បន្ទាប់ពីកិច្ចប្រជុំពិសេសនៅប្រទេសបារ៉ែនកាលពីថ្ងៃទី០១ ខែកុម្ភ: ឆ្នាំ២០២៣ រួចមកសហព័ន្ធកីឡាបាល់ទាត់អាស៊ី (AFC) បានបញ្ជាក់ថា ប្រទេសអារ៉ាប៊ីសាអូឌីត នឹងទទួលសិទ្ធធ្វើជាម្ចាស់ផ្ទះសម្រាប់ព្រឹត្តិការណ៍ប្រកួតពានរង្វាន់ AFC Asian Cup 2027 ខាងមុខ។
លោក Yasser bin Hassan Al-Mishal ប្រធានសហព័ន្ធកីឡាបាល់ទាត់អារ៉ាប៊ីសាអូឌីតបាន និយាយថា៖ «យើងមានកំណត់ត្រាល្អដែលជាការបង្ហាញផ្លូវសម្រាប់ជ័យជម្នះខាងមុខនេះ យើងសង្ឃឹមថានឹងបង្ហាញពីភាពអស្ចារ្យរបស់អារ៉ាប៊ីសាអូឌីតក្នុងការធ្វើជាម្ចាស់ផ្ទះ។ លោកបន្ថែមថា ដោយមើលឃើញពីការគាំទ្រពីការដឹកនាំដ៏ឈ្លាសវៃរបស់យើង ដូច្នេះយើងអាចបន្តដំណើរនៃការធ្វើជាម្ចាស់ផ្ទះនូវព្រឹត្តិការណ៍អន្តរជាតិជាច្រើនក្នុងវិស័យផ្សេងៗ»។
ប្រធាន AFC លោក Sheikh Salman bin Ebrahim Al Khalifa ក៏បានលើកឡើងថា៖ «នេះជាលើកដំបូងដែលការប្រកួតនឹងត្រូវធ្វើឡើងនៅប្រទេសអារ៉ាប៊ីសាអូឌីត ហើយយើងទន្ទឹងរង់ចាំធ្វើការយ៉ាងជិតស្និទ្ធជាមួយសហព័ន្ធកីឡាបាល់ទាត់អារ៉ាប៊ីសាអូឌីត (SAFF) និងរដ្ឋាភិបាលអារ៉ាប៊ីសាអូឌីតក្នុង ពាន រង្វាន់ AFC Asian Cup ដែលមិនអាចបំភ្លេចបានសម្រាប់អ្នកគាំទ្រ និងកីឡាកររបស់ យើងនៅឆ្នាំ២០២៧»។
គួរបញ្ជាក់ផងដែរថា វាគឺជាលើកទីមួយហើយដែលប្រទេសអារ៉ាប៊ីសាអូឌីត ធ្វើជាម្ចាស់ផ្ទះក្នុងព្រឹត្តិការណ៍ប្រកួតពាន់រង្វាន់AFC Asian Cup នេះ។ ដែលក្រុមជម្រើសជាតិរបស់ប្រទេសអារ៉ាប៊ី សា អូឌីត ធ្លាប់បានលើកពានបីលើកគឺនៅក្នុងឆ្នាំ ១៩៨៤, ១៩៨៨ និងឆ្នាំ១៩៩៦៕