កាលពីថ្ងៃទី១៥ ខែកុម្ភ: ឆ្នាំ២០២៣ ក្លិប Selangor នៅលីគកំពូលម៉ាឡេស៊ី បានបង្ហោះនៅលើទំព័រផ្លូវការរបស់ខ្លួនពីដំណើរទស្សនកិច្ចរបស់អ្នកចាត់ការក្រុមជម្រើសជាតិ កម្ពុជាលោក Keisuke Honda ដើម្បីពិនិត្យមើលហេដ្ឋារចនាសម្ព័ន្ធរបស់ក្លិប និងការរៀបចំទូទៅនៅមជ្ឈមណ្ឌលហ្វឹកហាត់របស់ក្លិបមួយនេះ។
ដំណើរទស្សនកិច្ចទៅកាន់ប្រទេសនៅតំបន់អាស៊ាន មានដូចជា វៀតណាម ឥណ្ឌូណេស៊ី និងម៉ាឡេស៊ី នេះអាចជាសញ្ញាណមួយអំពីដំណើរត្រៀមចេញទៅបោះជំរុំហ្វឹកហាត់នៅក្រៅប្រទេស ខណៈកាលពីពេលថ្មីៗនេះ ក៏មានដំណឹងពីក្រុមជម្រើសជាតិអាយុក្រោម ២២ឆ្នាំ នឹងធ្វើដំណើរទៅបោះជំរុំហ្វឹកហាត់នៅប្រទេសថៃនៅថ្ងៃទី ២៧ ខែកុម្ភៈ ឆ្នាំ២០២៣ ដើម្បីត្រៀមស៊ីហ្គេម។ ទោះជាយ៉ាងណាក៏ដោយ យើងនៅរង់ចាំមើលការប្រកាសផ្លូវការនៅលើទំព័រនៃ សហព័ន្ធកីឡាបាល់ទាត់កម្ពុជា។
គួររំលឹកថា ក្រោមការដឹកនាំរបស់លោក Keisuke Honda កម្ពុជា នឹងមិនអនុញ្ញាតឲ្យមានការចុះឈ្មោះកីឡាករលើសអាយុឡើយសម្រាប់វិញ្ញាសារបាល់ទាត់បុរស ក្នុងព្រឹត្តិការណ៍ស៊ីហ្គេមឆ្នាំ២០២៣ នៅខែឧសភាខាងមុខនេះ។ នេះជាលើកទី២ ដែលកម្ពុជាមិនប្រើប្រាស់កីឡាករលើសអាយុសម្រាប់វិញ្ញាសារបាល់ទាត់ផ្នែកបុរស បន្ទាប់ពីព្រឹត្តិការណ៍ស៊ីហ្គេមឆ្នាំ២០២២ នៅប្រទេសវៀតណាម។
គួរបញ្ជាក់ថា ការប្រកួតស៊ីហ្គេមនេះគឺជាបេសកម្មចុងក្រោយរបស់លោក Keisuke Honda ក្រោយ សបក ប្រកាសជាផ្លូវការពីចាកចេញរបស់លោកក្រោយបញ្ចប់។ ព្រឹត្តិការណ៍ ប្រកួត កីឡា អាស៊ីអា គ្នេយ៍ លើកទី៣២ នឹងធ្វើឡើងពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ ចំណែកព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ នឹងធ្វើឡើងពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣៕