កាលពីយប់មិញនេះ (២៣ មិថុនា ២០២១) មានរឿងភ្ញាក់ផ្អើលមួយលើបណ្ដាញសង្គម លោក អេដវីន ត្រូវបានចាប់បញ្ជូនខ្លួនទៅឃុំឃាំងជាបណ្ដោះអាសន្ននៅពន្ធនាគារព្រៃស។ មានមតិមហាជនមួយចំនួនបានលើកឡើងជាចម្ងល់ថា ហេតុអ្វីនៅចាប់ឃុំខ្លួនតារាសម្ដែង អេដវីននៅពន្ធនាគារព្រៃស ព្រោះដៃគូស្នេហ៍របស់លោក អ្នកនាងសុទ្ធ បញ្ចកា បានដកពាក្យបណ្ដឹង និង មិនទាមទារសំណងអ្វីទាំងអស់ហើយនោះ?
ជាការពិតណាស់មុននឹងពន្យល់ទៅលើរឿងរ៉ាវខាងលើនេះ សូមរៀបរាប់ដំណើរដើមទងនៃសាច់រឿងដែលបង្កឱ្យមានជម្លោះរហូតឈានដល់ប្រើហិង្សាដោយយោងទៅតាម ពាក្យបណ្ដឹងរបស់អ្នកនាង សុទ្ធ បញ្ចកា ដែលបានចូលដាក់ពាក្យបណ្ដឹងនៅកងរាជអាវុធហត្ថរាជធានីភ្នំពេញកាលពីថ្ងៃទី១៧ ខែមិថុនា ឆ្នាំ២០២១ ដោយសង្ខេបខ្លី៖
«អ្នកនាង សុទ្ធ បញ្ចកា ជានិស្សិតអនុបណ្ឌិតផ្នែកគ្រប់គ្រងកាលពីឆ្នាំ២០១៤ លុះចូលឆ្នាំ២០១៥ បានរៀបការជាមួយនឹងបុរសម្នាក់ ហើយមានកូនរួមគ្នាពីរនាក់ តែនៅឆ្នាំ២០១៨ ដោយបញ្ហាមិនចុះសម្រុងគ្នា អ្នកនាងបានចែកផ្លូវគ្នាជាមួយស្វាមី ដោយចែកកូនស្រីម្នាក់មួយ។ ឈានចូលឆ្នាំ២០១៩ អ្នកនាងបានស្គាល់ និងស្រលាញ់គ្នាជាមួយលោក អេដវីន ព្រមទាំងបានរួមរស់ជាមួយគ្នាប្រៀបដូចប្ដីប្រពន្ធនៅផ្ទះខាងប្រុស។ ចាប់តាំងពីមានទំនាក់ទំនងអ្នកទាំងពីរច្រើនតែរកាំរកូសនិងប្រើហិង្សាសរុបមានចំនួន ៧លើក។ នៅឆ្នាំ២០២១ ថ្ងៃទី១ ខែមិថុនា អ្នកនាង និងលោក អេដវីន បានចែកផ្លូវគ្នាដើរ លែងរួមរស់ជាមួយគ្នាជាប្ដីប្រពន្ធទៀត តែមកដល់ថ្ងៃទី១៥ វេលាម៉ោង៤ និង១០នាទីទាបភ្លឺ អ្នកនាងបានត្រលប់មកពីផឹកស៊ីហូបចុកជាមួយមិត្តភក្ដិ ដោយបានពឹងមិត្តភក្តិឈ្មោះ ហ៊ាង រតនា ឱ្យជូនមកផ្ទះ។ ពេលមកដល់ផ្ទះដោយស្រវឹងស្រាខ្លាំង អ្នកនាងបានចូលសំរាកមួយសន្ទុះ តែពេលភ្ញាក់ឡើងវិញក៏ឃើញ រតនា និង អេដវីន កំពុងវាយគ្នា ហើយ អេដវីន បានអុកឡុកបំផ្លិចបំផ្លាញទ្រព្យសម្បត្តិក្នុងផ្ទះដែលជាកម្មសិទ្ធិម្ដាយបង្កើតអ្នកនាងនៅបុរីពិភពថ្មីឈូកវ៉ា២។»
