ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានមានប្រសាសន៍ថា ស.ស.យ.ក បានត្រៀមខ្លួនជាស្រេច ដើម្បីរួមចំណែកជាមួយគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដែលជាព្រឹត្តិការណ៍កីឡាថ្នាក់តំបន់លើកដំបូងនៅកម្ពុជានេះ។ ការលើកឡើងដូចនេះ នៅក្នុងសន្និសីទសារព័ត៌មាន ស្ដីពីការជ្រើសរើសអ្នកស្ម័គ្រចិត្តសម្រាប់ព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ កាលពីថ្ងៃទី០១ ខែកុម្ភៈ ឆ្នាំ២០២៣។
ឯកឧត្តម ហ៊ុន ម៉ានី បានលើកឡើងថា៖ «ស.ស.យ.ក មិនមែនជាផ្នែកមួយ នៃគណៈកម្មាធិការជាតិ CAMSOC នោះទេ តែដោយមានការឯកភាពពីសម្ដេចពិជ័យសេនា ទៀ បាញ់ ស.ស.យ.ក គឺជាដៃគូសហការជាមួយគណៈកម្មការជំនាញចំនួន ៣ ក្នុងចំណោមគណៈកម្មការទាំង ១៣របស់ CAMSOC»។ ទី១- គណៈកម្មការផ្សព្វផ្សាយ ដែលចូលរួមមួយផ្នែកតូច គឺផ្សព្វផ្សាយឲ្យបានទូលំទូលាយ តាមប្រព័ន្ធផ្សព្វផ្សាយនានារបស់ខ្លួន ជាក់ស្ដែងដូចជាយុទ្ធនាការ Beyond The Games ជាដើម។ ទី២- គណៈកម្មការវប្បធម៌ បរិស្ថាន អប់រំ និងកីឡា និងទី៣-គណៈកម្មការអ្នកស្ម័គ្រចិត្ត។
ឯកឧត្តម ហ៊ុន ម៉ានី បន្ដថា៖«យុវជនស្ម័គ្រចិត្ត មិនត្រឹមតែអ្នកសម្របសម្រួល ធ្វើឲ្យការអនុវត្ត និងការប្រព្រឹត្តទៅនៃកម្មវិធីជោគជ័យទេ ប៉ុន្ដែកត្ដាធំជាងហ្នឹងទៀត សំខាន់គឺគាត់ជាយុវជនសុច្ឆន្ទៈរបស់កម្ពុជា។ អាកប្បកិរិយារបស់គាត់ ការបំពេញភារកិច្ចរបស់គាត់ និងអ្វីដែលជាភាពរួសរាយ ឥរិយាបថរបស់គាត់ គឺឆ្លុះបញ្ចាំងអ្វីទៅជាកម្ពុជា ដែលជាប្រទេស និងមានប្រជាជន ក្នុងការផ្ដល់នូវភាពកក់ក្ដៅ និងបដិសណ្ឋារកិច្ចល្អជូនដល់បរទេស ដែលជាមិត្តភក្តិមកចូលរួមនៅកម្ពុជា»។
សូមបញ្ជាក់ថា ក្នុងនាមជាម្ចាស់ផ្ទះកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ កម្ពុជាត្រូវការអ្នកស្ម័គ្រចិត្តចំនួន ៦,៩៦៣នាក់ ដែលត្រូវបានបែងចែកជា៣កម្រិតគឺ១. អ្នកស្ម័គ្រចិត្តជា ថ្នាក់ដឹកនាំ, ២. អ្នកស្ម័គ្រចិត្តជាជនបង្គោល និង៣. អ្នកស្ម័គ្រចិត្តទូទៅ ព្រមទាំង៥០កន្លែងសម្រាប់ជនជាតិបរទេស។ លើសពីនេះក៏ត្រូវការអ្នកស្ម័គ្រចិត្ត នៅខេត្តសៀមរាប ចំនួន ១០០នាក់ ខេត្តព្រះសីហនុ ១០០នាក់ ខេត្តកែប ៥០នាក់ និងខេត្តកំពត ៥០នាក់៕