បច្ចុប្បន្ននេះក្រុមគ្រូពេទ្យស្ម័គ្រចិត្តជួរមុខ TYDA កំពុងតែលះបង់នូវកម្លាំងកាយកម្លាំងចិត្តរបស់ខ្លួនដើម្បីបុព្វហេតុជាតិ គឺជួយសង្គ្រោះដល់អ្នកជំងឺកូវីដ-១៩ ក្នុងនោះតារាចម្រៀង ជ័យ សុវ៉ាត ដែលជាតារាចម្រៀងប្រចាំផលិតកម្ម សាន់ដេ ក៏ជាគ្រូពេទ្យស្ម័គ្រចិត្តជួរ ដែលសុខចិត្តលះបង់ពេលវេលាផ្ទាល់ខ្លួនមកចូលរួមពួតដៃគ្នាជាមួយនឹងកងទ័ពអាវសជាច្រើនរូបទៀត ច្បាំងជាមួយនឹងសត្រូវកូវីដ-១៩ ដែលជាសត្រូវមួយកាចសាហាវជាទីបំផុត។
សូមចុចអាន សុភក្ត្រ កុសុម៉ា ជូនថវិកាបុរសពិការម្នាក់ធ្វើដើមទុនបង្កើតមុខរបរ!
ដូចពាក្យចាស់ថាមានអាជីពជាតារាចម្រៀងទៅណាក៏មិនអាចចោលក្បាលមេក្រូ យ៉ាងណាមិញពាក្យនេះអាចប្រើត្រូវនឹងតារាចម្រៀងប្រចាំផលិតកម្មសាន់ដេរូបនេះណាស់ ព្រោះនៅមុននេះបន្តិចតាមរយៈហ្វេសប៊ុករបស់លោក ដែលមានឈ្មោះថា ជ័យ សុវ៉ាត- Chey Sovath បានបង្ហោះសកម្មភាពលោកក្នុងឯកសណ្ឋានគ្រូពេទ្យ PPE (ឈុតការពារ) កំពុងតែច្រៀងកំដរអារម្មណ៍អ្នកជំងឺកូវិដ-១៩ នៅក្នុងមណ្ឌលព្យាបាលទួលពង្រ ដែលសកម្មភាពនេះគឺក្នុងគោលដៅជួយបន្ធូរបន្ថយភាពតានតឹង និងបំបាត់ភាពភ័យខ្លាចដល់អ្នកជំងឺ និងចាត់ទុកជាការហាត់ប្រាណមួយដែរ។
អមជាមួយនឹងវីដេអូច្រៀងខាងលើ គ្រូពេទ្យស្ម័គ្រចិត្តជួរមុខធីតាដែលជាតារាល្បីមួយរូបផងនោះ បានបង្ហោះជាសំណេរនៅលើទំព័រហ្វេសប៊ុកខ្លួនដែលមានអត្ថន័យទាំងស្រុងថា៖ «ជាចុងក្រោយក្នុងនាមខ្ញុំបាទជាគ្រូពេទ្យជួរមុខក្រុម៣ មណ្ឌលទួលពង្រ លោក ជ័យ សាវ៉ាត សូមថ្លែងអំណរគុណយ៉ាងក្រៃលែងដល់ថ្នាក់ដឹកនាំទាំងពីររូប គឺបងប្រុសហ៊ុន ម៉ាណែត និងបងស្រី ពេជ្រ ចន្ទមុន្នី ដែលបានយកចិត្តទុកដាក់ដល់ក្រុមគ្រូពេទ្យ និងអ្នកជំងឺគ្រប់ជ្រុងជ្រោយទាំងអស់ សូមជូនពរបងទាំងពីរ និង បងក្រុមការងារ សុខសុវត្ថិភាពគ្រប់ៗគ្នា »
តាមរយៈវីដេអូរយៈពេលជាង៣នាទីនេះ បានបង្ហាញឱ្យឃើញពីរការខិតខំប្រឹងប្រែងរបស់ក្រុមគ្រូពេទ្យស្ម័គ្រចិត្តជួរមុខ TYDA ដែលមិនត្រឹមតែ មានតួនាទីព្យាបាលដល់បងប្អូនអ្នកជំងឺ ប៉ុណ្ណោះទេ ថែមទាំងព្យាយាមបង្ក និង បង្កើត នូវបរិយាកាសរីករាយដល់អ្នកជំងឺកូវីដ-១៩ ដោយមិនខ្លាចនឿយហត់អ្វីទាំងអស់៕
ទស្សនាវីដេអូ ជ័យ សុវ៉ាត ច្រៀងចម្រៀងជូនអ្នកជំងឺកូវីដ-១៩ នៅក្នុងមណ្ឌលព្យាបាលទួលពង្រខាងក្រោមនេះ៖