ភ្នំពេញ៖ នៅថ្ងៃទី ១៤ ខែកុម្ភៈ ឆ្នាំ ២០២៣ ក្រសួងកសិកម្ម រុក្ខាប្រមាញ់ និងនេសាទ បានរៀបចំដាក់លក់ផលិតផលខ្មែរអបអរថ្ងៃ១៤កុម្ភៈ ដែលត្រូវបានគេស្គាល់ជាទូទៅថាជាថ្ងៃទិវានៃក្តីស្រលាញ់។ ក្នុងឱកាសនេះ ផលិតផលខ្មែរជាច្រើនមុខកំពុងដាក់តាំងលក់ពិសេសបន្លែសុវត្ថិភាព អង្ករបាយឆ្ងាញ់ និងស្រាផ្លែឈើរសជាតិស្រទន់ ដែលបានវេចខ្ចប់យ៉ាងស្អាតសម្រាប់ជាកាដូថ្ងៃដ៏ពិសេសនេះ ដោយមានស្តង់ជាច្រើន ដូចជាសាកលវិទ្យាល័យភូមិន្ទកសិកម្ម និងមាសបៃតងជាដើម។
លោកបណ្ឌិត ចាយ ជីម តំណាងឱ្យសាកលវិទ្យាល័យភូមិន្ទកសិកម្ម បានលើកឡើងថា ការរៀបចំនូវពិព័រណ៍ផលិតផលកសិកម្មនៅមុខក្រសួងកសិកម្ម រុក្ខាប្រមាញ់ និងនេសាទ គឺជាការប្រសើរបំផុត ក្នុងការនាំស្នាដៃរបស់សិស្សនិស្សិត យកមកតាំងបង្ហាញជូនមហាជនដែលកំពុងធ្វើដំណើរនៅលើវិថីនរោត្តមនេះ។ ក្នុងនោះមានផលិតដូចជា រុក្ខជាតិតាំងលម្អ បន្លែ គ្រឿងសម្លស្ងួត ស្រាព្រីង និងផលិតផលកែច្នៃជាច្រើនមុខទៀតផងដែរ។ លោកបន្ថែមថា នេះគឺជាឆ្នាំដំបូងហើយដែលក្រសួងបានរៀបចំនូវព្រឹត្តិការណ៍នេះឡើង លោកចង់ឱ្យមានជាបន្តទៀតនៅឆ្នាំក្រោយៗ។ លោកបណ្ឌិត បញ្ជាក់ថាសិស្សនិស្សិតដែលស្រឡាញ់ និងបានសិក្សាខាងវិស័យកសិកម្ម គឺមិនព្រួយខ្លាចខ្វះការងារល្អនេះទេ លោកថា មាននិស្សិតជាច្រើនដែលបានបញ្ចប់ការសិក្សាហើយ បានទទួលការងារបម្រើការនៅក្រុមហ៊ុនផលិតចំណីអាហារ។ លោកអំពាវដល់រដ្ឋាភិបាលក្នុងការជំរុញឱ្យវិស័យកសិកម្ម កាន់តែមានភាពរីកចម្រើនបន្ថែមទៀត។
អ្នកនាង សឹង សារុំ តំណាងឱ្យវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា (កាឌី) លើកឡើងថា ក្ដីស្រឡាញ់គឺជាការគិតគូពីសុខភាព ហើយស្តង់របស់អ្នកនាង ក៏បានតាំងលក់អង្ករធម្មជាតិដែលគ្មានជាតិគីមី។ អ្នកនាងថា ថ្ងៃនេះជាថ្ងៃនៃក្តីស្រលាញ់ យើងគួរលក់ផលិតផលសុវត្ថិភាពមកដាក់តាំងជូនបងប្អូនអ្នកទទួលទានដើម្បីសុខភាពល្អ គឺយើងធ្វើការផ្សារភ្ជាប់ក្តីស្រលាញ់ និងសុខភាព ស្រលាញ់គ្រួសារ ពិសាអាហារសុវត្ថិភាព។
កញ្ញា ហេង ផល្គន បានប្រាប់ត្រយងថា ទិវានៃក្ដីស្រឡាញ់ មិនមែនត្រឹមតែបាច់ផ្កាកុលាបទើបអាចបង្ហាញពីក្ដីស្រឡាញ់បានទេ។ កញ្ញា និងក្រុមការងារបានច្នៃបន្លែស្រស់ដែលជាផលិតផលកសិករខ្មែរ មកច្នៃជាបាច់ផ្ការួចតាំងលក់នៅក្នុងពិព័រណ៍នេះ។ គំនិតច្នៃប្រឌិតនេះ កញ្ញាមានគោលបំណងចង់ឱ្យមានការគាំទ្រចំពោះផលិតផលកសិកម្មខ្មែរ ស្របតាមអ្វីដែលក្រសួងកំពុងបំផុសគំនិត។
សូមជម្រាបថា ផលិតផលដែលតាំងលក់គឺផលិតផលស្រស់មានជាច្រើនមុខ ហើយរបស់កែច្នៃមានប្រមាណជិត ២០មុខ ដែលជាផលិតផលសុវត្ថិភាព ល្អសម្រាប់សុខភាព ដោយមិនមានសារធាតុគីមីឡើយ។ សម្រាប់អតិថិជនវិញ បានបង្ហាញពីអារម្មណ៍រំភើបរីករាយដែលក្រសួងផ្តើមរៀបចំឱ្យមានការតាំងលក់បន្លែសុវត្ថិភាពនៅទីនេះ៖ «ខ្ញុំមកទិញបន្លែ គឺដោយសារខ្ញុំស្រលាញ់បន្លែ និងស្រលាញ់អ្នកដែលខ្ញុំទិញបន្លែទៅឱ្យ»៕