សូមសង្ខេបបណ្ដឹងខាងលើតែត្រឹមនេះ ងាកមកលោក យិត មាសឧស្សាហ៍ ហៅ អេដវីន នៅថ្ងៃទី២០ ខែមិថុនា ឆ្នាំ២០២១ សមត្ថកិច្ចជំនាញនៃ ការិយាល័យប្រឆាំងការជួញដូរមនុស្ស បានធ្វើការចាប់ឃាត់ខ្លួនលោក អេដវីន ប៉ុន្តែនៅថ្ងៃដដែលនេះអ្នកនាង សុទ្ធ បញ្ចកា បានប្ដូរចិត្ត ហើយសុំដកពាក្យបណ្ដឹង លោក អេដវីន ដោយមិនមានទាមទារសំណងអ្វីទាំងអស់។ យ៉ាងណាមិញ អេដវីន នៅជាប់បណ្ដឹងម្ដាយអ្នកនាង សុទ្ធ បញ្ចកា ពីបទបំផ្លុិចបំផ្លាញទ្រព្យសម្បត្តិ និងបណ្ដឹងរបស់ឈ្មោះ ហ៊ាង រតនា ពីបទបង្ករបួសស្នាម ដូច្នេះសមត្ថកិច្ចបានកសាងសំណុំរឿងបញ្ជូនជនសង្ស័យឈ្មោះ អេដវីន ទៅកាន់តុលាការដើម្បីផន្ទាទោស។
អ្នកនាង សុទ្ធ បញ្ចកា បានព្យាយាមដកពាក្យប្ដឹងម្ដងហើយម្ដងទៀត នៅអយ្យការអមសាលាដំបូងរាជធានីភ្នំពេញ និង នៅសាលាដំបូងរាជធានីភ្នំពេញ ហេតុអ្វី លោក អេដវីន នៅតែជាប់ឃុំឃាំងក្នុងពន្ធនាគារព្រៃស? ចម្ងល់ពាក់ព័ន្ធនឹងបញ្ហាខាងលើនេះ សូមស្រាយបំភ្លឺ និង ពន្យល់តាមច្បាប់ដូចខាងក្រោមនេះ៖
«ក្នុងករណីលោក អេដវីន បានប្រើហិង្សាលើគូស្នេហ៍ បំផ្លិចបំផ្លាញទ្រព្យសម្បត្តិ និង បង្ករបួសស្នាមនេះ ភាគីរងគ្រោះមិនមែនជាម្ចាស់បណ្ដឹងព្រហ្មទណ្ឌ ឬ ជាម្ចាស់បណ្ដឹងអាជ្ញានោះទេ គឺគ្រាន់តែជាម្ចាស់បណ្ដឹងរដ្ឋប្បវេណី ដែលជាម្ចាស់បណ្ដឹងទាមទារនូវសំណងជួសជុលការខូចខាត និងសងជំងឺចិត្តប៉ុណ្ណោះ ហើយភាគីខាងលើនេះត្រូវបានចាត់ទុកថាជាអ្នកមកផ្ដល់ព័ត៌មានដល់សមត្ថកិច្ចថាមានបទល្មើសព្រហ្មទណ្ឌមួយបានកើតឡើង។ ក្នុងនោះដែរជាគោលការណ៍របស់ព្រហ្មទណ្ឌ បណ្ដឹងអាជ្ញាឬបណ្ដឹងព្រហ្មទណ្ឌ គឺមានស្ថាប័នអយ្យការ មានព្រះរាជអាជ្ញា ព្រះរាជអាជ្ញារង ជាម្ចាស់បណ្ដឹង ជាអ្នកសម្រេចចោទប្រកាន់ ឬបញ្ជាឱ្យនគរបាលយុត្តិធម៌កសាងសំណុំរឿង។ ងាកមកវិញហេតុអ្វីបានជាជនរងគ្រោះមិនត្រូវបានអនុញ្ញាតឱ្យធ្វើជាម្ចាស់បណ្ដឹងនៅក្នុងសំណុំរឿងព្រហ្មទណ្ឌ? មូលហេតុព្រោះបើសិនជាជនរងគ្រោះមិនប្ដឹង នោះបានសេចក្ដីថានគរបាល ឬ តុលការ មិនមានសិទ្ធិចូលចាត់ចែងនិងចាត់ការទៅតាមនីតិវិធីនោះទេ ឬក្នុងករណីដែលជនរងគ្រោះបានដាក់ពាក្យប្ដឹងហើយ តែស្រាប់តែសម្រេចដកពាក្យប្ដឹងវិញ ក៏សមត្ថកិច្ច និង តុលាការមិនមានសិទ្ធិហាមឃាត់។ ជារួមបើជនរងគ្រោះជាម្ចាស់បណ្ដឹងព្រហ្មទណ្ឌ ហើយមានសិទ្ធិប្ដឹង ឬដកពាក្យប្ដឹងបាននោះ នឹងធ្វើឱ្យបទល្មើសអាចកើតមានឡើងពេញស្រុកភូមិ ពេញសង្គមជាតិ ក្លាយទៅអនាធិបតេយ្យ និងបង្កឱ្យមានចលាចល។ ប្រការបែបនេះនឹងផ្ដល់អំណោយផលដល់ជនល្មើសដែល មានឥទ្ធិពល មានអំណាច និងលុយកាក់។ ឧទាហរណ៍ថា បុគ្គល (ក) ទៅរំលោភនារី (ខ) ប៉ុន្តែនៅពេលបុគ្គល (ក) យកលុយកាក់ទៅសងជាសំណងដល់នារី (ខ) ហើយនៅពេលភាគី (ខ) ឃើញលុយច្រើនហើយសុខចិត្តដកបណ្ដឹង ឬករណីរំលោភហើយ ជនរងគ្រោះទទួលបានលុយសំណងហើយ មិនព្រមប្ដឹងផ្ដល់ ខណៈ សមត្ថកិច្ច និង តុលាការមិនមានសិទ្ធចាត់ចែងលើពាក្យបណ្ដឹងនេះទេនោះ ពិតណាស់បទល្មើសនឹងកើតមានគ្រប់ទីកន្លែង ព្រោះអ្នកមានប្រាក់ មានអំណាច មានតួនាទី អាងយកលុយមកបិទមាត់ ចំណែកជនរងគ្រោះមិនហ៊ានប្ដឹងព្រោះខ្លាចអំណាចនិងតួនាទីរបស់ជនបង្ក ដូច្នេះដើម្បីការពារភាគីជនរងគ្រោះ ចង់ដកពាក្យប្ដឹង ឬមិនប្ដឹង ដែលបង្កឱ្យមានក្លាយជារឿងអនាធិបតេយ្យក្នុងសង្គម។ សរុបមកវិញក្នុងករណីលោក អេដវីន នេះ ទោះជាភាគីអ្នកនាង សុទ្ធ បញ្ចកា ព្យាយាមដកពាក្យប្ដឹងយ៉ាងណាក៏ដោយ ការដកពាក្យប្ដឹងរបស់អ្នកនាង គឺគ្រាន់តែដកបណ្ដឹងរដ្ឋប្បវេណី ឬសំណងជួសជុលការខូចខាត និងសំណងផ្លូវចិត្តតែប៉ុណ្ណោះ ក្នុងរឿងនេះច្បាប់អនុញ្ញាតឱ្យប្ដឹងក៏បាន មិនប្ដឹងក៏បាន ព្រោះជាផលប្រយោជន៍ឯកជន ហេតុនេះតុលាការទុកឱ្យបុគ្គលខ្លួនឯងជាអ្នកសម្រេច ប៉ុន្តែការដកបណ្ដឹងរដ្ឋប្បវេណី មិនបានធ្វើឱ្យបណ្ដឹងអាជ្ញា ឬបណ្ដឹងព្រហ្មទណ្ឌដែលអយ្យការមានព្រះរាជអាជ្ញា ព្រះរាជអាជ្ញារង ជាម្ចាស់បណ្ដឹងនោះបានឡើយ បានសេចក្ដីថា ព្រះរាជអាជ្ញា ព្រះរាជអាជ្ញារង សមត្ថកិច្ចនគរបាលយត្តិធម៌ នៅតែអាចកសាងសំណុំរឿង ចាត់នីតិវិធីបន្តបន្ទាប់ បញ្ជូនទៅតុលាការបើកការស៊ើបអង្កេត និងបើកការជំនុំជំរះសម្រេចទោសនៅពេលខាងមុខដដែល។ »
សូមបញ្ជាក់ថា រឿងព្រហ្មទណ្ឌ ឬក៏បទល្មើសព្រហ្មទណ្ឌ រឿងអាជ្ញា ឬក៏បទល្មើសអាជ្ញា បណ្ដឹងព្រហ្មទណ្ឌឬបណ្ដឹងអាជ្ញា មិនមែនជារឿងបុគ្គលឯកជន ឬជារឿងរូបវន្តបុគ្គលនោះទេ តែជារឿងរបស់សង្គមទាំងមូល ទោះជារឿងនោះកើតលើតែភាគី (ក) ឬ បុគ្គល (ក) ក៏ដោយ តែច្បាប់ចាត់ទុកថាជារឿងរបស់សង្គមទាំងមូល អ្នកដែលគ្រប់គ្រងសន្តិសុខសង្គម តំណាងឱ្យសង្គម គឺស្ថាប័នអយ្យការ ដែលមានព្រះរាជអាជ្ញា ព្រះរាជអាជ្ញារង ហើយស្ថាប័ននេះជា អភិបាល បញ្ជា ដឹកនាំ ទៅលើនគរបាលយុត្តិធម៌ ស៊ើបអង្កេត និងកសាងសំណុំរឿង។ សរុបមកវិញបទល្មើសព្រហ្មទណ្ឌ មិនមែនជាផលប្រយោជន៍សម្រាប់តែបុគ្គលឯកជន ជនរងគ្រោះតែម្នាក់នោះទេ តែជាផលប្រយោជន៍របស់សង្គមទាំងមូល ឬជារឿងរបស់សង្គមទាំងមូល ក្រោមការចាត់ចែងដោយស្ថាប័នអយ្យការមានព្រះរាជអាជ្ញា ព្រះរាជអាជ្ញារងជាអ្នកទទួលបន្ទុក៕