សិល្បៈជាតិ៖ ស៊ីន យូប៊ីន នៅតែខ្លាំងនិងលេចធ្លោមិនថាចុងឆ្នាំ២០២២ ឬដើមឆ្នាំ២០២៣ ព្រោះចុងឆ្នាំ២០២២ កញ្ញា និងដៃគូយល់ចិត្តទាំងក្នុងការសម្ដែងនិងក្រៅឆាក ខាត់ វ៉ៃហាំង បានបណ្ដើរគ្នាត្រសងទៅទទួលពានរង្វាន់ចំនួន៥ ពីប្រទេសថៃនិងប្រទេសកូរ៉េ ខណៈនៅដើមឆ្នាំ២០២៣ កញ្ញាក្ដាប់បានឱកាសធំមួយទៀតគឺទៅចូលរួមក្នុងកម្មវិធីដ៏ធំ Dior និងជួបជាមួយនឹងសមាជិក Blackpink’s Jisoo ផងដែរ។
យោងតាមរយៈផេក ខ្សែភាពយន្ដខ្មែរ តារាខ្មែរ បានបង្ហោះចែករំលែកដំណឹងនៅព្រឹកថ្ងៃទី២៤ ខែមករា នេះបានឱ្យដឹងថាតួឯកស្រីពីភាពយន្ត លួចស្នេហ៍គូដណ្ដឹង នឹងមានវត្តមានកិត្តិយសនៅក្នុងកម្មវិធី Dior FW មិនតែប៉ុណ្ណោះកញ្ញាយើងក៏នឹងមានឱកាសជួប Kim Jisoo (Blackpink) ដែលជាទូតសុច្ឆន្ទៈរបស់ក្រុមហ៊ុន Dior ក៏ដូចជាតារាល្បីៗជាច្រើនដួងទៀតផងដែរ។
«ចូលរួមអបអរតារាសម្ដែងខ្មែរ«សុីនយ៊ូប៊ីន» ដែលបានចូលរួមកម្មវិធី Dior FW ហើយក៏បានជួបកញ្ញា Kim Jisoo ជាតារាស្រីកូរ៉េដ៏ល្បីកក្រើកទូទាំងពិភពលោកហើយក៏ជាទូតសុច្ឆន្ទៈរបស់ក្រុមហ៊ុន Dior ផ្ទាល់ និងជួបតារាល្បីៗជាច្រើនទៀតផងដែរ*****យ៉ាងណាចូលរួមអបអរដល់យ៊ូប៊ីន ជាតារាក្នុងស្រុកលើកដំបូងបង្អស់ដែលបានចូលរួមកម្មវីធីដ៏ធំ១នេះ Shin Yubin។»
ថ្វីត្បិត យូប៊ីនគឺជាតារាទីមួយដែលបានទៅចូលរួមក្នុងកម្មវិធីធំលំដាប់អន្តរជាតិមួយនេះ ប៉ុន្តែកន្លងមកស្ត្រីខ្មែរដ៏លេចធ្លោមួយរូបទៀតគឺលោកជំទាវ យឹម ឆៃលីន ហ៊ុន ម៉ានី លោកជំទាវធ្លាប់បានបង្ហាញវត្តមានយ៉ាងកក្រើកនៅក្នុងកម្មវិធីធំៗជាច្រើនតបការអញ្ជើញរបស់អ្នករៀបចំដូចជា «Cannes Film Festival» ឆ្នាំ២០១៩ នៅប្រទេសបារាំង និង Paris Fashion Week ដែលបានរៀបចំឡើងនៅប្រទេសបារាំងដូចគ្នា ចាប់ពីថ្ងៃអង្គារ ទី២៨ ខែកញ្ញា រហូតដល់ថ្ងៃទី៦ ខែតុលា ឆ្នាំ២០២១ កន្លងទៅ ដោយកាលណោះកញ្ញា Jisoo ក៏មានវត្តមានចូលរួមផងដែរ។
ដំណឹងនៃវត្តមាន ស៊ីន យូប៊ីនក្នុងកម្មវិធីកម្រិតអន្តរជាតិនេះអាចចាត់ទុកជាសញ្ញាណវិជ្ជមានមួយសម្រាប់វិស័យសិល្បៈជាតិ ព្រោះមកទល់នឹងសព្វថ្ងៃនេះតារាកម្ពុជាច្រើនរូបហើយ កំពុងត្រូវបានបរទេសទទួលស្គាល់និងមានការចាប់អារម្មណ៍ជាពិសេស ដោយសារយើងមើលឃើញថាមួយរយៈចុងក្រោយនេះវត្តមានតារារបស់កម្ពុជាជាច្រើនត្រូវបានអញ្ជើញឱ្យចូលរួមជាកិត្តិយស និងទទួលបានពានរង្វាន់ផ្សេងៗពីក្នុងកម្មវិធីដូចជាកញ្ញា ស៊ីន យូប៊ីន និងលោក ខាត់ វ៉ៃហាំងទើបតែទទួលបានកាលពីចុងឆ្នាំ២០២២៕