សិល្បៈអន្តរជាតិ៖ តារាម៉ូដែល Jeremy Reuhlemann បានស្លាប់កាលពីថ្ងៃអាទិត្យ ដោយមកទល់នឹងថ្ងៃនេះនៅមិនទាន់មានសេចក្ដីរាយការណ៍ណាមួយបានទម្លាយឱ្យដឹងពីមូលហេតុនៃការស្លាប់របស់តារាវ័យ២៧ឆ្នាំរូបនេះនៅឡើយ ចំណែកឯដំណឹងនៃការស្លាប់នេះត្រូវបានមិត្តភក្ដិជិតស្និទ្ធិឈ្មោះ Gianni Simpson ទម្លាយតាមរយៈបណ្ដាញសង្គមហ្វេសប៊ុក។
បុរសដែលមានដើមកំណើតនៅរដ្ឋ New Jersey រូបនេះកាលនៅរស់លោកបានចាប់អាជីពជាតារាម៉ូដែលហើយជាតារាម៉ូដែលឈានមុខគេ បន្ទាប់ពីលោកបានបោះបង់ចោលការសិក្សាជំនាញផ្លូវចិត្តកាលពីឆ្នាំ ២០១៧ ហើយងាកមកតាមចាប់ក្ដីសុបិនធ្វើជាតារាម៉ូដែលអាជីព។ បន្ទាប់ពីនោះគេបានក្លាយជាតារាម៉ូដែលដ៏លេចធ្លោក្នុងវិស័យបង្ហាញម៉ូដ ដោយទទួលបានឱកាសបង្ហាញម៉ូដឱ្យ Brand ល្បីៗជាច្រើនដូចជា Christian Siriano, John Varvatos, Joseph Abboud, Superdry, Marcy’s Zar,Nick Graham និង Aterlier Cillian ជាដើម។
ក្រៅពីនេះ Jeremy ក៏បានក្លាយជាតំណាងឱ្យក្រុមហ៊ុនដូចជា Soul Artist Management, Next Model London, Miami, Core Hamburg,IMM និង Mgmt នៅស៊ីដនីផងដែរ។
មនុស្សនៅក្នុងវិស័យបង្ហាញម៉ូដបានចេញមកសម្ដែងអារម្មណ៍សោកស្ដាយនិងរំលែកទុក្ខចំពោះការបាត់បង់មនុស្សដ៏មានសមត្ថភាពដូចជា Jeremy នៅលើបណ្ដាញសង្គម។ មិនត្រឹមតែមនុស្សក្នុងវិស័យជាមួយគ្នានោះឡើយដែលសោកស្ដាយចំពោះការបាត់បង់រូបលោក មិត្តភក្ដិ និងអ្នកដែលស្គាល់បុរសវ័យក្មេងរូបនេះទាំងអស់ ក៏បានចេញមកសម្ដែងអារម្មណ៍កើតទុក្ខដូចគ្នាដែរ ក្នុងនោះមានដូចជា Andy Hilfiger, Uzo Adoba, Bruce Pask, Lexi Wood, Cory Bond និង Andrew Werner។
សារចុងក្រោយដែលគេបានបង្ហោះគឺ «ស្រលាញ់គ្រួសារអ្នក ឱ្យច្រើនដូចដែលពួកគេទាំងអស់ស្រលាញ់អ្នក»។ មិត្តសម្លាញ់បានចាត់ទុក Jeremy គឺជាបុរសដ៏សង្ហាម្នាក់ដែលបានផ្ដល់ក្ដីស្រលាញ់ចំពោះមនុស្សគ្រប់គ្នាដែលលោកបានជួបដោយគ្មានលក្ខខ័ណ្ឌ។
ប្រសិនបើមានដំណឹងអ្វីថ្មីទាក់ទងទៅនឹងមូលហេតុស្លាប់របស់តារារូបនេះសារព័ត៌មានត្រយងនឹងលើកយកមកជំរាបជូនជាបន្តទៀត៕
ប្រភព៖ footwearnews, nypost
