ក្រុមបាល់ទាត់អ៊ុយរុយហ្គាយ និងប៉ារ៉ាហ្គាយ បានបន្តជ័យជម្នះក្នុងវគ្គជម្រុះពូល A នៃពានរង្វាន់បាល់ទាត់ជើងឯកប្រចាំទ្វីបអាមេរិកខាងត្បូង 2021 Copa América នៅព្រឹកថ្ងៃសុក្រ ទី២៥ ខែមិថុនា ឆ្នាំ២០២១ នេះ ដែលកំពុងធ្វើឡើងនៅប្រទេសប្រេស៊ីល ជាម្ចាស់ផ្ទះ។
លទ្ធផលប្រកួតពូល A មាន៖
-បូលីវី ០-២ អ៊ុយរុយហ្គាយ
-ស៊ីលី ០-២ ប៉ារ៉ាហ្គាយ
សម្រាប់ប្រកួតបន្តនឹងបិទបញ្ចប់ពូល B នៅថ្ងៃទី២៨ ខែមិថុនា ឆ្នាំ២០២១ ដោយ៖
- ប្រេស៊ីល ប៉ះ អេក្វាឌ័រ ម៉ោង៤ព្រឹក
- វេណេហ្ស៊ុយអេឡា ប៉ះ ប៉េរូ ម៉ោង៤ព្រឹក
គិតត្រឹមពេលនេះអ្នកទាត់បាល់បញ្ជូលទីបានច្រើនជាងគេ គឺរកបានម្នាក់២គ្រាប់មាន Neymar របស់ប្រេស៊ីល Eduardo Vargas របស់ឈីលី Ayrton Preciadoរបស់អេក្វាឌ័រ និង Ángel Romero របស់ប៉ារ៉ាហ្គាយ។
បើតាមការកំណត់របស់គណៈកម្មការប្រកួតក្រុមលេខ១ដល់លេខ៤តាមពូលនីមួយៗមានឈ្មោះឡើងទៅជុំបន្ត ខណៈព្រឹត្តិការណ៍នេះមានក្រុមចូលរួមចំនួន១០ក្រុម បែងចែកជា២ពូល នឹងចាប់ផ្ដើមពីថ្ងៃទី១៣ ខែមិថុនា ដល់ថ្ងៃទី១០ ខែកក្កដា ឆ្នាំ២០២១។
ពូល A អាហ្សង់ទីន,បូលីវី,អ៊ុយរុយហ្គាយ,ប៉ារ៉ាហ្គាយ ចំណែកពូល B កូឡុំប៊ី,ប្រេស៊ីល,វេណេហ្ស៊ុយអេឡា,អេក្វាទ័រ និងប៉េរូ។ ដូច្នេះក្រុមដែលហាលអាវមុនគេ គឺបូលីវី នៅក្នុងពូល A ព្រោះនៅសល់ម្នាក់១ប្រកួតប៉ុណ្ណោះ។ ចំណែកពូល B នៅមិនទាន់ច្បាស់លាស់នៅឡើយ តែក្រុមម្ចាស់ផ្ទះប្រេស៊ីល កក់កៅអីឡើងជុំបន្តមុនគេ។
ពានរង្វាន់ Copa America រៀបចំឡើងតាំងពីឆ្នាំ១៩១៦ ហើយក្រោយមកវិវត្តន៍រៀបចំនៅរាល់៣ឆ្នាំម្តង ដោយប្រទេសអ៊ុយរ៉ាហ្គាយ ឈ្នះពានរង្វាន់បានច្រើនជាងគេ គឺរហូតដល់១៥លើក ខណៈក្រុមប្រេស៊ីល ជាម្ចាស់ជើងឯកឆ្នាំចាស់កាលពីឆ្នាំ២០១៩។ ចំណែកក្រុមអាហ្សង់ទីន ធ្លាប់ឈ្នះបាន១៤លើក ក្រុមប៉ារ៉ាហ្គាយ និងឈីលី ឈ្នះបានម្នាក់២លើក និងកូឡុំប៊ី និងបូលីវី ឈ្នះម្នាក់១លើក៕