សារព័ត៌មាន Helsinkitimes របស់ប្រទេសហ្វាំងឡង់ បានបញ្ជាក់ថាមានអ្នកគាំទ្រក្រុមជម្រើសជាតិខ្លួនប្រមាណជិត១០០នាក់ បានឆ្លងជំងឺកូវីដ-១៩ ក្រោយត្រឡប់មកពីទស្សនាការប្រកួតផ្ទាល់របស់ក្រុមហ្វាំងឡង់ ជាមួយបែលហ្សិក ក្នុងកីឡដ្ឋាន Krestovsky Stadium នៅទីក្រុង Saint Petersburg ប្រទេសរុស្ស៊ី ដែលជាទឹកដីកណ្ដាល។
ប្រកួតបិទពូល B កាលពីថ្ងៃច័ន្ទ សប្ដាហ៍នេះក្រុមហ្វាំងឡង់ បានចាញ់បែលហ្សិក ដោយលទ្ធផល២ទល់០ ហើយបរាជ័យនេះបានធ្វើឱ្យក្រុមហ្វាំងឡង់ ហាលអាវ។ ៣ប្រកួតរបស់ហ្វាំងឡង់ បានឈ្នះដាណឺម៉ាក ១ទល់០ តែចាញ់រុស្ស៊ី ១ទល់០ និងបន្តចាញ់បែលហ្សិក ២ទល់០។
ហ្វាំងឡង់ បានធ្វើតេស្តពលរដ្ឋខ្លួននៅព្រំដែនពេលធ្វើដំណើរត្រឡប់មកពីរុស្ស៊ី ហើយរកឃើញ៨៦ករណី។ ប៉ុន្តែគេកំណត់មុខសញ្ញាអ្នកគាំទ្រប្រមាណជា៣០០០នាក់បានឆ្លងដែនទៅគាំទ្រជម្រើសជាតិខ្លួននៅរុស្ស៊ី ហើយមានអ្នកគាំទ្រប្រមាណ៨០០នាក់ត្រឡប់ចូលប្រទេសខ្លួនវិញ ដោយមិនទាន់បានធ្វើតេស្តនៅឡើយ។
អត្ថបទពាក់ព័ន្ធ៖EURO៖រកឃើញគូប៉ះគ្នានៅវគ្គ១៦ក្រុមចុងក្រោយ ហើយRonaldo ឈរក្នុងបញ្ជី Top Scorers
លោកស្រី Sanna Marin នាយករដ្ឋមន្ត្រីនៃប្រទេសដែលជាប់ចំណាត់ថ្នាក់លេខ១ជាប្រទេសរស់នៅមានសេចក្តីសុខជាងគេលើលោក មួយនេះបានអំពាវនាវពលរដ្ឋខ្លួនដែលទើបធ្វើដំណើរត្រឡប់មកពីរុស្ស៊ី អោយយកសំណាក់ពិនិត្យរកជំងឺកូវីដ-១៩ ឱ្យបានគ្រប់ៗគ្នា ក្រោយមានការរកឃើញជាបន្តបន្ទាប់នាពេលកន្លងមក។
«គ្រប់គ្នាត្រូវតែយកសំណាក តេស្តរកជំងឺកូវីដ-១៩ ទាំងអស់គ្នា។ បើសិនជាបានរកឃើញទាន់ពេលវេលានោះការរីកឆ្លងនឹងមិនផ្ទុះឡើងខ្លាំងនោះទេ»។ នាយករដ្ឋមន្ត្រីជាស្រ្ដីវ័យ៣៦ឆ្នាំបន្ថែម៕
