តើលោក កាំង សេន ប្រធានក្លិប ISI ដង្កោសែនជ័យ អាចបង្ហាញខ្លួនជាកីឡាករសម្រាប់ប្រកួតពានរង្វាន់ League Cup រដូវកាលឆ្នាំ២០២៣ នេះឬទេ?
សម្រាប់រដូវកាលថ្មីនេះលោកនៅតែបន្តចូលរួមលេងក្នុងនាមជាខ្សែប្រយុទ្ធ ពាក់អាវលេខ៩ នឹងមានឈ្មោះក្នុងបញ្ជីកីឡាករ ដែលត្រៀមប្រកួតពាន League Cup ទៀតផង។ លើកពីនេះលោកក៏ជាកីឡាករដែលមានអាយុច្រើនជាងគេផងដែរសម្រាប់ព្រឹត្តិកាណ៍ប្រកួតពាន League Cup រដូវកាលនេះ។
លោក កាំង សេន ធ្លាប់បានជាប់ឈ្មោះជាកីឡាករល្អប្រចាំការប្រកួត នៃពានរង្វាន់សម្ដេចអគ្គមហាសេនាបតីតេជោ ហ៊ុន សែនលើកទី១៦ វគ្គជម្រុះថ្នាក់ជាតិ កាលពីឆ្នាំ២០២២។ ដោយកន្លងមកប្រធានក្លិប ISI រូបនេះតែងតែបង្ហាញខ្លួននៅក្នុងការប្រកួតកន្លងនានា។
លោក កាំង សេន បានប្រាប់សាព័ត៌មាន ត្រយង ក្នុងកម្មវិធី «Celebrating Football & Street Art» នៅកីឡដ្ឋាន AIA Stadium, KMH PARK កាលពីថ្ងៃទី៤ ខែកុម្ភ: ថា៖ «នៅរដូវកាលមុនខ្ញុំខំហ្វឹកហាត់មែនទែន ដើម្បីមានឱកាសចូលលេងនៅលើកទីលាន AIA នៅការប្រកួតបើកឆាក តែដោយសារខ្ញុំមានរបួសក៏ត្រូវសម្រាកព្យាបាលសិន។ ក្រោយពេលសម្រាកព្យាបាលអស់រយ:ពេល៣ខែរួចមកខ្ញុំសង្ឃឹមថានឹងអាចចូលលេងបាននៅចុងរដូវកាល League Cup នេះឬ CPL ឆ្នាំក្រោយ»។
គួរដឹងថាក្លិបបាល់ទាត់ អាយ អេស អាយ ដង្កោសែនជ័យ គឺជាអតីតជើងខ្លាំងមួយ នៅក្នុងការប្រកួតបាល់ទាត់ពាក់កណ្តាលអាជីព ជាពិសេសគឺជាម្ចាស់ជើងឯកពានរង្វាន់ពាក់កណ្តាលអាជីព KMH Champion League កាលពីរដូវកាល ២០១៩ ហើយក៏បន្តអភិវឌ្ឍមកជាក្លិបបាល់ទាត់អាជីព។ ខណ:ចូលរួមប្រកួតប្រជែងជើងឯកលីគ ទី២ ជាលើកដំបូងកាលពីរដូវកាល២០២០ រហូតមកដល់បច្ចុប្បន្ននេះ៕