទ្របង្ហាញការខកចិត្ត ព្រោះសាច់រឿងបែរជាផ្ដោតលើឈុតកំប្លែងជាជាងឈុតវាយតប់ទៅវិញ ទីបំផុតលទ្ធផលដែលទទួលបានក្រៅពីការរិះគន់របស់អ្នកទស្សនាហើយនោះ ពិន្ទុដែលទទួលបានពីវែបសាយចាត់លំដាប់ថ្នាក់រឿងបានត្រឹមតែ ៤.៣ ប៉ុណ្ណោះ។
៥. The Great Wall
ភាពយន្តនេះអាចចាត់ទុកថាជាភាពយន្តលំដាប់ហូលីវូដ ដែលមិនត្រឹមតែមាន លីវ តឺហួរប៉ុណ្ណោះទេ តែក៏មានតារាបរទេស Tony Gilroy មកជួយសរសេរសេណារីយ៉ូឱ្យ ប៉ុន្តែភាពយន្តសត្វចម្លែករឿងនេះបែរជាចេញមកអន់ ក្លាយជាភាពយន្តអន់ថយ ដែលបានទទួលពិន្ទុ ខ្ពស់បំផុតត្រឹម ៤.៩ ៕
