សហព័ន្ធកីឡាបាល់ទាត់ហ្វីលីពីន និងលីគកំពូលហ្វីលីពីន នៅថ្ងៃទី១៦ ខែកុម្ភ: ឆ្នាំ២០២៣ នេះបានប្រកាសថា ក្លិប United City FC បានស្នើសុំដកខ្លួនចេញពីការប្រកួតលីគកំពូលហ្វីលីពីន សម្រាប់រដូវកាលឆ្នាំ២០២២-២០២៣ មុនពេលការប្រកួតលីគឡើងវិញនៅចុងសប្តាហ៍នេះ។
ការប្រកាសដក់ខ្លួនចេញនៅក្នុងការប្រកួតលីគបាល់ទាត់ហ្វីលីពីន សម្រាប់រដូវកាលឆ្នាំ២០២២-២០២៣ គឺដោយសារក្លឹប United City បានលើកឡើងពីហេតុផលហិរញ្ញវត្ថុ។
លោក Mariano Araneta ប្រធានសហព័ន្ធកីឡាបាល់ទាត់ហ្វីលីពីន បាននិយាយថា៖ «យើងយល់ពីស្ថានភាពដែលប៉ះពាល់ដល់ United City FC ដែលបង្ខំចិត្តឱ្យពួកគេដកខ្លួនចេញ។ យើងសង្ឃឹមថាក្លឹបនិងអ្នកគ្រប់គ្រងរបស់ពួកគេនឹងអាចត្រលប់មកលេងវិញបាន»។
គួរបញ្ជាក់ថា ក្លឹប United City បានទទួលការចាប់អារម្មណ៍នៅក្នុងពិភពបាល់ទាត់របស់ ហ្វីលីពីន ដោយ បានក្លាយជាក្លឹបហ្វីលីពីនដំបូងគេដែលបានចូលលេងក្នុងពានរង្វាន់ AFC Champions League វគ្គចែកពូល បន្ទាប់ពីទទួលបានជើងឯកលីគហ្វីលីពីននៅឆ្នាំ២០២០៕